زاری كرمانجی – سۆرن
ڕێكخستنەوەی دەرمان و هاوردەكردنی دەرمانی كوالێتی بەرز و ڕێكخستنەوە و چاودێریی كۆمپانیاكانی تایبەت بە هاوردەكردنی دەرمان و شەفافكردنی زانیاری تایبەت لەسەر دەرمانەكە، یەكێك بوو لە هەنگاوە گەورە و جدییەكانی حكومەتی هەرێمی كوردستان لە كابینەی نۆیەم كە ئێستا كاری لەسەر كراوە و جێبەجێ دەكرێت.
بڕیاری یەكخستنەوەی نرخی دەرمان، لە مانگی تشرینی دووەمی ساڵی 2022، لە سەرتاسەری هەرێمی كوردستان دەستی پێ كرد و ئەمەش كاریگەرییەكی گەورەی لەسەر شەفافیەتی بەهای دەرمان و نەهێشتنی پاشاگەردانی لە نێو بازاڕ دەرمان هەبوو.
دكتۆر شێروان سادق، بەڕێوەبەری گشتیی كوالێتی كۆنتڕۆڵی دەرمان، بە پێگەی فەرمی حكومەتی هەرێمی كوردستان راگەیاند:”پێشتر لەبەر زۆری و بۆری و نەبوونی تۆماری كارگە و كۆمپانیا و بەرهەمە دەرمانییەكان، نەدەتوانرا نرخی دەرمان لە سەرتاسەری هەرێمی كوردستان یەكبخرێتەوە، بەڵام حكومەتی هەرێمی كوردستان لە ڕێگەی وەزارەتی تەندرووستییەوە وەك هەنگاوی یەكەم ئەم كارەی كرد و قۆناغی دووەمیش پێداچوونەوەیە بە نرخی دەرمان، ئێستا هاووڵاتیانی كوردستان لەسەر كیو ئاڕ كۆدی دەرمان هاووڵاتیان دەتوانن نرخە دیاریكراوەكەی لە لایەن حكومەتەوە بزانن و بەمەش هاووڵاتی چیتر لە لایەن فرۆشیاران و دەرمانخانەكانەوە پارەی زیادەیان لێ وەرناگیرێت”.
دەرمانەكان ستیكەری نوێی لەسەر دەدرێت و بڕیارە حكومەتی هەرێمی كوردستان چاودێرییەكی گەورە و جدی بخاتە سەر بازاڕی دەرمان بۆ ئەوەی بە هیچ شێوەیەك ساختەكاری لەم نرخە نەكرێت و سزای قورسیش هەیە بۆ ئەم مەبەستە تا هیچ كەسێك فێڵ لە هاووڵاتیان نەكات لە جۆر و كوالێتی دەرمان و نرخەكەی.
دكتۆر شێروان سادق راشیگەیاند: “لەبارەی كێشەی هاوردەكردنی دەرمانی قاچاخ، هەندێك هۆكاری بنچینەیی هەبوون لە كوالیتیی كۆنتڕۆڵ، وەك ئەوەی باسمكرد كە پشكنینی دەرمان دوادەكەوت و دەرمانی قاچاخ و یاسایی لە بازاڕدا تێكەڵ دەبوون، ڕۆتیناتی ڕێگەپێدان زۆر بوون، تا ڕێگەپێدان وەردەگیرا، خەڵك دەستی بۆ ڕێگە نایاساییەكان دەبرد، بەڵام وەك ئەوەی ئێستا باسمانكرد، ئێمە هاتین هۆكارەكانی پشت هێنانی دەرمانی قاچاخمان چارەسەر كرد، ئێستا دەرمانی پێویست بەشێوەی فەرمی هاوردە دەكرێت، تیمەكانمان بە هاوبەشی لەگەڵ هێزە ئەمنییەكان و ئاسایشی بازگە و خاڵە سنوورییەكان، وامان كرد بە شێوەیەكی توندتر ڕێوشوێن بگرینەبەر و چاودێری بكەین. بۆیە ڕێگرییەكی زۆر لە دەرمانی قاچاخ كراوە و ئێستا بە ئاستێكی بەرز كۆنتڕۆڵ كراوە”.
حكومەتی هەرێمی كوردستان لە پێناو خزمەتكردنی زیاتری هاووڵاتیان و چاودێریكردنی تەندرووستیان، بەردەوام هەنگاوی جدی هەڵدەگرێت و كاری گەورە دەكات و ئەمەش بە ئەركی خۆی دەزانێت و ئاسەوارەكانی ئەم كار و هەنگاوانەش لە ئێستاوە دەركەوتوون و لە ئایندەشدا زیاتر دەردەكەون.
