زاری كرمانجی :
وڵاتی ئێران بۆ سێیەمین جار لە ماوەی تەنیا دوو مانگدا، لە رێگەی درۆن و مووشەك چەند كەمپێكی نیشتەجێبوون و بارەگای حزبەكانی رۆژهەڵاتی لە باشووری كوردستان كردە ئامانج.
دژە تیرۆری كوردستان لە پەیجی فەرمی خۆی لە تۆڕی كۆمەڵایەتی فەیسبووك رایگەیاند:” سوپای پاسدارانی ئێران جارێكی دیكە بنكە و بارەگاكانی حیزبەكانی رۆژهەڵاتی كوردستانی لە هەرێمی كوردستان كردووەتە ئامانج”.
بەرەبەیانی ئەمڕۆ 21 / 11 / 2022 ئێران جارێكی تر لە رێگەی درۆن و مووشەك بنكە و بارەگاكانی پارتەكانی رۆژهەڵاتی كوردستانی لە ناوچەكانی كۆیە و جێژنیكان و زڕگوێز كردە ئامانج، بە گوێرەی دواین ئامارەی قوربانییەكانی ئەو هێرشە پێشمەرگەیەكی حزبی دیموكراتی كوردستانی ئێران بە ناوی بەهزاد شەهید بووە.
حزبی دیموكراتی كوردستانی ئێران ڕاگەیەنراوێكی لەبارەی هێرشەكانی شەوی ڕابردوی سوپای پاسداران بۆ سەر بنكە و بارەگاكانی بڵاوكردەوە و ڕایدەگەیەنێت:” لە هێرشی ئەمجارە زیانمان نییە”.
لەڕاگەیەنراوەكەدا هاتوە،” نیوەشەوی ڕابردوو سوپای پاسدارانی ئێران بەموشەك و درۆن چەند بنكەیەكی حزبی دیموكراتیان لەنزیك كۆیەو جێژنێكان كردە ئامانج، ئەو هێرشە موشەكییە نوێیە بۆ سەر بنكەو بارەگاكانمان زیانی گیانی لێنەكەوتۆتەوە”.
بەڵام دواتر بەرپرسی دەزگای فەرماندەی هێزی پێشمەرگەی حیزبی دیموكراتی كوردستانی ئێران رایگەیاند، لە بۆردوومانەكەی كۆیەدا پێشمەرگەیەكمان بە ناوی بێهزاد ئیسكات ناسراو بە “چیاكۆ شەهید بووە.”
لای خۆشییەوە نەوید میھراوەر ئەندامی دەستەی كارگێڕی كۆمەڵەی زەحمەتكێشانی كوردستان بۆ دەزگاكانی راگەیاند قسەی كرد و دەڵێ:” خۆشبەختانە لەو هێرشەی ئێراندا زیانی گیانیمان نەبووە، تەنها زیانی ماددی زۆری لێكەوتووەتەوە”.
دوای هێرشەكەیان بۆ سەر بنكە و بارەگاكانی حزبەكانی رۆژهەڵات لە باشووری كوردستان، فەرماندەی گشتی هێزی وشكانی ئێران پەیامێكی توند ئاراستەی حزبەكانی رۆژهەڵات دەكات و دەڵێ:” یان كۆی بكەنەوە یان دەرچن، ئەگەرنا چاوەڕوانی هێرشی دیكەمان بن”.
محەممەد پاكپور فەرماندەی گشتیی هێزی وشكانی ئێران لەتویتێكی نوێدا راگەیاند، ” بنكەو بارەگاكانتان كۆبكەنەوەو دەرچن یان چاوەڕوانی هێرشی دیكەمان بۆ سەر بارەگاكانتان بن”.
