گوشاری ئیسرائیل، هۆشداری ئەمریكا و پێداگری حزبوڵلا ئەم وڵاتە بەرەو كوێ دەبەن
وادەی دۆناڵد ترەمپ، سەرۆکی ئەمریکا بۆ داماڵینی چەک لە حزبوڵڵا نزیک دەبێتەوە
ئێستا لوبنان لە گۆڕەپانێکی چارەنووسسازدایە لە نێوان ئاشتی و شەڕدا. لەم هەلومەرجە سەختەدا، سەردانی پاپا لیۆی چواردەهەم، سەرۆکی کەنیسەی کاسۆلیکی بۆ لوبنان، ژیانێکی نوێی بەو وڵاتە جەنگاوەر بەخشیوە؛ وەستانێکی کورت لە گرژییەکان، لەگەڵ پەیامی ئاشتی کە بۆ گەلی لوبنانی هێنا.
لە لایەکی دیکەوە باس لە دەستپێشخەرییەکی دیپلۆماسی لەلایەن سعودیە و میسر لەگەڵ واشنتۆن دەکرێت؛ جگە لەوەش قەتەر هەوڵدەدات ڕۆڵی هەبێت لە چارەسەرکردنی قەیرانی لوبنان. بێگومان ئامانجی هەموو ئەو هەوڵانە پێشگرتنە لە شەڕێکی وێرانکەر کە ئیسرائیل هەوڵی سەپاندنی بەسەر لوبنان دەدات. لە هەمان کاتدا ئێستا ڕوونە کە تەلئەبیب بڕیاری خۆی بۆ شەڕ داوە، بەڵام کاتی ئەم شەڕە هێشتا پەیوەستە بە گڵۆپی سەوزی ئەمریکاوە.
ئەمە لە کاتێکدایە واشنتۆن پێشبینی دەکات لوبنان بڕیاری شەفاف و پلانێکی ڕوون بخاتەڕوو، لەگەڵ خشتەی کاتی دیاریکراو، نەک وادەی ناڕوون بەبێ بەرواری ورد. بەپێی پلانی ئێستا 31ی کانونی یەکەم دوا وادەیە بۆ کۆکردنەوەی سەرجەم چەکی نایاسایی لە باشووری ڕووباری لیتانی، دواتر نۆرەی باکووری لیتانی و ناوچەکانی دیکەی لوبنان دەبێت. بەڵام لێرەدا جەوهەری بابەتەکە ئەوەیە: ئەمریکا دەیەوێت لوبنان خشتەیەکی کاتیی ڕوون بخاتەڕوو کە وادەی وردی جێبەجێکردنی پلانی چەک لە دەستی حکومەت و دامەزراوە پەیوەندیدارەکانیدا بێت، لەکاتێکدا حکومەتی لوبنان هێشتا سەرکەوتوو نەبووە لە گرتنەبەری هەنگاوی پراکتیکی پێویست لەم ڕووەوە.
