نوسینی / هەرمن ئەحمەد
کەرکووکەكەم، تۆ كە خاوەنی ئەو کوڕە قارەمان و چاونەترسانە بیت، ناحەزان و نەیارانی کورد لە ئاستتدا دەلەرزن و گەنجە دلێرەكانیشمان ترپەی دڵیان ئاوازی سروودی ئەی رەقیب لێدەدات.
ئەی رۆڵەكانی كەركووك، لە ١٧ی بەفرانبار، لە ڕۆژی ئاڵای كوردستاندا بینیمان، لە ئاست بوێری و چاونەترسیتان، لە ئاستی فیداکاریتان، لە ئاستی قوربانیدانتان لەپێناو شەکانەوەی ئاڵاکەمان، لەپای بەرزکردنەوەی ئاڵای کوردستان لەسەر پەیکەری پێشمەرگەی كورددا کە هێمای بەرگریکردنە لە خاک و نیشتمان، ئەو رۆژە هەم ئازایی ئێوە و هەم ترسی دوژمنان و داگیركاران و كرێگرتەكانیشمان دیت لە شەكانەوەی ئاڵای كوردستان و لە ناوی پێشمەرگە و لە هیممەت و ورەی گەنجانی كوردی كەركووكی دڵی كوردستان.
من ئەو ڕۆژە لە برۆکسل، پایەتەختی یەکێتیی ئەورووپا، لە باڵەخانەی نوێنەرایەتیی حکوومەتی هەرێمی کوردستان، وتاری پیرۆزکردنی ڕۆژی ئاڵام دەخوێندەوە، ئێوەش لە پیرەشاری کوردان، کەرکووکی پڕ خەم و ئازار، شارە سوورەكەی دڵی كوردستان، شەڕی هەڵکردنی ئاڵای کوردستانتان دەکرد.
کەرکووک لەسەر بناغەی پێکەوەژیان و ئاشتیی نێوان نەتەوەکان بنیاتنراوە، لێ مەخابن ئەوانەی ئێستاكە بوونەتە دەسەڵاتداری ئەو شارە، نە دەزانن پێکەوەژیان چییە، نە خۆشەویستییان بۆ کەرکووک هەیە و نە دەزانن مرۆڤدۆستی و ژیاندۆستی چییە. چونکە ئەوان باش لەوە تێگەیشتوون، تووڕەیی گەنجانی گەرمیان سنووری نییە و شکۆی ئاڵا بۆ گەنجانی شاری کەرکووک ڕابوونی حەشر و قیامەتە و بە سەمفۆنیای نەبەردی بەدەم مەرگەوە دەڕۆن، سەمفۆنیای عەشقی خاك و پیرۆزیی خاك و بەرزیی ناوی پێشمەرگە.
نەیارانیش لەو ڕاستییە تێگەیشتوون، بۆیە هەرکاتێک بۆنەیەکی نەتەوەیی دەبێت، ترسنۆکانە هێزی سەربازی و هەمەڕ و لوولەی تفەنگەکانیان بەڕووتاندا بەرز کردەوە، ئەو هێزەی، كە هەمان هێز بوو لە شەو و رۆژێكدا بە چەك و تانك و زرێپۆشی سەردەم بەرامبەر بە هێزێكی تاریكپەرستی وەك داعش خۆیان رانەگرت و ڕایان كرد، وا ئێستا بە هەمان تانك و زرێپۆش بەرامبەر بە گەنجانی ئاشتیخواز و ژیاندۆستی كورد دەوەستنەوە، كە هیچ چەكێكیان پێ نییە، تەنیا ئاڵایەك و باوەڕ و ورەیەكی بەرز و دڵێكی ئازا نەبێ.
دەوڵەتی عێراق و شۆڤێنییەكان و داگیركاران لە هەموو سمبول و هێماکان و لە ئاڵاکەمان ئەترسن، چونکە دەزانن کورد لەپێناو سمبولەکانی نیشتمان رۆحی دەکاتە قوربانی.
ناحەقیی لە سیاسەت و سیستەمی حکوومەتی عێراق ئەوەی بۆ سەلماندووین کە ئەوان تەنیا زمانی هێزی توندوتیژی دەزانن، رەفتارە نادیموکراسی و نادادپەروەرییەکانیان سەلماندوویەتی کە هیچ لە کینەی ئەوان بەرامبەر بە کورد ناگۆڕێ، جاران جیهان بێئاگا بوو لەوەی کە کورد شەڕی مافەکانی دەکات، شەڕی وەدیهێنانی دیموکراسی دەکات، شەڕی پێگەی نەتەوەیی دەکات و ئەم هەموو مافانە کە کورد لە کەرکووک داوای دەکات، لای حکوومەتی عێراق و دیموكراسییەكەی و دادپەروەرییەكەی ئەو، داواو خواستی بەتاڵن.
چارەسەری دۆخی کەرکووک تەنیا لە ڕێگەی یەکگرتوویی و یەکڕیزیی حزبە سیاسییە كوردستانییەکان دەبێتە فاکتەرێکی بەهێز بۆ گەڕانەوەی دادپەروەریی سیاسی و کۆمەڵایەتی لە کەرکووک.
پێویستە ڕەوتە تاکەکەسی و گرووپە عێراقچییەکان و مەیل بۆ میلیشیاكان، دوور بخرێنەوە، چونکە ناتوانرێت لە هەمان کاتدا هەم عێراقچی بیت و هەمیش وەک فیگۆڕێکی نەتەوەیی کورد قسە بکەی.
بۆ گەڕاندنەوەی دیموگرافیای ڕەسەنی ئەو شارە، نەک هەر بە پێویستی دەزانم، بەڵکوو دەبێت ئەو فشارە سیاسی و کۆمەڵایەتییە دروست بکرێت کە کێ خاوەنی خاکە؟ لاپەڕەکانی مێژوو هەڵبدرێنەوە و کاری هاوبەش لەسەر دیموگرافیای ئەتنیکی و کولتووری پێکەوەژیان لەو شارە پێکبهێنێت، چونکە کەرکووک پایتەختی گەرمیان و دڵی کوردستانە.
