چین و توێژەكان لەبارەی بە قەزا بوونی سیدەكان بۆچوونی خۆیان دەخەنەڕوو

موڕشید برادۆستی – سیدەكان:

ماوەی چەندین ساڵ بوو، هاووڵاتییان و دانیشتووانی دەڤەری برادۆست لە سنووری ئیدارەی سۆران، داوای بەقەزا كردنی ناحیەكەیان دەكرد، ئەمڕۆ مەسرور بارزانی سەرۆكی حكوومەتی هەرێمی كوردستان ئاواتی خەڵكی دەڤەرەكی هێنایە دی و لە رێگەی فەرمانێك سیدەكان كرایە قەزا و گوندی بەرمیزەش لە سنوورەكە كرایە ناحیە .
ئامانجی كابینەی نۆیەمی حكوومەتی هەرێمی كوردستان، خزمەتكردنی زیاتری هاووڵاتییان و دانیشتووان و شۆڕ كردنەوەی دەسەڵاتی كارگێڕییەكان و نەهێشتنی ڕۆتین و ئاسانكاری بۆ هاووڵاتییان، تەنها لە ماوەی ئەمساڵدا سۆران و زاخۆی كردوون بە ئیدارەی سەربەخۆ، هەریەك لە شارەدێی عەنكاوە و پیرمامیش لە هەولێر كران بە قەزا و لەم دوایانەشدا سیدەكان كرا قەزا و گوندی بەرمیزەش لە ناوچەكە كرایە ناحیە .
هۆشمەند برادۆستی چالاكوانێكی سیدەكانە و دەڵێت:” لە رووی جوگرافی و ئەو باگراوەندە مێژوویەی سیدەكان و دەڤەری برادۆست هەیەتی شایستەی بە قەزابوون بووە و خۆشبەختانە ئەمڕۆ بڕیاری لێدرا، ئەمەش جێگەی دستخۆشیە بۆ حكوومەتی هەرێمی كوردستان و پیرۆزە لە خەڵكی دەڤەرەكە .
زیاتر گووتی:” بە قەزا بوونی سیدەكان كارئاسانی زۆر بۆ دانیشتوانان دروست دەبێت و لەمەودووا بۆ رای كردن كار و بارەكانیان پێویست بە سۆران و شوێنەكانی دیكە ناكات و حكوومەت دەسەڵاتەكان بۆ ئەو ناوچەیە شۆڕدەكاتەوە، هەروەها ئەو رۆتینیاتەی پێشتر لە هاتووچۆ كردن و زەحمەتەی خەڵك دەبینی لەمەودووا نامێنیت، سەرجەم كارەكان لێرە ئەنجام دەدرێن.
ئەو چالاكوانه‌ گووتیشی:” چەندین ساڵە سیدەكان بە دەست نەبوونی خزمەتگوزاری دەناڵێنێت، بێگومان بە هێنانە كایەی قەزا بودجەی زیاتری دەبێت و پڕۆژەی زیاتری لێ جێبەجێ دەكرێت .
ئاواز شێرزاد ئه‌ويش چالاكوانێكى ترى سيده‌كانه‌ و به‌و شيێوه‌يه‌ بۆ زاری كرمانجی قسه‌ى كرد و گووتى:” سوپاس بۆ خوای گه‌وره‌، لە دوای هەوڵ و ماندووبوونێكی زۆر ره‌نج به‌ خه‌سار نه‌بووين و سيده‌كان بوو به‌ قه‌زا، له‌ ئێستادا زۆر دڵخۆشین بەو بڕیارە، چونكە سیدەكان هەموو مەرجەكانی بەقەزابوونی تێدابوو لەڕووی فراوانی رووبەڕی جوگرافیا و ژمارەی دانیشتوانان، گەشتیاری و سامانی ئاژەڵ و كشتوكاڵ و …هتد، جگە لەوەش خواستی تەواوی خەڵكی دەڤەرەكە بوو بۆ ئەوەی گرینگیەكی زیاتری پێ بدرێت لە ڕووی ئاوەدانی و فروانكردنی یەكەی كارگێڕی .
زیاتر گووتی:” سوپاسی سەرۆكی حوكمەت و سەرجەم ئەو لایەنە حزبی و حكوومی و ئەمنیانە دەكەین كە هاوكارمان بوون لە گەیاندنی پەیامەكە، هیوادارین بڕیاری بەقەزابوون هۆكارێك بێت بۆ ئەوەی سیدەكان بەرگێكی تری ئاوەدانی و خۆشگوزەرانی بكرێتە بەریەوە و خەڵك لە ڕووی ئەمنیشەوە دڵنیایی زیاتری بدرێتێ”.
لای خۆشیەوە، مامۆستا موسا داود ئەندامی دەستەی بە قەزا كردنی سیدەكان، بە زاری كرمانجی گووت:” بە هەست كردن بەرپرسیارەتی و زەروڕیەتی بوون بە قەزا، لە مانگی چواری ساڵی ڕابردوو، دەستەیەكی حەوت كەسیمان پێكهێنا و پڕۆژەیەكمان ئامادەكرد، داواكاری بەقەزابوونی سیدەكانمان پێشكەش بەڕێوەبەرایەتی ناحیەی سیدەكان و قائیمقامیەتی سۆران و نوسینگەی پەرلەمان و ئەنجومەنی پارێزگەی هەولێر و لقی 10ی سۆران و فەرماندەی هەڵگۆرد و ئیدارەی سۆران كرد، دواتر داواكاری دەستەی بەقەزاكردنی سیدەكان بە نوسرای فەرمی گەێنرایتە ئەنجومەنی وەزیران، هەموو هەوڵێكماندا بۆئەوەی سیدەكان لە ناحیەوە بكرێتە قەزا و خۆشبەختانە دوواجار پاڵپشت بەفەرمانی هەرێمی ژمارە(٣٢٩ لە ٤-١٠-٢٠٢٢) وەفەرمانی حكومەتی هەرێمی كوردستان ژمارە(٣٣٣٨لە١٦-١٠-٢٠٢٢) و دوابەدوای نووسراوی وەزرارەتی ناخۆ ژمارە (١٨٤٠٠لە٢٥-٨-٢٠٢٢)و وەنووسراوی ئیدارەی سەربەخۆی سۆران ژمارە (٣٧ لە ١٩-٦-٢٠٢٢) بڕیاری هێنانە كایە قەزای سیدەكان و بە ناحیەكردنی بەرمیزە درا .
زیاتر گووتی:” بەقەزاكردنی سیدەكان بڕیارێكی مێژوویی و دیاری جەنابی سەرۆك بارزانی بوو بۆ خەڵكی سیدەكان و برادۆست و سودی زۆری دەبێت بۆ بوژانەوە و ئاوەدانی ناوچەكە و كار ئاسانی زۆری ئیداریش بۆ كاروباری رۆژانەی هاووڵاتییانی دەڤەرەكەمان دروست دەبێت.
گووتیشی:” لێرەدا بەپێویستی دەزانم سوپاسێكی بێ پایانی سەرۆكایەتی هەرێمی كوردستان و سەرۆكی حكومەت و جێگری سەرۆكی پەڕلەمانی كوردستان و ئەندامانی پەرلەمانی كوردستان نووسینگەی سۆران وەیسی سعید و ارشد لۆلانی و ئەنجوومەنی پارێزگای هەولێر و سەرپەرشتیاری ئیدارەی سەربەخۆی سۆران كە ڕۆڵێكی زۆرباش و سەرەكیيان بینی، هەروەها بەڕێزان بەرپرسی لقی 10 و فەرماندەی فەرماندەیی هەڵگۆرد ئەوانیش ڕۆلی كارایان هەبوو وە زۆر سوپاسی بەڕێوەبەری ناحیەی سیدەكان و بەرپرسی لیژنەی ناوچەی سیدەكان دەكەین كە پاڵپشتیەكی باشی ئێمەی دەستەی بەقەزاكردنی سیدەكانیان دەكرد.
گووتیشی:” بەناوی دەستەی بەقەزاكردنی سیدەكان پیرۆزبایی لە سەرجەم دانیشتوانی سیدەكان و برادۆست دەكەین .