زاری كرمانجی-سۆران:
بەهۆی ڕووداوێكی هاتووچۆ لە هاوینەهەواری بێخاڵ زیاتر لە 30 كەس بریندار بوون، زۆربەیان گەشتیاری شارەكانی عێڕاق بوون، بەپێی بەدواداچوونێكی زاری كرمانجی، سەرجەم بریندارانی رووداوەكە چارەسەریان بۆ كراوەو هیچ كامیان لە نەخۆشخانەكانی سۆران نەماون.
عەقید محسین تەحسین، وتەبێژی بەڕێوەبەرایەتی هاتووچۆی سۆران بە زاری كرمانجی راگەیاند:” ئێوارەی دوێنێ هەینی ئاگاداركراینەوە لەلایەن رێپێدراوی هاتووچۆ هۆگر ئەحمەد سەعید، لە هەبوونی رووداوێكی هاتووچۆ لە جۆری لادانی ئۆتۆمبێلی پاسی تایبەت بەگەشتیاران، لە رێگا و خۆ كێشان بە هەردوو ئۆتۆمبێلی جۆری (پیكاب نیسان دبل و ڤۆلكس واجن جیتە، مۆتێلێك لە هاوینەهەواری بێخاڵ”.
ئاشكراشی دەكات: ” لە ئەنجامی رووداوەكە 31 كەس بریندار بوون، زۆربەیان گەشتیاری ناوەڕاست و شارەكانی عێراق بوون، داواكاریشە لە شوفێران پابەندی یاساكانی هاتووچۆ بن، لە پێناو پاراستنی سەرو ماڵی خۆیان و هاووڵاتییان”.
لای خویەوە بەختیار یوسف، بەرپرسی راگەیاندنی بەڕێوەبەرایەتی تەندروستی سۆران، بە زاری كرمانجی گووت:” دوای گەیشتنی بریندارەكان بۆ فریاكەوتنی نەخۆشخانەی ئاشتی، رێوشوێنی پزیشكیان بۆ گیرابەر، هەروەها پێنج لە بریندارەكان رەوانەی هەولێر كران، ئەوانەی دیكەش چارەسەری پێویستیان بۆ ئەنجامدراو رەوانەی ماڵەوە كرانەوە”.
