كۆچی گەنجان بووەتە بابەتێكی مەترسیداری نێو كۆمەڵگەی كوردی
ئافرەتان هەردەم رۆڵی سەرەكی و كاریگەریان بینیوە بۆ پێشخستنی هەموو كایەكانی ژیان
محەمەد ئامۆكەیی- زاری كرمانجی:
حەفسە مەولوود رۆژباش، چالاكوانی كۆمەڵگەی مەدەنی و ئەندامی مەكتەبی پەیوەندییە نیشتیمانییەكانی پارتی دیموكراتی كوردستان، لە دیدارێكی زاری كرمانجی قسە لەسەر دۆخی ئازادی ژنان و چەند پرسێكی دیكەی پەیوەست بە یەكسانی جێندەری و هاتنە پێشی ئافرەتان دەكات و لە دەستپێكدا ئاماژەی بەوەكرد” دۆخی ژنان لە هەرێمی كوردستان لە هەموو بوارەكانەوە لە پێشكەوتن و باشتر بوون دایە، دۆخێكە بەهۆی گەشەسەندنی هزرو بیرو تێگەیشتنی زیاتری ژنان و ئافرەتانمان لە رۆڵ و كاریگەری خۆیان لەنێو كۆمەڵگا ئەو بەرەو پێشوە چوونەی بەخۆیەوە بینیوە، ماوەی پێنج ساڵ بۆ دۆخی ئافرەتان بەنموونە وەرگرین زۆر بەروونی هەست بەو پێشكەوتنە دەكەین، لەكاتێكدا لە كۆمەڵگەی كوردستاندا ئافرەتان هەردەم رۆڵی سەرەكی و كاریگەریان بینیوە و بۆ پێشخستنی هەموو كایەكانی ژیان زۆر جارو لە زۆربەی جومگەكانی ژیاندا ئەركیان لە پیاو زیاتر بینیوە و راپەڕاندووە”.
ئەو چالاكوانە پێشی وایە، هێشتا عەقڵیەتی پیاو سالاری لە نێو كۆمەڵگەی كوردی زاڵە و وەك خۆی دەڵێت:” كۆمەڵگەی كوردی لە روانگەی كومەڵناسییەوە كۆمەڵگەیەكە باوك سالاری و پیاو سالاری هێشتا تێدا زاڵە، دەكرێ بڵێین، وێڕای پێشكەوتنەكانی سەردەم و كرانەوەی و خۆگونجاندن لەگەڵ سەردەمی دیجیتەڵی، بەڵام هزرو ئەقڵیەتی پیاو سالاری جێ پێخۆی لە نێو كلتوور و داب و نەریت و هەڵسوكەوتی رۆژانەماندا تووند كردووە، بەڕادەیەك ژنان و كچانمان لە نێو زۆر لە خێزانی كوردستاندا ناگەنە هێنانەدی ئاوات و ئامانجەكانیان، بەڵكو خەونەكانیان بەهۆی هزر و دەسەڵاتی پیاوسالاری دەپوكێتەوە، كە وا ئەڵێین مانای ئەوەناگەینێ ئافرەتانمان بەتەواوەتی تەسلیمی دەستی قەدەری باوك سالاری بوونە، نەخێر ئەم بابەتە پرسێكی رێژەییە لە شارێك بۆ شارێك، لە ناوچەیەك بۆ ناوچەیەك، لە خێزانێكەوە بۆ خێزانێك لە گۆڕاندایە و گۆڕاوە و نەگۆڕ و جێگیر نییە”.
لەبارەی بەشداری پێكردنی ئافرەتان لە سێكتەرەكانی حكوومڕانیدا، حەفسە مەولود گووتی:” ئەوەی گرنگە ئافرەتان و ژنان بەشداری كارایان هەیە لە سێكتەرەكانی حكوومڕانی لە كوردستان، خودی ئەم بەشداری كردنە لە حكوومڕانی سیاسیی و كارگێڕی لە كۆمەڵگای كوردیدا ئەوە دەسەلێمنێ كە پرسی جێندەری و یەكسانی جێندەری هاوكۆكە لەگەڵ رۆڵ و بایەخ و كاریگەری ژنان بە سەر پیاوانی كۆمەڵگەدا، پێویستە ئەوەش بێنینە پێش چاو ئەمڕۆ ئافرەتانمان بەراستەقینەی رۆڵی كارای خۆیان دەبینن لە نێو سێكتەرەكانی حكوومداریەتی لە كوردستاندا، نەك وەك نمایشێك بۆ بابەتی جێندەری یا یەكسانی، مێژووی خەباتی ئافرەتی كوردیش ئەوەی سەلماندووە كە ئافرەتانمان هەردەم سەركردە و رابەر و پێشەنگی خەباتی كۆمەڵگەی خۆیان بوونە”.
حەفسە مەولود، بۆچوونی خۆی لەسەر كۆچی گەنجان دەربڕی و روونی دەكاتەوە ئەم كۆچە كاریگەری زۆری دەبێت لەسەر كەمبوونەوەی پڕۆسەی هاوسەرگیری زیاتر گووتی:” كۆچی گەنجان یەكێكە لە پرسە هەرە گەرمەكانی ئەمڕۆی كۆمەڵگەی كوردستانی و بووەتە بابەتێكی مەترسیداری كۆمەڵگە و خێزان لە كوردستان، بەجۆرێك كاریگەری لەسەر زۆر لە پرسەكان داناوە، لەو پرسانەش پڕۆسەی هاوسەرگیری و پێكهێنانی خێرانە كە لە دوولاوە كاریگەری ناوەتەوە، ئەو گەنجەی سەڵتە كە كۆچ دەكات وڵات جێدەهێڵێت كاریگەری دەبێ لەسەر پڕۆسەی هاوسەرگیری، ئەو كەسەی خێزانداریش بێ شیرازەی خێزان و سیستەمی هاوسەرگیری لێك هەڵدەوەشێنێتەوەو دەیخاتە بەردەم چەندین ئەگەری نەخوازرا و تا ئاستی لێدابڕان و جیابوونەوە، ئەم پرسە كاریگەری زۆری لەسەر ئاسایشی كۆمەڵایەتی داناوە و كۆمەڵگەی كوردستانی خستۆتە نێو چەندین گرفت و رووداوی نەبیندراو و هەست پێنەكراو بە رادەیێ تاكەكانی نێو خێزان و كۆمەڵگا پێیەوە دەناڵێنن و دەتلێنەوە و بوونەتە ئازار چێشتەی دەستی كۆچ و جێهێشتنی وڵات، بەتایبەتیش كۆچی بە نایاسای و سنوور بەزاندنی وڵاتان و نێودەریاكان وەك ئەو كارەسات و تراژیدیای ئەو كۆچانەی دەیبینین”.
