ن/ گولستان بەهجەت
هەر چەندە هەڵبژاردن پرۆسەیەكی ئاڵۆزی ژمارەیی ماتماتیكییە، لە هەمانكاتیشدا پڕ لە تاكتیك و پلانە، بەڵام پارتی دیمۆکراتی کوردستان بەرنامە و کاری جیاواتری هەیە لە حزبەکانی تر بۆ خزمەتی کوردستان، هەروەک دەبینین هەڵبژاردن دوای هەڵبژاردن ڕێژەی دەنگەكانی زیاد دەكات، کەچی لە لایەکی دیکەشەوە حزبەكانی دیكەش تاكتیكیان هەیە ئەی بۆ ناتوانن شان لە شانی پارتی بدەن و هەر لە شکستن؟ .
چەند هۆكاری زەق هەن بە بیر كردنەوەیەكی سادە و تێڕامانێكی ڕوكەشیانە بۆ هەموو تاكێك ڕوون دەبێتەوە كە هۆكارەكان چین، خۆ ئەگەر كەسێك رووبچێتە قوڵایی مێژوو یا خوێندنەوەیەكی زانستیانەی بۆ بكات بە دڵنیاییەوە دەیان هۆكاری سەركەوتنەكانی پارتی بەدی دەکرێت، لێرەدا با بە شێوەیەكی ئەکادیمی هەندێك هۆكار بخەینە بەردید، پارتی حزبێكی دامەزراوەییە و بۆ هەر بابەت و بوارێك نوسینگە یا مەكتەب و ناوەندێكی بەڕێوەبردن و ئاراستە كردنی هەیە، تەواوی بوارەكانی پەیوەندار لەلایەن ئەو دامەزراوەیە توێژینەوە و بەدواداچوونی بۆ دەكرێت، هەموو ئەگەرەكان دەخرێنەڕوو و ئامادەكاریشیان بۆ دەكرێت، هەمیشە زیاتر لە پلانێكی هەیە، بە جۆرێک چۆن و چەند لە سوودی نەتەوە، نیشتیمان و خۆی دابێت.
پارتی وەك ئامراز نا بەڵكو لە ستراتیژی دوور مەودا، هاووڵاتی و کوردستانیانی كردۆتە سەنتەری هەموو بوارە خزمەتگوزاری، سیاسی و ئایدۆلۆژییەكان و ئامانج و تێكۆشانی بۆ ئەوەیە، هاووڵاتی كوردستانی خاوەن شكۆبێت، پلە دوو و سێ نەبێت، ژێر دەستە نەبێت، ئازاد، سەربڵند و پڕ هیوا بێت، كار لەسەر بنیادنانی مرۆڤێكی پڕداهێنان و سەردەمیانە دەكات بە پاراستنی ئیرادە وكەسایەتی خۆی. ئەمەش وای كردووە پارتی لە پانتایی سیاسی و حزبیدا لە هەموو لایەنەكانی دیكەی كوردستان، عێراق و رۆژهەڵاتی ناوەڕاست زیاتر كەسایەتی و بیروڕای جیاواز، نەتەوە، ئاین و مەزهەبی جیای لێ كۆببێتەوە، واتە خاوەن ئایدۆلۆژیا یا پلانێك نییە چینێك یا توێژێك بكاتە قوربانی ئەوانی دیكە، بە پێچەوانە هەموو هاونیشتیمانییەك لەم وڵاتە دەتوانێت رۆئیا و خەونەكانی لە چوارچێوەی پلان و بەرنامەكانی پارتی ببینێت و هەوڵیان بۆ بدات، ئەمە كڕۆكی سەرەكی سەركەوتنی پارتییە.
یەكێكی دیكە لە نهێنییەكانی سەركەوتنی پارتی خۆبەخاوەن زانینی راستەقینەی نیشتیمان و هەموو تاكێكی ناو ئەم كیانەیە دەزانێت، بۆیەش بە درێژایی مێژوو پارتی لە هەموو بەشەكانی كوردستان خوێنی لە پێناو ئازادی رشتووە.
باكوور، رۆژهەڵات و رۆژئاوا بۆ پارتی جیاوازی نەبوو. ئەو تیمەی پارتی ناردوونی بۆ ناو حكومەت هەمیشە لە كەسانی پسپۆڕ، خاوەن ئیرادە و بڕیار پێكهاتوون، بۆیەش هیچ كۆسپێك نایان وەستێنێت، بەڵێنی بێ كردار و مەحاڵ نادەن.
كابینەی نۆیەمی حكومەتی هەرێمی كوردستان باشترین نموونەی سەركەوتنەكانی تیمی پارتین لە ناو كابینەكە، دەیان پڕۆژەی گرینگ و ستراتیژی كە ژێرخانی دەوڵەتمەداری بەهێز دەكەن خرانە بواری جێبەجێ كردنەوە، پڕۆژەكانی، رووناكی، هەژماری من، ئاسایشی خۆراك، ئاسایشی ئاو، كشتو كاڵ، گەشتو گوزار، رێگاو بان، خوێندنی سەردەمیانە، بە ئەلكترۆنی كردنی دامەزراوەكانی حكومەت، بنیاد نانی ناوچە پیشەسازییەكان،
هەمە چەشنكردنی داهاتەكان و هەوڵدان بۆ بنیادنانی هێزێكی نیشتمان، لەسەرووی ئەمانەشەوە دابینكردنی ئارامی و ئاسایش بۆ هاوڵاتییان دەستكەوتی مەزنی بێ وێنەن، بە تایبەتی لە وڵاتانی رۆژهەڵاتی ناوەڕاست كە رووبەڕووی قەیرانی لە دوای قەیران دەبنەوە، هەرێمی كوردستان رۆژ لە دوای رۆژی قەیرانەكان بەجێ دێڵێت و چارەسەریان دەکات.
خۆ ئەگەر دژایەتی كردنی هەرێمی كوردستان لە لایەن حكومەتی فیدڕاڵەوە نەبایە و وڵاتانی هەرێمی هانی چەند لایەنێكیان نەدابا بۆ نانەوەی پشێوی و رێگری كردن، بە دڵنیاییەوە ئێستا باشووری كوردستان لە هەموو روویەكەوە زیاتر پێش دەكەوت. بۆیە كاتێ پارتی دەچێتە پرۆسەی هەڵبژاردنەوە بە هەگبەیەكی پڕەوە رووبەڕووی نەیارانی ناوخۆ و دەرەكی دەبێتەوەو هەمیشە براوەیە.
تێپەڕاندنی یەك ملیۆن دەنگ لە هەڵبژاردنی رۆژی 11-11-2025 بۆ خولی شەشەمی ئەنجوومەنی نوینەرانی عێراقی فیدراڵ نموونەیەكی زەق و سەرکەوتنێکی نایاب و دیارە لە مێژووی کورد و کوردستان.
