ئەمڕۆ یەكشەممە لە چەند ناوچەیەكی كەرتی غەززە، سوپای ئیسرائیل هێرشی كردووە و بەهۆیەوە چەند كەسێك كوژراون، ئەم هێرشەشانەش ئەوە دەگەیەنن كە رێككەوتنی ئاگربەست لە مەترسیدایە.
لە رۆژی 11ی ئەم مانگەوە ئیسرائیل و بزووتنەوەی حەماس بە نێوەندگیری ئەمریكا و بەشێك لەوڵاتانی عەرەبی، ئاگربەستیان لە غەززە راگەیاند و لەو رۆژەوە شەڕ دووساڵەی نێوانیان راگیرا.
سوپای ئیسرائیل لەبارەی هێرشەكەی ئەمڕۆ رایگەیاندووە: ئەمڕۆ یەكشەممە چەكدارانی بزووتنەوەی حەماس لە ناوچەی كەرتی رەفع تەقەیان لە هێزەكانی سوپای ئیسرائیل كردووە و ئەوانیش وەڵامیان داوەنەتەوە.
راشیگەیاندووە: سوپای ئیسرائیل تەنیا ئەو شوێنەیان بۆردومان كردووە كە تەقەكانی لێ كراوە، بەهۆیەوە چەند مۆڵگە و باڵەخانەیەكی سەربازیی چەكداران رووخێنراون.
لای خۆشییەوە كەتائیبی قەسام باڵی سەربازی بزووتنەوەی حەماس رەتی كردەوە هیچ چەكدارێكیان لە ناوچەی رەفع تەقەی كردبێت و جەختیشی كردەوە كە ئەوان بەتەواوەتی پابەند دەبن بە خاڵەكانی رێككەوتن و ئاگربەست لە هەموو كەرتی غەززە.
پێشتر بنیامین نەتانیاهۆ سەرۆك وەزیرانی ئیسرائیل هۆشداری دابوو كە بەهەموو هێزیانەوە رووبەڕووی هەر هەوڵ و هێرشێك دەبنەوە ئەگەر بكرێتە سەر سەربازەكانیان.
وەزارەتی تەندروستی فەڵەستین لەبارەی ئامارەكانی گیانلەدەستدان، رایگەیاندبوو كە ئەمڕۆ بەلایەنی كەم 8 كەس كوژراون و ژمارەیەكی دیكەش بریندار بوون.
