زاری كرمانجی – سلێمانی:
پاشنیوه‌ڕۆی ئه‌مڕۆ شه‌ممه 2022.11.19 به‌ڕێز نێچیرڤان بارزانی، سه‌رۆكی هه‌رێمی كوردستان، له سلێمانی به‌شداری له پرسه‌ی قوربانییانی ئه‌و ڕووداوه دڵته‌زێنه‌دا كرد كه شه‌وی پێرێ پێنجشه‌ممه 2022.11.17 به‌هۆی ته‌قینه‌وه‌ی تانكییه‌كی گازی شل، پازده كه‌س گیانیان له ده‌ست دا و ژماره‌یه‌كی دیكه‌ش بریندار بوون.
له پرسه‌كه‌دا سه‌رۆك نێچیرڤان بارزانی، سه‌ره‌خۆشی له خێزان و كه‌سوكاری قوربانییان كرد و هاوسۆزی و هاوخه‌میی قووڵی خۆی له‌گه‌ڵیاندا ده‌ربڕی، هه‌روه‌ها هیوای خواست خوای مه‌زن گیانی قوربانییان به به‌زه‌یی و میهره‌بانیی خۆی شاد بكات و ئارامی و دڵنه‌وایی به خێزان و كه‌سوكاریان و هه‌موو لایه‌ك ببه‌خشێت.
پاشان به‌ڕێز سه‌رۆكی هه‌رێمی كوردستان، له نه‌خۆشخانه‌ی شار برینداران و به‌ركه‌وتووانی ڕووداوه‌كه‌ی به‌سه‌ركرده‌وه و له نزیكه‌وه به‌دواداچوونی بۆ ڕه‌وشیان كرد، هه‌روه‌ها هیوای زووچاكبوونه‌وه‌ی بۆ خواستن و ئاماده‌یی بۆ پێشكه‌شكردنی هه‌موو هاوكاری و پێویستییه‌ك بۆ چاره‌سه‌ركردنیان ده‌ربڕی.
دواتر له وه‌ڵامی ڕۆژنامه‌نووساندا باسی سه‌ردانه‌كه‌ی بۆ سلێمانی كرد و گوتی: “هاتنی ئێمه بۆ شاری سلێمانی، به‌مه‌به‌ستی سه‌ره‌خۆشی بوو له كه‌سوكاری ئه‌و قوربانییانه‌ی به‌هۆی كاره‌ساتێكه‌وه له‌و شاره ڕوویدا. به ڕاستی كاره‌ساتێكی گه‌وره بوو، هه‌موو كوردستان هه‌ر له زاخۆ تا ده‌گاته خانه‌قین و هه‌موو شوێنه‌كانی هه‌رێمی كوردستان و هاووڵاتیان له ده‌ره‌وه و ناوه‌وه، هه‌موومان خه‌مبار بووین و هه‌ر یه‌ك له ماڵی خۆیه‌وه خاوه‌نی ئه‌م پرسه‌یه.”
هه‌روه‌ها گوتی: “ئه‌مڕۆ ئێمه بۆ ده‌ربڕینی سه‌ره‌خۆشی هاتووین بۆ شاری سلێمانی له‌گه‌ڵ جه‌نابی پارێزگار به‌شداریمان كرد له‌و ڕێوڕه‌سمه‌دا و په‌یامی سه‌ره‌خۆشیی خۆمان پێگه‌یاندن. ڕووداوێكی ناخۆش بوو، هه‌ر به‌م بۆنه‌وه ده‌مه‌وێ سوپاسی جه‌نابی پارێزگار بكه‌م بۆ ئه‌وه‌ی ئه‌مڕۆ گوێبیستی بووم كه به‌وپه‌ڕی هه‌ستكردن به به‌پرسیاریه‌تی كه هه‌موویان شاهێدی ئه‌وه‌ن هه‌م جه‌نابی پارێزگار و هه‌م نه‌خۆشخانه‌ی شار و دكتۆر و هه‌موو ستافی نه‌خۆشخانه، به‌رگریی شارستانی، پۆلیس، شاره‌وانی، ئاسایش و خه‌ڵكی خۆبه‌خشی ئه‌م شاره هه‌ر هه‌موویان، ئه‌ركی خۆیان به‌جێهێناوه.”
هه‌روه‌ها گوتی: “ئه‌م ڕووداوه سۆزێكی له‌سه‌ر ئاستی هه‌موو كوردستان دروست كرد كه ئه‌مه جێی شانازییه بۆ هه‌موومان كاتێك ڕووداوێكی وا ڕووده‌دات هه‌موو به‌یه‌كه‌وه هه‌وڵ ده‌ده‌ین یارمه‌تیده‌ر بین. سوپاسی یه‌ك به‌یه‌كه‌یان ده‌كه‌م كه به‌شدار بوون و خزمه‌ت و كاریان كردووه و ده‌ستیان ده‌گوشم و سوپاسیان ده‌كه‌م. ئێمه هاوبه‌شی خه‌می ئه‌و خێزانه‌ین، هیوادارین حكوومه‌تیش به‌دواداچوونی پێویست بكات تا به وردی بزانین سه‌رچاوه‌ی كێشه‌كه له‌كوێ بووه و بۆچی ئه‌مه ڕوویداوه؟ بێگومان ئه‌وه ده‌بێت ببێته وانه‌یه‌ك تا هه‌وڵ بده‌ین له‌مه‌ودوا ئه‌و شتانه‌ی كه پێویسته بۆ هێمنایی و ئه‌منییه‌ت و سه‌لامه‌تی، وردتر له‌سه‌ری بوه‌ستین”.
له وه‌ڵامی پرسیارێكدا سه‌باره‌ت به بڕیاری به‌ڕێز سه‌رۆكی یه‌كێتیی نیشتمانیی كوردستان به قه‌ره‌بووكردنه‌وه‌ی ئه‌و خێزانه و هاریكارییه‌كانی سه‌رۆكایه‌تیی هه‌رێم بۆیان، به‌ڕێزیان ڕیگه‌یاند: “هه‌موومان ده‌بێت به‌شداری له‌وه‌دا بكه‌ین، ئه‌وه‌ی پێویست بێت بۆ ئه‌م خێزانه ئه‌نجامی بده‌ین و بێگومان حكوومه‌تیش ئه‌ركی خۆی جێبه‌جێ ده‌كات، هه‌ر كه‌سێكیش بیه‌وێت كاری خێرخوازی بكات، سه‌رۆكایه‌تیی هه‌ر حزبێك و هه‌ر كه‌سایه‌تییه‌ك بێت، ئێمه سوپاسیان ده‌كه‌ین، پێخۆشحاڵ ده‌بین”.
ده‌رباره‌ی هه‌ستی به‌ڕێزیان له به‌شداریكردنی پرسه‌كه و ڕێوشوێنه‌كان بۆ دووباره‌نه‌بوونه‌وه‌ی ڕووداوی هاوشێوه، سه‌رۆك نێچیرڤان بارزانی ئاشكرای كرد: “به ڕاستی ڕووداوێكی تا بڵێی ناخۆش بوو، ئه‌مڕۆ له كوردستان دوور له‌وه‌ی كه به‌پرسیاریه‌تیی من یان به‌رپرسیاریه‌تیی ئه‌وی دیكه چییه، هه‌موومان خه‌مبارین و ئه‌مڕۆ له هه‌موو ماڵێك تازیه هه‌یه و ئه‌و كاره‌ساته‌ی كه ڕوویدا، به ئه‌ركی خۆمان زانیوه سه‌ردانیان بكه‌ین تا له نزیكه‌وه بیانبینین، بێگومان هه‌رچییه‌كیش پێویست بێت بۆیان ئه‌نجام ده‌ده‌ین”.
له وه‌ڵامی پرسیارێكی دیكه ده‌رباره‌ی كێشه‌ی سووته‌مه‌نی، هه‌روه‌ها دوا بڕیاری سه‌رۆكایه‌تیی هه‌رێمی كوردستان ده‌رباره‌ی هه‌ڵبژاردن و واده‌ی ئه‌نجامدانی، به‌ڕێز سه‌رۆكی هه‌رێمی كوردستان گوتی: “مه‌سه‌له‌كه سه‌لامه‌تییه، بێگومان حكوومه‌ت لێكۆڵینه‌وه له‌و ڕووداوه ده‌كات و ده‌بێت ئه‌و هه‌نگاوانه‌ی كه پێویسته بۆ زیاتر پاراستنی سه‌لامه‌تیی هاوڵاتییان بنرێن، چونكه كاری حكوومه‌ت ئه‌وه‌یه كه خزمه‌تگوزاری بۆ هاووڵاتیانی هه‌رێمی كوردستان دابین بكات، بۆیه بێگومان وه‌ك هه‌ر شتێكی دیكه حكوومه‌ت له‌سه‌ر ئه‌م بابه‌ته ده‌وه‌ستێت و هه‌ڵوه‌سته‌ی له‌سه‌ر ده‌كات و هه‌رچی پێویست بێت له ڕێنمایی و گۆڕینی یاسا و هه‌رچییه‌ك پێویست بێت جێبه‌جێی ده‌كات.”
“سه‌باره‌ت به هه‌ڵبژاردن، پێشتریش وه‌ك سه‌رۆكی هه‌رێمی كوردستان به‌پێی ئه‌ركی خۆم نامه‌م بۆ په‌رله‌مانی كوردستان ناردووه و هیوادارم حزبه‌كان له‌سه‌ر ئه‌م بابه‌ته ڕێككه‌ون. ئێستا ته‌مه‌نی په‌رله‌مان درێژ كراوه‌ته‌وه بۆ ساڵێك و بێگومان ده‌بێت له ماوه‌ی ئه‌م ساڵه‌دا هه‌ڵبژاردن ئه‌نجام بدرێت”.
له وه‌ڵامی پرسیارێكی دیكه‌دا سه‌باره‌ت به چاره‌سه‌ركردنی كێشه سیاسییه‌كان به‌تایبه‌تی كێشه‌كانی نێوان پارتی دیموكراتی كوردستان و یه‌كێتیی نیشتمانیی كوردستان، سه‌رۆك نێچیرڤان بارزانی ڕایگه‌یاند: “ئه‌وه‌ی وه‌ك بنه‌ما ڕوون و ئاشكرایه، ئێمه به‌بێ ئه‌وه‌ی كه یه‌كده‌نگ بین، بێ ئه‌وه‌ی له‌گه‌ڵ یه‌كتر بین و بێ ئه‌وه‌ی كه ڕێك بین، ناتوانین هیچ ده‌ستكه‌وتێك بۆ ئه‌م هه‌رێمه و بۆ ئه‌م وڵاته به‌ده‌ست بهێنین. تاكه مه‌رجی سه‌ركه‌وتنمان یه‌كده‌نگییه. بێگومان ئێمه حزبی جیاوازین و حزبه جیاوازه‌كانیش بیروبۆچوونی جیاوازیان هه‌یه و ناكرێت ئێمه بڵێین ده‌بێت هه‌موومان وه‌ك یه‌كتر بیر بكه‌ینه‌وه.”
هه‌روه‌ها گوتی: “ئه‌وه‌ی گرنگه ده‌بێت یه‌ك شت له‌سه‌رووی هه‌مووانه‌وه بێت، ئه‌ویش ئه‌وه‌یه كه ده‌بێت به‌رژوه‌ندیی هه‌رێمی كوردستان له سه‌رووی هه‌موو حزبایه‌تی و هه‌موو شتێكه‌وه بێت. له‌و باوه‌ڕه‌دام ئێمه ده‌توانین كێشه‌كان چاره‌سه‌ر بكه‌ین و گه‌ر له به‌یاننامه‌ی كۆمیته‌ی ناوه‌ندیی پارتی دیموكراتی كوردستان دوای كۆنگره ورد ببنه‌وه، ده‌ڵێن لاپه‌ڕیه‌كی نوێ ده‌كه‌ینه‌وه و ده‌ست به دانوستان و سه‌ردانی حزبه‌كان ده‌كه‌ین و هه‌وڵی جددی ده‌درێت بۆ ئه‌وه‌ی هه‌موو كێشه‌كان به شێوه‌ی دیالۆگ و له‌سه‌ر مێزی گفتوگۆ چاره‌سه‌ر بكرێن. بێگومان سه‌ردانی یه‌كێتی و حزبه‌كانی دیكه‌ش ده‌كه‌ین”.
