دانیشتوانی دەشتی هێرتێ‌ و دەشتی بەرازگر داوای تیمی ئاگر كوژێنەوە دەكەن

بەرپرسی بەرگری شارستانی سیدەكان: بەهۆی دووری گوندەكان ناتوانین وەكو پێویست كۆنتڕۆڵی رووداوەكان بكەین

ڕائید ڕەوەند هاودیانی: لە هەوڵی كردنەوەی چەند بنكەیەكی بەرگری شارستانین

زاری كرمانجی – سیدەكان:

گوندنشینانی دەشتی هێرتێ و دەشتی بەرازگر لە سنووری قەزای سیدەكان، دابین كردنی تیمی ئاگر كوژێنەوە و بەرگری شارستانی لە سنوورەكانیان بە گرنگ دەزانن و پێیان وایە، بەهۆی دووری ڕێگای گوندەكانیان لە بنكەی بەرگری شارستانی سیدەكان، لە كاتی رووداوەكانی سووتان زەرەر و زیانێكی زۆریان پێ دەگات .
گووتەبێژی بەرگری شارستانی سۆرانیش، دەڵێت:” لە هەوڵی زیادكردنی بنكەی بەرگری شارستانین بە تایبەت لە سنووری ناحیەی كانیەڕەش.
عەبدوڵڵا شێخۆ موختاری گوندی نزاریە لە سنووری دەشتی هێرتێی سەر بە قەزای سیدەكان، بە زاری كرمانجی گووت:” تەنها لە سنووری دەشتی هێرتێ 58 گوندی ئاوەدان بوونیان هەیە، كە گوندەكان چەندین كیلۆمەتر لە سەنتەری قەزای سیدەكانەوە دوورن، بۆیە ئەم دەڤەرە زۆر پێویستی بە بنكەیەكی بەرگری شارستانی هەیە، بۆ كۆنتڕۆڵ كردنی هەموو ڕووداوێكی نەخوازراو كە لەو سنوورە رووبدات.
لەبەردەوامی قسەكانیدا، موختاری گوندی نزاریە، گووتی:” لە سنووری دەشتی هێرتێ هەر ڕووداوێك ڕووبدات بەتایبەت سووتان، گومان لەوە دانییە تا تیمەكانی بەرگری شارستانی سیدەكان دەگەنە شوێنی مەبەست، ئەوا كار لەكار دەترازێ! هۆكارەكەش دووری ڕێگایە نەك كەمتەر خەمی تیمەكانی بەرگری شارستانی، بۆیە بە پێویستی دەزانین بۆڕاچاوكردنی بەرژەوەندی گشتی هاووڵاتییان و پاراستنی سەروماڵییان، حكوومەت هەر نەبێت تیمێكی تایبەت و ئۆتۆمبێلێكی ئاگركوژێنەوەمان بۆدابین بكات، ئێمەش وەك هاووڵاتییانی گوندی نزاریە بەهەموو شێوەیەك هاوكارییان دەبین بە پێدانی خانوو بەتەواوی پێویستیەكانیەوە لە نزیك دام و دەزگاكانی دیكەی حكومەت لە نزاریە، ئامادەشین بۆ هەر هاوكاریەكی لە توانامان دابێت ئەنجامی بدەین، تەنها تیمێكی ئاگركوژێنەوەمان بۆ دابین بكرێت.
عەبدولڕەزاق ئەحمەد موختاری ناحیەی كانیەڕەشە لەسنووری قەزای سیدەكان، بە زاری كرمانجی گووت:” لە دەشتی بەرازگر بە تایبەت سەنتەری ناحیەی كانیەڕەش نزیكەی 250 ماڵی لێ نیشتەجێیە، بێجگە لە گوندەكانی دەورووبەرمان، ناوچەیەكی دوورەدەستیشە، بەهۆی نەبوونی تیمی ئاگركوژێنەوە لە سنوورەكەمان و دووری بەرگری شارستانی سیدەكان، لە رابردوو زیانی زۆر بە هۆی ڕووداوی ئاگر و سووتان بەر هاووڵاتییانی سنوورەكەمان كەوتووە .
ئەو موختارە، دووپاتی لەوەكردەوە، پێشتر كانیەڕەش گوند بوو، ماوەی دووساڵ زیاترە كراوەتە ناحیە، بەڵام تا ئێستا بنكەی بەرگری شارستانی لێ نەكراوەتەوە، داواكارین لە ڕێگەی زاری كرمانجی بنكەیەكی بەرگری شارستانی لە سنوورەكەمان بكرێتەوە تا سەروماڵی هاووڵاتییان پارێزراو بێت و بەهۆی ڕووداوی نەخوازراو و سووتان زیانی ماددی و گیانیان پێ نەگات.
مفەوەز حەسەن فەتاح بەپرسی بنكەی بەرگری شارستانی سیدەكان، بۆ زاری كرمانجی ئاماژە بەوەدەدات:” بەهۆی دووری گوندەكانی سنووری دەشتی هێرتێ و دەشتی بەرازگر لە سەنتەری قەزای سیدەكان، هەر ڕووداوێك كە لەو شوێنانە و گوندەكانیان ڕوودەدات، ناتوانین وەكو پێویست و لەكاتی خۆیدا كۆنتڕۆڵی بكەین، بۆیە زۆر پێویستە تێمێكی ئاگر كوژێنەوە بۆ سنووری دەشتی هێرێت و بەرازگر دابین بكرێت، چونكە ناوچەكە زۆر لە ئێمە دوورن.
زیاتر گووتی:” چەند ڕۆژێك بەر لە ئێستا ڕووداوێكی ئاگر كەوتنەوە لە سنووری كانیەڕەش ڕوویدا، بەهۆی دووری ڕێگا تیمەكانی بەرگری شارستانی پیران و مێرگەسۆر پێش ئێمە گەیشتنە شوێنی ڕووداوەكە، بۆیە ئەگەر تیمێكی ئێمە لەوێ جێگیر بكرێت ئەوا زووتر ئەو جۆرە ڕووداوانە كۆنتڕۆڵ دەكات.
لای خۆیەوە، ڕائد ڕەوەند هاودیانی گووتەبێژی بەڕێوەبەرایەتی بەرگری شارستانی سۆران، بە زاری كرمانجی ڕاگەیاند:” بەهۆی بەرفراوانبوون و زیادبوونی چەند ناحیەیەك لە سنووری بەڕێوەبەرایەتیمان، لەپلانماندایە ژمارەیەك بنكەی بەرگری شارستانی لە ناحیەی كانیەڕەشی سیدەكان و سنووری قەزای خەلیفان زیاد بكەین.
گووتەبێژی بەرگری شارستانی سۆران، دووپاتی لەوەكردەوە، بێگومان كردنەوەی بنكەی نوێ پێویستی بە میلاكی زیاتر هەیە، بۆیە پێویستە بەشێوەیەك لە شێوەكان ڕێگەچارەیەك بۆ دابینكردنی میلاكی پێویست بدۆزرێتەوە، بۆ ئەم مەبەستەش سەرووی خۆمان ئاگادار كردۆتەوە و هەوڵی ڕژد دەدەین لەو شوێنانەی پێویستی بە بنكەی بەرگری شارستانی بێت لێی بكەینەوە .
سنووری قەزای سیدەكان یەكێكە لە قەزا بەرفراوانەكانی كوردستان و لە ڕووی ئیداریەوە سەر بە ئیدارەی سەربەخۆی سۆران، ڕووبەڕی جوگرافیای ئەو قەزایە زیاترە لە 600 كیلۆمەتر چوارگۆشە، خاوەنی ناحیەیەك و 250 گوندە و ڕێژەی دانیشتوانی زیاتر لە 20 هەزار كەسە.