زاری كرمانجی – سۆران :
مەزڵووم عەبدی جەخت لەوە دەكاتەوە، پێویستە سووریا ببێتە وڵاتێكی لامەركەزی. دەشڵێت “كۆتایی هەموو شەڕێك دیالۆگە، بۆیە پێویست ناكات چیدیكە شەڕ بكەین.”
بەیانیی ئەمڕۆ چوارشەممە، 19ـی تشرینی دووەمی 2025، بە ئامادەبوونی مەسرور بارزانی، سەرۆكی حكوومەتی هەرێمی كوردستان؛ مەزڵووم عەبدی، فەرماندەی گشتیی هێزەكانی سووریای دیموكرات (هەسەدە) و دەیان سەركردە و بەرپرسی حكوومی و حزبیی عێراق و كوردستان؛ سێیەمین ڕۆژی شەشەمین كۆڕبەندی ئاشتی و ئاسایشی ڕۆژهەڵاتی ناوەڕاست (مێپس25) دەستیپیكرد.
مەزڵووم عەبدی لە سێیەمی ڕۆژی ئەم كۆڕبەندە، گوتارێكی پێشكەش كرد؛ تێیدا سوپاسی سەرۆك وەزیران مەسرور بارزانی و ڕێكخەرانی مێپسی كرد بۆ بانگهێشتكردنەكە. ئەو، خۆشحاڵی خۆی بە بەشداریكردن لە كۆڕبەندەكە دەربڕی و گوتی “زۆر بە گەرمی پێشوازیمان لێ كراوە.”
فەرماندەی گشتیی هەسەدە هیواشی خواست، ئەنجام و ڕاسپاردەكانی شەشەمین كۆڕبەندی مێپس لە شاری دهۆك، یارمەتیدەربن لە چارەسەركردنی كێشەكان و بەقەڕاركردنی ئاشتی لە ناوچەكە.
ڕێككەوتنی 10ـی ئادار و لێكەوتەكانی
مەزڵووم عەبدی لە بەشێكی قسەكانیدا باسی لە ڕێككەوتنی 10ـی ئاداری ئەمساڵ لە نێوان هەسەدە و حكوومەتی سووریادا كرد و گوتی “ئەو ڕێككەوتنەی لە 10ـی ئادار، لەگەڵ ئەحمەد شەرع، سەرۆك كۆماری سووریا واژۆمان كرد، ڕێگری لە ڕوودانی زۆر شت كرد. ئێمە لە نێو شەڕێكی سەختدا بووین، بەڵام بەهۆی ئەو ڕێككەوتنە، شەڕەكە وەستا. هەروەها ڕێگری لە دابەشبوونی سووریا و تۆڵەسەندنەوە لە نێوان پێكهاتەكانی هەموو پارێزگاكانی وڵاتەكەدا گرت، چونكە بەشێكیان پلانیان هەبوو دوای ڕووخانی ڕژێم، تۆڵە لە یەكدی بكەنەوە.”
بە گوتە عەبدی، بە درێژایی 100 ساڵی ڕابردوو لە سووریا، دان بە مافەكانی گەلی كورددا نەنراوە، تەنانەت باس لە پرسی كوردیش نەكرابوو، بەڵام لە ڕێككەوتنی 10ـی ئاداردا، بە ڕوونی باسی پرسەكە كراوە و جەخت لەوە كراوەتەوە، پێویستە مافەكانی گەلی كورد و هەموو پێكهاتەكانی سووریا، لە چوارچێوەی دەستووری نوێدا دەستەبەر و دابین بكرێن.
مەزڵووم عەبدی گوتیشی “دوای 15 ساڵ لە شەڕ، پێویستە سووریا ببێتە دەوڵەتێكی نانەوەندی (لامەركەزی) و هەرێمەكان حوكمی خۆیان بكەن. ئەمە ڕاستییەكە كە ڕوویداوە و ناتوانین نكۆڵی لێ بكەین. ئێمە ناچارین ئەم ڕاستییە قبووڵ بكەین و بەپێی ئەو ڕاستییە كار بكەین.”
“كۆتایی هەر شەڕێك دیالۆگە”
فەرماندەی گشتیی هەسەدە ڕایگەیاند “ماوەیەكی زۆر درێژە لە نێو شەڕداین، زۆر باش دەزانین و بینیمان، كۆتایی هەر شەڕێك دیالۆگە، كێشەكان بە دیالۆگ چارەسەر دەكرێن. لە شەڕدا ئەگەر سەركەوتنیش بەدەستبهێنیت، هەر دەبێت دیالۆگ بكەیت. ئەمەمان بە شێوەیەكی زۆر چالاك لە سووریا بینی.”
مەزڵووم عەبدی هۆكاری ڕووخانی ڕژێمی پێشووی بەشار ئەسەدی ئاشكرا كرد و باسی لەوە كرد “هۆكاریی سەرەكیی ڕووخانی ڕژێمی بەشار ئەسەد، ڕەتكردنەوەی دیالۆگ و سووربوون بوو لەسەر سیستەمی مەركەزی، بینیمان دواتر كە چۆن شۆڕشێك لە دژی هەڵگیرسا و لەنێوچوو. “
بە گوتەی عەبدی ئێمە لە سەرەتای ڕاپەڕینەكانی سوریا، لە سەرەتای شۆڕشەوە، دژی شەڕ بووین. تا ناچاركراین شەڕ بكەین، شەڕمان نەكرد. تا مەترسیمان لەسەر نەبوو، شەڕمان نەكرد. ئێمە تەنیا پارێزگاریمان لە خۆمان كردووە. ئێستا ڕێگەی دیالۆگمان هەڵبژاردووە و پێویست ناكات چیدیكە شەڕ بكەین. ئەمە بۆچوونی ئێمە و هەموو گەلی سووریایە، چونكە بە شەڕ كێشەكان چارەسەر نەكرێن.”
پرۆسەی ئاشتی لە توركیا و پشتگیریی سەرۆك بارزانی
فەرماندەی گشتیی هەسەدە پشتیوانیی خۆی بۆ پرۆسەی نوێی ئاشتی لە باكووری كوردتسان و توركیا دووپات كردەوە و گوتی “ئەوەی لەدەستمان بێت بۆ سەرخستنی پرۆسەكە ئەنجامی دەدەین.”
عەبدی سوپاسی سەرۆك بارزانی كرد و گوتی “15 ساڵە بەرپرسانی هەرێمی كوردستان پشتگیریی ڕۆژئاوای كوردستان دەكەن؛ ئەم پشتگیرییە بە شێوەیەكی تایبەت لە جەنابی سەرۆك مەسعود بارزانیدا دەبینین. هەروەها بەم دواییانەش، پشتگیری گفتوگۆكانی نێوان بەڕێوەبەرایەتیی خۆسەر و حكوومەتی سووریا و پڕۆسەی ئاشتیشیان لە باكووری كوردستان كردووە و لەو بڕوایەداین ئەم پشتگرییە سوود بە هەموو لایەك دەگەیەنێت و ئەنجامەكانی زۆر ئەرێنی دەبن.”
