محەمەد ئامۆكەیی- زاری كرمانجی:
گرنگی روخسار ئەو ئافرەتانەی بەسەر دووبەری جیاواز دابەشكردووە كە لە بواری میدیا كاردەكەن، بەشێك پێیان وایە تواناو لێهاتووی لە روخسار گرنگترە، دەنگێكی تر جەخت لە جوانی روخسار دەكاتەوە روونی دەكەنەوە بەهۆی جوانی زۆركەس مایكی بەدەستە ئەگەرچی لە ناوەڕۆك شتێكی وا لەو بوارە نازانێت، ژمارەیەك ئافرەتی راگەیاندكار بۆچوونی خۆیان دەردەبڕن.
كەلسوم شوان، یەكێكە لەو میدیا كارانەی چەند ساڵێك دەبێت كاری پەیامنێری دەكات و هەمیشە بە روخسارێكی درەوشاوە دەردەكەوێت، لە سەرەتایی قسەكانی هێمای بۆ ئەوەكرد” توانا و بوێری و جوانی روخسار لە هەر كەسێك هەبوو نیعمەتێكی خوداییە، لایمن بە پلەی یەكەم توانا ئینجا بوێری بۆ سەركەوتنی هەر پێشكەشكار و بێژەر و پەیامنێرێك ئەگەر ئەمانەت هەبوو پێم وانیە روخسار ئەوندە گرنگ بێت، لەگەڵ ئەمەش روخسار گرنگی خۆی هەیە و هۆكارێكە بۆ ئەوەی چانسی وەرگرتنت لە شوێنەی بتەوێ كاری تێدا بكەی زیاتربێت، لەبەر ئەوەی ئێستا هەندێ لەكەناڵ و دەزگای راگەیاندن بەدوای روخساری جوان دەگەڕێن و دەشیبینین مایك بەهەندێ كەس دراوە هیچ شتێك لەبارەی میدیا نازانێت تەنیا روخسارێكی تەجمیل كراوی هەیەو كەناڵەكە وەری گرتووە”.
ئانیا عەبدوڵا، راگەیاندكارێكی ترە جەخت دەكاتەوە لەوەی پێوەری زیرەكی و توانا لەسەرووی هەمووشتێكە و باس لەوەش دەكات كەناڵە جیهانییەكان ئەوندەنی گرنگی بە توانا دەدەن ئەوندە نەچوونەتە سەر بابەتی روخسار، وەك خۆی گووتی” كاركردنی ئافرەتان لەبواری راگەیاندن بۆ ساڵانێكی زۆر پێش ئێستا دەگەڕێتەوە، رۆژ بەرۆژ دەركەوتنی ئافرەتان لە بواری راگەیاندن روو لە زیادبوون دەكات، ئافرەتان جگە لە دەركەوتنیان لەشاشەی تیڤی هەیە نووسەرە، شاعیرە، شانۆكارە، هونەرمەندە و بگرە لە بواری سیاسی كاردەكەن، ئەمە جێگای دڵخۆشی ئێمەی ئافرەتە كە بەو رێژە زۆرە دەركەوتوون، گرنگی روخساریش بووەتە بابەتێك لە نێو میدیای كوردی، بە بۆچوونی خۆم گرنگ ترین شت شێوازی دەركەوتن پرسیار كردنە،گرنگە دەزگای راگەیاندن رەچاوی ئەوە بكات تاچەن بینەر لە شێوازی پێشكەش كردنی كەسی میدیاكار رازییە، ئەگەر سەیری كەناڵە جیهانیەكان بكەین دەبینین پێشكەشكارەكانیان بەتەمەنن، ئەوان تەركیز دەخەنە سەر ئەوەی كە بینەر تاچەن ئاسودەیە بە بینینی بەرنامەكان و دەركەوتنیان”.
دێرین عەلی، ژنە میدیا كارێكی ترە بۆچوونی خۆی لەسەر هەمان پرس دەربڕێت و پێیوایە” دونیایی مۆدێرن وایكردووە دەبێت هەڵبژاردەی فەیسەكان بۆ میدیا جوان بێ خۆی لەخۆیدا ئەمە هەڵەیە تۆ دەتوانی زۆر جوان نەبی، بەڵام كاریزمایەك دروستبكەی كە كاردانەوەی باش لەسەر روخساریشت پەیدا بكات، كەواتە مرۆڤ خۆی دەتوانێ ئەو كاریزمایە دروست بكات”.
زریان كەمال، وەك پەیامنێر و پێشكەشكار لە یەكێك لە كەناڵەكان كاردەكات و دەڵێت” بەو پێیەی فەیس بۆ سەر شاشە گرنگە دەبێت هەمیشە روخسارت بدرەوشێتەوە، من بە رێژەیەكی مامناوەند مایكئەپ بەكار دەهێنم و هیچ جوانكاریەكم نەكردوە و بە نیازیش نیم، بەڵام بۆ داهاتوو نازانم رەنگە رام بگۆڕێت ئەوە بۆ داهاتوو بەجێ دێڵم.
