چاودێرێكی سیاسی: یەكێتی ناخوازێت كوردستان ئارام بێت، هەمیشە حەز دەكات كێشە و ئالۆزی هەبێت

مامۆستایەكی زانكۆ: پارتی خۆی بە خاوەنی كوردستان دەزانێت و خۆی ناكاتە ركابەری حزبێك كە هیچی نەبێت لە دەست بدات !

زاری كرمانجی – سۆران:

یەكێتیی نیشتمانی كوردستان لەپێناو گەیشتن بە ئامانجەكانی و بەدەستهێنانی چەند دەستكەوتێك، بەردەوام هەڕەشەی دوو ئیدارەیی و تێكدانی دۆخی كوردستان دەكات.
یەكێتی نیشتمانی كوردستان وەك پیشەی سەرەكی خۆی، لە سۆشیال میدیا و تیڤییەكان هەوڵی ناشیرینكردنی حكوومڕانی كوردستان دەدات و هێڵی سوور و ستۆپ بۆ پارتی دادەنێت، ئەمە لە كاتێكدایە، هەمیشە پارتی لە مافی خۆی خۆش بووە و بە یەكێتی داوە، مامۆستایەكی زانكۆش، دەڵێت:” پارتی خۆی بە خاوەنی كوردستان دەزانێت، خۆی ناكاتە ركابەری حزبێك كە هیچی نەبێت لە دەست بدات!.
د. رێبین سەلام، چاودێری سیاسی، بە زاری كرمانجی گووت:” سەرجەم كوردستانیان لەوەدا هاوڕان كە پێویستە یەك دەنگ بن لەو وێستگە سیاسییانەی كە كوردستان پێویستیەتی، بەڵام بە داخەوە لە دوای رووداوەكانی 16 ی ئۆكتۆبەر و خۆبەدەستەوەدانی برادەرانی یەكێتی لەو وێستگانەدا كە كوردستان پێویستە یەك دەنگ و هاوڕا بێت لەبەر ئەو فڕەكوێخایەتیەی نێو یەكێتی نەك لەگەڵ پارتی دیموكراتی كوردستان یەكڕیزی پێ نەهاتەدی، بەڵكو لەناو خودی خۆیان یەك دەنگ نەبوون، بابەتی سەرۆككۆمار دیارترین بەڵگەیە كە نەیان توانی یەك بەربژێر دیاری بكەن .
زیاتر گووتی:” بەشداری نەكردنی جێگری سەرۆكوەزیران لە كۆبوونەوەكانی ئەنجوومەنی وەزیران، لەبەر هەندێك تەنگژەی كەسیی، حزبی و ئەمنی خۆیانە نەك گلەیی و گازندە لە پارتی، ئەو قسانەی یەكێتی و سەرۆكەكەی لە میدیاكان دەیكات، تەنها بۆ تێكدانی ئەو ئارامیەی كوردستان و چاكسازییەكانی كابینەی نۆیەمی حكوومەتی هەرێمی كوردستانە .
د. رێبین سەلام، چاودێری سیاسی، گوتیشی:” یەكێتییەكان با دڵنیابن سەرۆكەكەیان ئەو قسانەی لەسەر پارتی دەیكات، تەنها بۆ شاردنەوەی ئەو شكەستانە و باڵ باڵێنەی لە نێو حزبەكەیە دەیكات، لە داهاتووش دەبینین كە دەنگی ئەو حزبە چۆن كەم دەكات و كورسی پەرلەمانی لە دەست دەدات، دڵنیاشین لەنێو خودی یەكێتی كەس باوەڕی بە سەرۆكی حزبەكە ناكات و ئەو قسانە دوورن لە راستی و سیاسەتی پارتی دیموكراتی كوردستان.
د. مەهدی ستوونی، مامۆستای زانكۆ، بە زاری كرمانجی گوت:” یەكێتی نیشتمانی كوردستان، لەم دووایانەدا تووشی شكەستێكی گەورە بووە، لە كوردستان داوای ئیدارە و دارایی سەربەخۆیان بۆ سلێمانی دەكرد، لەو بابەتەشدا هەموو خەڵك بینی داهاتی سلێمانی رۆژبەرۆژ كەم دەكات و نەیان توانی ئیدارەی ناوچەكە بدەن، سەرۆكی حكوومەت زۆر هەوڵی داوە چارەسەری سەرجەم كێشەكانی سلێمانی بكات، بەڵام بەهۆی نیەت پاك نەبوونی یەكێتی سەری نەگرتووە و وەناشیانەوێ چارەسەر ببێت.
د. مەهدی ستوونی، زیاتر گوتی:” یەكێتی زۆر جار لە میدیاكان هێڵی سوور بۆ پارتی دادەنێت و دەڵێن، ستۆپ بە پارتی دەكەین، بۆ زانیاری یەكێتی و سەرۆكەكەی، پارتی دیموكراتی كوردستان بە درێژای مێژوو هیچ هێزێك نەبووە بیوەستێنێت و ستۆپی پێ بكات، پارتی حزبێكی جەماوەری و نەتەوەییە و 76 ساڵە لە گۆڕەپانی سیاسی خزمەت و خەبات دەكات بۆ بەدیهێنانی مافە رەواكانی گەلی كورد و خاوەن سەرۆك و سەركردەی خۆیەتی ئەویش سەرۆك بارزانییە، وەسیلەیەكیش بووە بۆ بەدیهێنانی خەونی میللەتی كورد بۆ گەیشتن بە مافەكانمان، ئەگەر سەیری مێژووش بكەین بۆمان دەردەكەوێت كە پارتی چەند بەهێزە نەك یەكێتی ناتوانێ بیوەستێنێت، بەڵكو ئیمپڕاتۆری عوسمانییەكان، رژێمی بەعس و وڵاتان نەیان توانیوە بیوەستێنن .
ئەو مامۆستایەی زانكۆ، دووپاتی كردەوە:” پارتی خۆی بە خاوەنی كوردستان دەزانێت و حكوومڕانی كوردستان دەكات و هەریەك لە پۆستی سەرۆكی هەرێم و حكوومەتی بەدەستەوەیە و خۆی ناهێنێتە هەموو ئاستێك، بەڵام دەبێ یەكێتی ئەوە بزانێ سەردەمی 50 بە 50 تێپەڕیوە، پارتی خۆی ناكاتە ركابەری حزبێك كە هیچی نەبێت لە دەست بدات، چونكە یەكێتی ناخوازێت كوردستان ئارام بێت و حكوومڕانییەكی جوان هەبێت، هەمیشە حەز بە دروست بوونی كێشە و ئاژاوە دەكات، تا بارودۆخ لە هەمووان تێكبچێت، مەبەستیشیان لەمە بە دەستهێنانی چەند دەستكەوێتكە، بەڵام پارتی بەرپرسیارانە مامەڵە دەكات”.