محەمەد ئامۆكەیی- زاری كرمانجی:
یەكێك لەو پرسانەی كەبووەتە جێگای قسە لەسەركردن كۆچی بە لێشوای گەنجانی كوردستانە بۆ دەروەی وڵات، ئەم كۆچە تاچەند كاریگەری دەبێت لەسەر ئاسایشی كۆمەڵایەتی؟ چالاكوانان ئاماژە بەوەدەكەن ئەم خەمێكی گەورەی هەردوو رەگەزە و پێیان وایە دەبێت كاری زیاتر بكرێت بۆ رێگری لەم كۆچە، باس لەوەش دەكەن دەركەوتنی سەرۆكی حكوومەت لە ئیڤێنتەكانی تایبەت بەگەنج بۆ ئەوەیە لە خەمی ئەوان تێ بگات.
حەفسە مەولوود، ماوەی چەند ساڵێكە وەك چالاكوانێكی كۆمەڵگەی مەدەنی رۆڵی هەیە لەسەر ئەم پرسە بۆ چوونی خۆی دەربڕ دەبڕێت و روونی دەكاتەوە ئەم كۆچە كاریگەری زۆری دەبێت لەسەر كەمبوونەوەی پڕۆسەی هاوسەرگیری وەك باسی دەكات” كۆچی گەنجان یەكێكە لە پرسە هەرەگەرمەكانی ئەمڕۆی كۆمەڵگەی كوردستانی و بووەتە بابەتێكی مەترسی داری كۆمەڵگەو خێزانی كوردستانی بەجۆرێك كاریگەری لەسەر زۆر لە پرسەكان داناوە، لەو پرسانەش پڕۆسەی هاوسەرگیریی و پێكهێنانی خێرانە كە لە دوولاوە كاریگەری ناوەتەوە، ئەو گەنجەی سەڵتە كە كۆچ دەكات وڵات جێ دێڵێیت كاریگەری دەبێ لەسەر پڕۆسەی هاوسەرگیری، ئەو كەسەی خێزانداریش بێ شیرازەی خێزان و سیستەمی هاوسەرگیری لێك هەڵدەوەشێنێتەوەو دەیخاتە بەردەم چەندین ئەگەری نەخوازراو تا ئاستی لێدابڕان و جیابوونەوە، ئەم پرسە كاریگەری زۆری لەسەر ئاسایشی كۆمەڵایەتی داناوە و كۆمەڵگەی كوردستانی خستۆتە نێو چەندین گرفت و رووداوی نەبیندراو و هەست پێنەكراو بە رادەیێ تاكەكانی نێو خێزان و كۆمەڵگا پێیەوە دەناڵێنن و دەتلێنەوە و بوونەتە ئازار چێشتەی دەستی كۆچ و جێهێشتنی وڵات، بەتایبەتیش كۆچی بە نایاسای و سنوور بەزاندنی وڵاتان و نێودەریاكان وەك ئەو كارەسات و تراژیدیای ئەو كۆچانەی دەیبینین”.
لیا سەیفەدەین، چالاكوانێكی تری كۆمەڵگەی مەدەنییە جەخت دەكاتەوە ئەم كۆچە بەتەنیا خەمی رەگەزی پیاو نیە بەڵكو خەمی سەرەكی ئافرتیشە رایدەگەیەنێت” ئەم دوو رەگەزە دوو پێكهاتەی گرنگی دامەزراوەی خێزان و كۆمەڵگەن، دواجاریش كاریگەری فرە رەهەندی هەبووە لەسەر ئاسایشی خێزان و ئاشتەوایی كۆمەڵایەتی بەگشتی، بۆیە كۆچی گەنجان لەبنەڕەتدا بووەتە هۆكاری كەمبوونەوەی هێزی لاوان لە نێو كۆمەڵگەدا، دەكرێت ئەم كۆچە كاری جدیتری لەسەر بكرێت دۆخی لاوان بە ئاراستەیەكی باشتر بڕوات، خۆشبەختانە لەم ماوەیە جەنابی سەرۆك وەزیران مەسرور بارزانی چەندین دیدار گەنجانی هەبووە لە گەڵیان كۆبۆتەوە و بەشداری ئیڤێنتەكانیان دەكات ئەمەش دەستپێكێكی گرنگە.
