گەنجانی خەلان بیاو داوای نۆژەنكردنەوەی یاریگای بچووكراوەی تۆپی پێ دەكەن

سۆران سرێشمەیی ـ خەلیفان:
گەنجانی ناوچەكە باس لە پێویستی نۆژەنكردنەوەی یاریگەی چیمەنی دەستكردی خەلان بیاو دەكەن كە پێشتر لەلایەن ناوەندی لاوان بۆ یاریزانانی ئەو ناوچەیە دروستكراوەو ماوەی دوو ساڵە بەجۆرێك تێكچووە بەكەڵكی یاریكردن نایەت، بەرپرسی ناوەندی لاوانی خەلیفانیش دەڵێت، ئەوەی پێویست بوو بێت لە هەوڵدان بۆ نۆژەنكردنەوەی یاریگەی بچووككراوەی خەلان بیاو كردومانەو بەڵێنیش دەدەین هەرچیەك لە توانای ئێمە بێت درێخی ناكەین.
وشیار عارف، وەرزشكارێكی دانیشتووی گوندی قەمەریان ـە دەمێكە حەسرەتی تێكچوونی تاكە مەنزڵگەی وەرزشی بۆ وەرزشوانانی دەڤەرەكە لەدڵیدا چرۆی كردووە، ژمەت لەو دۆخەی دەخوات. وشیار، لەبارەی گرنگی ئەو یاریگایەو نۆژەنكردنەوەی بەزاری كرمانجی ڕاگەیاند:” ماوەیەكی زۆرە یاریگەیەكی بچووككراوەی تۆپی پێ لە دۆڵی بیاو بۆ گەنجان و یاریزانانی ئەو سنورە درووستكراوەو ببووبە ماییەی دڵخۆشی و بەسەربردنی كاتێكی خۆش بۆ وەرزشوانانی ئەو سنورە. ئەمە جگەلەوەی هۆكارێكیش بووە بۆ پێشڤەچوونی بواری وەرزشی لە خەلان بیاو گوندەكانی. بەڵام بە داخەوە ماوەیەكی زۆرە بۆتە جێگەی “مۆ”بوونی مانگاو ماڵات، بۆیە داوا لە لایەنی پەیوەندار دەكەم ئاوڕێك لە گەنجانی سنوری دۆڵی بدەنەوەو هەر هیچ نەبێت ئەو یاریگەیەمان بۆ نۆژەن بكەنەوە.”
گەنجێكی دیكەی تینوو بۆ وەرزش، سەبارەت بە هەوڵ و داواكاری بۆ نۆژەنكردنەوەی یاریگەكەیان قسەی هەیە. سیروان خەلانی دەڵێت:”ماوەی دوو ساڵە یاریگەكە تێكچووەو چەندینجاریش لە ڕێگەی ناوەندی لاوان و بەرپرسانی حیزبی و حوكمی و تەنانەت كەسایەتیەكانیش داوامان كردووە یاریگەی چیمەنی دەستكردی خەلان بیاو بۆ گەنجانی ئەو سنورە چاكبكرێتەوەو بخرێتە خزمەتی وەرزشوانان، وە لەمبارەیەوە بەتایبەتیش لە كاتی بەڕێوەچوونی هەڵبژاردنەكان بەڵێنی زۆرمان پێدراوە، بەڵام بەداخەوە هیچی لێ سەوز نەبوو، ئەمەیەش نیگەرانی لە لایەن گەنجانی دۆڵی بیاو درووستكردووە كە مافی خۆیانەو پێویستیشە شوێنێك هەبێت كۆیانبكاتەوەو كاتێكی خۆشی تێدا ببەنە سەر، چونكە لە ئەنجامی نەبوونی سەنتەرو ناوەندێكی ڕۆشنبیری و كتێبخانە، هەر هیچ نەبێت یاریگەی چیمەنی دەستكردی خەلان بیاو نۆژەنبكرێتەوە تا كەمێك نیگەرانی گەنجان بڕەوێندرێتەوەو دووبارە بواری وەزرشی بەتایبەتیش تۆپی پێ زیاتر بەرەو پێشەوە ببرێت.”
لەمەڕ ئەو پرسە سەیدۆ جەمال، بەرپرسی ناوەندی چالاكی و پێگەیاندنی لاوانی خەلیفان ڕوونكردنەوەیدا و گوتی:” لەو دەمەی ئێمە وەك ستافی نوێ لە ناوەندی لاوانی خەلیفان دەستبەكاربووین ئەو یاریگەیە و ژمارەیەك یاریگای تر لە سنوری شارەدێی خەلیفان تێكچوو بوون و خۆشبەختانە لە ڕێگەی گرێبەستێكەوە توانیمان بەشێكیان نوێ بكرێتەوە، بەڵام لەلایەك بەهۆی كەمی توانای دارایی نەتوانراوە یاریگەكە نۆژەنبكرێتەوە، لە لایەكی تریشەوە سەرباری هەوڵی زۆر و كارئاسانی پتر هیچ كەسێك نییە لە چوارچێوەی گربێبەستێكدا بتوانێت ئەركی چاككردنەوەی یاریگەی خەلان بیاو لە ئەستۆ بگرێت.”
سەیدۆ درێژەی پێدەدات:” هەوڵێكی زۆرمانداوەو نووسراویشمان بەرز كردۆتەوە بەو هیوایەین لە نزیكترین كاتدا كار لەسەری بكرێت و لە هەوڵەكانیشمان بەردەوام دەبین، چونكە گەنجانی دۆڵی بیاو مافی خۆیانە یاریگایەكی شیاویان هەبێت بۆ ئەوەی چاڵاكییە وەرزشییەكانیانی تێدا ئەنجامبدەن و بواری وەرزشی لەو سنورە بەرەو پێشەوە بچێت.”