“دەبێت سەرجەم فەرمانگە و شوێنە گشتییەكان كامێرای چاودێری دابنێن”

ئا/ پشتیوان كەریم:
مقەدەم محەمەد عەلی، بەڕێوەبەری بەشی نەهێشتنی تاوان لە سۆران، باس لە تاوان و هۆكارەكانی دەكات و دەڵێ، لە سنووری ئیدارەی سۆران رێژەی دزی و تاوان زۆر كەم بووە، ئەوانەشی دزی دەكەن لە دەرەوەی سنوورەكەوە دێن. دەشڵێ، دەبێت سەرجەم فەرمانگە و شوێنە گەشتییەكان كامێرای چاودێری دابنێن.
بەڕێوەبەری بەشی نەهێشتنی تاوان لە سۆران، بۆ زاری كرمانجی دەڵێت:” دوو مانگ بەر لە ئێستا چەند حاڵەتێكی دزیكردن لە قەزاكانی سۆران و رواندز تۆمار كران، بەتایبەتی لە سەنتەری قەزای رواندز، ئەوەش وای كرد كە دڵەراوكێیەكی زۆر لەناو خەڵكی قەزاكەدا پەیدا ببێت، بۆ ئەم مەبەستە تیمێكی تایبەت لەناو بەشی پۆلیسی سۆران بە هاوكاری پۆلیسی قەزای رواندز دوای پازدە رۆژ توانیان دزەكان دەستگیر بكەن، ئەوەش لە رێگەی كامێراكانی چاودێرییەوە بوو، جگە لەوەی خەڵكیش هاوكار بوو، دزەكان بە رۆژ و بە لێزانانە دزیەكەیان ئەنجام داوە، 53 ملیۆن دیناری عێراقی و 87 مسقاڵ زێڕ و 30 هەزار دۆلاریان بردبوو.
مقەدەم محەمەد عەلی، گوتیشی:” ئەو كەسانەی لەسەر دزی گیراون، خەڵكی ئیدارەی سۆران نین، بەڵكو هەموویان خەڵكی دەرەوەی سنوورەكە بوون، داوای ئێمە لە هاووڵاتییانی ئیدارەی سۆران ئەوەیە كامێراكانی چاودێری لە ماڵەكانیان دابنێن، هەروەها داوا لە هاووڵاتییان دەكەین دەرگا و پەنجەرەكانیان دابخەن، لەگەڵ ئەوەی كار دەكەین بۆ ئەوەی لەرێگەی قایمقامەكانەوە لیستی ناوی ئەو كەسانەی كە كاری فرۆشتنی كەلوپەل و سەوزە و میوە لە كۆڵانەكان دەكەن ئامادە بكەین.
بەڕێوەبەری بەشی نەهێشتنی تاوان لە سۆران، ئاشكراشی كرد:” لە سنووری ئیدارەی سۆران رێژەی دزی و تاوان زۆر كەم بووە، ئەوەش بەراورد بە ناوچەكانی دیكە، ئەمەش بۆ چاوكراوەیی خەڵك و پۆلیس دەگەڕێتەوە، بەتایبەتی خەڵك لەگەڵ ئێمە زۆر هاوكارە، ئەمەش جێگەی دەستخۆشییە، لەگەڵ ئەوەی ژمارەی بەشی تاوان 144ـە هاووڵاتییان هەر حاڵەتێك ببینن دەتوانن پەیوەندی بەو ژمارەیەوە بكەن كە 24 كاتژمێر كراوەیە، شوێنی راگرتنی راگیراوانی سۆرانیش زۆر گونجاوە.
مقەدەم محەمەد عەلی، بەڕێوەبەری بەشی نەهێشتنی پۆلیسی تاوانی سۆران، زیاتر دەڵێ:” پلان هەیە كامێراكانی چاودێری زیاتر بكەین، هەروەها لیژنەیەكمان هەیە بەهەماهەنگی لەگەڵ پۆلیسی تاوان و پۆلیسی ناو شار و ئاسایشی ناوشار لەژێر سەرپەرشتی قایمقامی قەزای ناوەندی سۆران كار دەكەن و رۆژانە سەردانی بازاڕ و شوێنە گشتییەكان دەكەن، ئەوانەی مۆڵەتیان هەیە و ئەوانەشی مۆڵەتیان نییە لەسەریان پێویستە كامێرای چاودێری ببەستن بە كواڵێتی باش، هەر بۆ ئەم مەبەستە ئەمساڵ بەڕێژەیەكی باش كامێرای چاودێری دانراوە و زۆربەیان پابەند كراون بەدانانی كامێرای چاودێری، هاوكات رێگری كردن لە تاوانیش لەرێگەی دانانی كامێرای چاودێری هۆكارێكە بۆ ئەوەی لە بازاڕ رێژەی دزی و تاوان كەم ببێتەوە، لەبەر ئەوەی هیچ تاوانبارێك ناتوانێت دزی بكات و دەربازی ببێت، دەرچوونی تیمەكانمان بە جلی مەدەنی ئەوەش وایكردووە ئەوانەی كە نیازی ئەنجامدانی تاوانیان هەیە نەتوانن تاوان ئەنجام بدەن، هەروەها لە ئێستادا فەرمانێك هاتووە دەبێ سەرجەم فەرمانگەكان كامێرای چاودێری لە فەرمانگەكانی خۆیان ببەستن بەشێكی زۆریش لە فەرمانگەكانی ئیدارەی سۆران كامێرای چاودێریان داناوە، هەروەها داواش لە هاووڵاتییان دەكەم نەكەونە ژێر كاریگەری ئەو پڕوپاگەندەی كە لە رێگەی تۆڕە كۆمەڵایەتییەكانەوە دەكرێت”.