هەڵگۆرد شێخ نەجیب: یەکێک لە بەڕێوەبەری ناحیەکانی سنوورەکەمان دەكرێتە قایمقامی سیدەكان

موڕشید برادۆستی – سۆران
هەڵگۆرد شێخ نەجیب سەرپەرشتیاری ئیدارەی سەربەخۆی سۆران، بە زاری كرمانجی راگەیاند:” خۆشبەختانە دواجار رەزامەندی بە قەزا كردنی سیدەكان و بە ناحیە بوونی گوندی بەرمیزە لە سنووری ئیداریمان وەرگیرا، بەمەش ئاسانكاری زۆر بۆ دانیشتوانان دروست دەبێت و دەڤەرەكە ئاوەدانی باش بەخۆیەوە دەبینێت و پڕۆژەی گرنگی ستراتیژی لێ جێبەجێ دەكرێن، لە رۆژانی داهاتوو بە ئامادەیی تیمێك لە ئەنجوومەنی وەزیران و وەزارەتی ناوخۆ و بەرپرسانی دیكەی حكوومی و حزبی و دانیشتوانانی دەڤەرەكە، لە رێوڕەمسێكی شایستەدا بە قەزا كردنی سیدەكان بە كردەیی دەچێتە واری جێبەجێ كردن .
سەرپەرشتیاری ئیدارەی سۆران، دەڵێت:” گوندی نزاری كە پێشتر پێشنیازی بە ناحیە بوونی بۆ کرابوو، بەڵام بەهۆی ستراتیژیەتی گوندی بەرمیزە و بەرفراوان بوونی گوندەكە، بڕیاردرا بكرێتە ناحیە، لە داهاتوو كار لە سەر گوندی نزاری سیدەكان و شیوان و چەند شوێنێكی دیكەی سنووری ئیدارەمان دەكەین بۆ هێنانە كایەی قەزا و ناحیەی نوێ .
دووپاتی كردەوە:” پۆستی قایمقام پلەیەكی تایبەتیە و لیژنەیەك بۆ یەكلای كردنەوە پێكهاتووە و چەند پێشنیازێك هاتوونە، هەر بەهۆی دەست نیشتان كردنی قایمقامی قەزای سیدەكان رێوڕەسمی كردنەوەی دووا كەوتووە، بەڵام یەكێك لە بەڕێوەبەری ناحیەكانی سنووری ئیدارەمان بۆ پۆستی قایمقامی سیدەكان دیاری دەکرێت و دەکرێتە قایمقامی قەزاکە، ئەوكات بەڕێوەبەری ناحیەی بەرمیزەش دیاری دەكەین.
هەڵگۆرد شێخ نەجیب، گووتیشی:” بۆ سنووری ناحیەی سیدەكان و برادۆست، پلانی باشی ئاوەدان کردنەوەمان هەیە، ژمارەیەك پڕۆژەی گرینگمان جێبەجێ كردوون، هاوکات لە بواری رێگەو بان و خزمەت گوزاری دیکە پڕۆژەمان بۆ دەڤەرەکە دەبێت”.