ڕائیب زراری
دروشمی پارتی دیموكراتی كوردستان سازان، هاوسەنگی و هاوبەشییە بۆ خولی داهاتووی پەرلەمان، كارنامەیەكی تێروتەسەڵ و دەوڵەمەندە، هەموو مافە دەستووریی و یاساكانی خەڵكی كوردستان لە خۆ دەگرێت و خاڵ بە خاڵی لە بەرژەوەندی خەڵكی كوردستانە، ئەوەش وای كردووە چین و توێژە جیاوازەكانی كوردستان بە جۆش و خرۆشەوە پشتگیریی خۆیان بۆ لیستی پارتی دووپات بكەنەوە.
ئەمجارە لە بەرگێكی نوێدا بە دروشمێكی پڕ بەها و لە ژێر ناوی “هاوبەشی، هاوسەنگی و سازان” پارتی دیموكراتی كوردستان كار بۆ خاڵ بە خاڵی ئەجێنداكەی دەكات بە دیدێكی دووربینانە و بە پلانێكی سەركەوتوو، مەبەستی سەرەكیی پارتی لە هاوبەشی واتا پارتی باوەڕی هەیە بە هاوبەشبوون لە بڕیار و بەرنامەكان، هاوسەنگی لە ماف و بەهاكانی بنەڕەتی كە دەبێت لە هەموو جومگەكان بە شێوەیەكی یەكسان پارێزراو بێت، بۆ سازانیش دەبێت بەهۆی هاوكاری و یەكگرتوویی و گفتوگۆ بگەین بە ئامانج، بۆیە دەنگی زیاتر لە ملیۆنێك دەنگدەر بۆ خوێنی شەهیدان و خەباتی پێشمەرگەیە.
عێراقی تازە، واتە عێراقی دوای 2003 لەسەر بنەمای هاوبەشی، هاوسەنگی و سازان كە سێ جومگەی ئەساسینە بۆ بنیاتنانەوەی عێراقی نوێ، بەڵام پێكهاتەی زۆرینە لە عێراق، پێكهاتەكانی دیكەی فەراموش كردووە و ئەوەی پێی كراوە بەرامبەر بە پێكهاتەكانی دیكەی كردووە، ئێمە كێشەی مافمان هەیە، كێشەی دەستوورمان هەیە، لە كاتێكدا بەپێی دەستوور دەبێت هەموو پێكهاتەكان لە بڕیاردان بەشدار بن، ئێستا پارتی بە دروشمی هاوبەشی، هاوسەنگی و سازان بەشداری هەڵبژاردنی داهاتووی عێراق دەكات، ئەوانە بنەمان بۆ جێبەجێكردنی دەستوور، دەستووریش هەموو مافەكانی كوردی تێدا چەسپاوە، بەڵام بەداخەوە لە عێراقی ئەمڕۆدا ئێمە شەریك نین لە بڕیاردان، هەر ئەوەش هۆكار بووە كە تا ئێستا میللەتی كورد بە مافە ڕەواكانی خۆی نەگات، دۆخی عێراق ناسەقامگیری بەخۆیەوە ببینێت.
سێكوچكەی “هاوبەشی، هاوسەنگی و سازان” تەنیا دروشمی هەڵبژاردن نییە، بەڵكو چوارچێوەیەكی فیكرییە كە دەتوانێت عێراق لە قەیرانی شەرعییەت و ناكارامەیی دەربهێنێت، ئەگەر بەغدا بتوانێت لەسەر بنەمای ئەم سێ پڕەنسیپە هاوكاریی هەولێر بكات، ئەوا كورد نەك هەر مافە ڕەواكانی خۆی بەدەست دەهێنێت، بەڵكو عێراقیش دەبێتە وڵاتێكی سەقامگیرتر، هاوسەنگتر و ئامادەتر بۆ پێشكەوتن.
پارتی لە هەنگاوی داهاتووی پەرلەمانی عێراقدا دەیەوێ دەستوور لەسەر بنەمای هاوسەنگی، سازان و هاوبەشی پرۆسەی سیاسی عێراق ڕاستەرێ بكات، جەنابی سەرۆك بارزانی زۆرجار ڕاگەیاندووە نە لە دەستوور زیاترمان دەوێت نە بە كەمتر لە مافی خۆمان لە دەستوور ڕازی دەبین، لەم قوناغەدا دەبێت لەسەر هەموو كێشە هەڵپەسێردراوەكان بە جددی كار بكرێت بە تایبەتی كێشەی نەوت و گاز و ماددەی 140، كەواتە با دەنگی هەموومان بۆ لیستی 275ی پارتی دیموكراتی كوردستان بێت.
