“خەرجی مانگانەی یانەكە 20 ملیۆن دینارە”

“ئامانجمان گەڕانەوەیە بۆ ریزی یانە نایابەكانی كوردستان”

موستەفا دۆڵەمەری- زاری كرمانجی:

یانەی هەڵۆ، تاكە نوێنەری دەڤەری بارزانە لە چاڵاكییەكانی كوردستان، هەڵۆ ناوێكی دیارە لەنێو یانەكانی كوردستان بەوەی ساڵانێكە بووەتە بەربەستێكی گەورە لەبەردەم یانەكانی كوردستان، تەنانەت بەشێك لەو یانانەی هاتوونەتە دەڤەری بارزان بەمەبەستی ئەنجامدانی یاری دژی یانەكە، دوای گەڕانەوەیان ئاماژەیان بەسەختی یاریگەكە كردووە و بەدۆزەخی یانەكان وەسفیان كردووە.
یانەی هەڵۆ، یەكێكە لەو یانانەی كە هەر لە سەرەتای دامەزراندنیەوە، بە هۆی دوورە دەستیان لەسەنتەری شار چەندان گرفتی جۆراجۆریان بۆ دروست بووە، جاری وا هەبووە ئەو یاریزانانەی كە بە مەبەستی یاریكردن بۆ ئەو یانەیە گەشتی ناوچەی بارزانیان كردووە، ئامادەنەبونە بە هۆی خراپی شوێنی حەوانەوەیان یەك كاتژمێریش لەو شوێنە بمێننەوە، هەروەها خراپی لایەنی ماددی و نەبوونی گرێبەست و چەندان كێشەی دیكەی جۆراوجۆر دەستیان لەناو دەستی یەكتری ناوە بۆ ئەوەی ئەو یانەیە لە هەموو مافێك بێ بەش بكەن، جگە لەوەی كە یاریگەكەیان شیاوی ئەوە نییە یاریی لەسەر بكرێت.
یانەی هەڵۆ، لەگەڵ بوونی هەموو ئەو كێشانە ، بەڵام ساڵ دوای ساڵ ئاست و ئەنجامی باشیان بەدەست هێناوە، ئەو یانەیە بێ ئەوەی هیچ پاڵپشتیەكی دارایی هەبێت، یاخود هیچ كەرتێكی تایبەت و كەسانی تایبەت هاوكاریان بكەن، بەشدارییان لە خولەكانی كوردستان كردووە، لەسەر ئاستی پێشكەوتووان بگرە تاوەكو ئاستی بەچكە شێران و خەمخۆری وەرزشوانانی دەڤەرەكە وایكردووە رێگە نەدەن هیچ كێشەیەك ببێتە بەربەست بۆ ئەوان.
دینۆ میكائیل، ئەو راهێنەرەی دوای ساڵانێك دابڕان یانەكەی گەڕاندەوە ریزی یانە نایابەكان، بەڵام بەهۆی نەبوونی پاڵپشتییەكی دارایی بەهێز لەخولی نایاب كشانەوە بەمەیش دابەزین بە ریزی یانە پلە یەكەكان.
دینۆ، جارێكی دیكە بووەتە سەرمەشقی هەڵۆكانی بارزان، و لەسەر پێشوازی یانەی هەڵۆ بۆ وەرزی نوێی ركابەرییەكان بە زاری كرمانجی راگەیاند: “ئامادەكاریەكی باشمان كردووە هەموو هەفتەیەك دوو یاریی دۆستانە دەكەین و بەم هۆیەش یاریزانەكانی ئێمە ئامادەنە بۆ هەموو جۆرە یارییەك و بە باشترین شێوە دەتوانین بڕۆینە نێو خولی پلە یەكی كوردستان، و چەند یاریزانێكی نوێمان هێناون دوو یاریزانی شاری بەغدامان هێناون و گۆڵپارێزێكی پیشەگەرمان لە ئێران هێناوە خەڵكی كرمەشانە، لەپاڵ نزیكەی 15 یاریزانی خۆمان ماون. ئەوەی جێگەی خۆشحاڵی ئێمەیە پەیوەندیكردنی عەلی نوری، كاپتنی پێشووتری یانەی زێرەڤانی و كاپتنی یانەی دهۆك لە خولی عێراق، كە یاریزانی پێشووتری ئێمەش بوو لە ئێستادا گەڕاوەتەوە هەڵۆ، عەلی دەتوانێت لە نایابی عێراقدا یاری بكات، بەڵام خۆشەویستیی بۆ یانەی هەڵۆ لەدڵیدا ماوەتەوە بۆیەش لەریزی هەڵۆ بەردەوامی بەیارییكردن دەدات.”
راهێنەری هەڵۆ، درێژەی پێدەدات: “ماوەی مانگێك و پانزە رۆژە دەستمان بە راهێنان كردوە لە سەرەتادا نزیكەی 60 یاریزان پەیوەندییان بە هەڵسەنگاندنی یانەكە كرد، بەڵام لە ئێستادا 24 یاریزانی سەرەكیمان هەن، ئامانجمان سەركەوتنە بۆ ریزی یانە نایابەكان كوردستان و ئێمە توانای ئەوەمان هەیە. ساڵی رابردوو لەریزی یانە نایابەكانی كوردستان بووین، بەڵام بەهۆی كێشەی دارایی ئێمە نەمان توانی بەردەوامی بە چاڵاكیەكانمان بدەین، لە بەر ئەوەش بوو پاشەكشێمان كرد لە خولی نایابی كوردستان و پلەیەك هاتینە خوارەوە.”
دینۆ میكائیل، باسی رۆڵی یانەی هەڵۆ لە پێگەیاندن و درەوشانەوەی بەهرەكانی سنوورەكە دەكات و دەڵێت: “ئیبراهیم غازی، یاریزانی ئێمە بوو لە ئێستادا لە یانەی نەورۆز لەخولی نایابی عێراق یاری دەكات. ئەو لەهەڵۆ دەركەوتووە و هەموو كاتێكیش ئامادەیە یاری بۆ ئێمە بكات هەركاتێك پێویستمان پێ بێت.”
خەرجی مانگانەی یانەی هەڵۆ 20 ملیۆن دینارە
راهێنەری هەڵۆكانی بارزان، باسی خەرجی مانگانەی یانەكەی ونالەباری یاریگەی بلێ وێڕای نۆژەنكردنەوەی دەكات: “مانگانە نزیكەی 20 ملیۆن خەرجیمان هەیە وەكو یانەی هەڵۆ و زۆربەی یاریزانەكانی ئێمە خەڵكی پارێزگای دهۆك، ئاكرێ و چەمچەماڵن و نزیكەی 12 یاریزانی خۆجێیمان هەنە. گۆڕەپانی یاریگەی هەڵۆ، وەكو پێویست نیە زۆریش لێ نارازین راستە نۆژەنكراوەتەوە. ماوەیەكی باشی دەوێت بۆ ئەوەی ئامادەبێت دەبوایە ئەوساڵە ئێمە یارییمان تێدا نەكردبایە، بەڵام باری دارایمان لەو ئاستە نییە بتوانین هەموو رۆژێك بڕۆین بۆ سۆران، خەلیفان، ئاكرێ تا بتوانین مەشق راهێنان بكەین بۆیە ناچارین لە ناو یاریگەی خۆمان ئەنجامبدەین. كەش هەوایەكی پاك لە دەڤەری بارزان هەیە و ژینگەیەكی زۆر باشە بۆ یاریزانان و پەنا بەخوا بۆ ساڵی داهاتوو یاریگەی هەڵۆ لەبارتر دەبێت بە ئەنجامدانی چاڵاكی.”
یانەی هەڵۆ لەپاڵ یانەی رواندز نوێنەرایەتی ئیدارەی سەربەخۆی سۆران دەكەن لەخولی یانە پلە یەكەكانی كوردستان. بڕیارە 14ی ئەم مانگە گەڕی یەكەمی خولەكە بەرێوەبچێت و هەڵۆ لەیەكەم تاقیكردنەوەدا دەبێتە میوانی كۆیە.