زاری كرمانجی-سۆران:
ئێوارەی رۆژی پێنجشەممە 17/11/2022 بەهۆی لێچوونی غازەوە تەقینەوەیەكی گەورە لە ماڵێكی شاری سلێمانی روویدا، بەهۆیەوە 15 كەس گیانیان لە دەستدا و 12 كەسی دیكەیش بریندار بوون.
ئەمڕۆ بەیانی رۆژی شەممە رێكەوتی 19 / 11 / 2022 لە سەرجەم ناوەندەكانی خوێندن لە ئیدارەی سۆران، لە كاتی لێدانی زەنگی قوتابخانە، قوتابیان و مامۆستایان بە خولەكێك وەستان بۆ رووحی قوربانییانی رووداوەكەی سلێمانی و بە بەرز كردنەوەی وێنەكانیان هاوخەمی خۆیان دەربڕی بۆ قوربانییان.
هەر دوای ئەم كارەساتە دڵتەزێنە، هەر یەك لە نێچیرڤان بارزانی سەرۆكی هەرێمی كوردستان و مەسرور بارزانی سەرۆكی حكومەت، پرس و هاوخەمی خۆیان راگەیاند بۆ قوربانیانی كارەساتەكە، رۆژی دواتر ڕێبەر ئەحمەد، وەزیری ناوخۆ، بە نوێنەرایەتی سەرۆك وەزیرانی هەرێمی كوردستان سەردانی شاری سلێمانی كرد، مەبەست لەو سەردانە، زیاتر ئاگادار بوون بوو لەو كارەساتە، بە هاناوەچوونی لێقەوماوانی رووداوەكە.
لەلایەكی دیكەوە زاگرۆس فەتاح، ئەندامی مەكتەبی سیاسیی پارتی، بە نوێنەرایەتی سەرۆك بارزانی گەیشتە پارێزگای سلێمانی و بەناوی سەرۆك بارزانی سەرەخۆشی لە بنەماڵەی قوربانییانی تەقینەوەكە كرد و دووپاتی كردەوە كە سەرۆك بارزانی ئامادەیی بۆ هەموو هاوكارییەك بۆ حكوومەت و خانەوادەكەی دەربڕیوە.
جگە لە هاوخەمی هاونیشتمانیان، وڵاتانی بیانی و نەتەوە یەكگرتووەكانیش بە پەرۆشەوە نیگەرانی خۆیان لەم رووداوە دەربڕی و لە راگەیەندراوەكەدا كە لە هەژماری فەرمی یۆنامی لە تۆڕی كۆمەڵایەتیی (تویتەر) بڵاو كراوەتەوە: بیر و هۆش و نزامان لەگەڵ بەركەوتووانی تەقینەوە كارەساتبارەكەی تانكی غازە لە سلێمانی كە چەندان قوربانی لێ كەوتەوە. پرسە و سەرەخۆشی ئاراستەی خانەوادەی قوربانییان دەكەین و هیوای هەرچی زوو چاكبوونەوەش بۆ بریندارەكان دەخوازین، لەگەڵ دەستخۆشیمان لە هەوڵی بێوچانی فریاگوزاران.”
بۆ رێزگرتن لە قوربانییانی كارەساتی سلێمانی، كە لە نێویشیاندا مامۆستا و چەند قوتابییەكی تێدا بوونە قوربانی، بەیانی ئەمڕۆ لەكاتی لێدانی زەنگی قوتابخانەكان لە سەرجەم ناوەندەكانی خوێندنی ئیدارەی سۆران، پێش وانەی یەكەم خولەكێك وەستان بۆ رۆحی پاكی قوربانییەكان.
لەمبارەیەوە م. عەزیز سەعید، بەڕێوەبەری پەروەردەی قەزای ناوەندی سۆران، بە زاری كرمانجی راگەیاند:” لەسەر راسپاردەی د.ئالان حەمە سەعید، وەزیری پەروەردەی حكوومەتی هەرێمی كوردستان و بۆ رێزگرتن لە قوربانییانی كارەساتی سلێمانی، كە لە نێویشیاندا مامۆستا و چەند قوتابییەكی تێدا بوونە قوربانی، بەیانی ئەمڕۆ شەممە لەكاتی لێدانی زەنگی قوتابخانەكان لە سەرجەم ناوەندەكانی خوێندن لە سنووری پەروەردەكەمان، پێش وانەی یەكەم خولەكێك وەستان بۆ رۆحی پاكیان”.
هەر ئەمڕۆ 19-11-2022 تەرمی 14 كەس لەوانەی لە تەقینەوەكەی شاری سلێمانی گیانیان لە دەستدا لە رێوڕەسمێكدا لە شاری سلێمانی بە خاك دەسپێردرێن و تەرمی هاووڵاتییەكی رۆژهەڵاتی كوردستانیش دەگەڕێندرێتەوە بۆ زێدی خۆی.
زاری كرمانجی ناوی تەواوی قوربانییانی كارەساتە دڵتەزێنەكەی سلێمانی بڵاو دەكاتەوە:
1- چیمەن قادر عەزیز
2- بەهار قادر عەزیز
3- چیا مەزهەر عەبدولڕەحمان
4- رۆژان ئەنوەر سەلیم
5- محەمەد عەبدوڵا جەمیل
6- ژیلیا عەبدوڵا جەمیل
7- دانیار بەختیار قادر
8- داركۆ بەختیار قادر
9- زەند بەختیار قادر
10- میر بەهادین مەزهەر
11- لیا بەهمەن مەزهەر
12- باكۆ دانا عەلی
13- یانۆ دانا عەلی
14- ئارش فاتح محێدین
15- حسێن گۆڵكار
