سەرۆكی حكوومەت پاڵپشتیەكی گرینگی دارایی قوتابییانی زانكۆ و پەیمانگەكان دەكات

زاری كرمانجی – سۆران:

لە نوێترین رێزبەندیدا زانكۆی سۆران یەكەمی هەرێم و حەوتەمی هەموو عێراقە و تاكە زانكۆشە لە هەموو كوردستاندا خەڵاتی رێزلێنانی لەسەر ستەیج وەرگرت لەبەر ئەوەی توانیویەتی لە ماوەی یەك ساڵ ئاستی كواڵیتی خۆی سێ ئەوەندە بەرز بكاتەوە.
پڕفیسۆری یاردەدەر، د شێروان شەریف، سەرۆكی زانكۆی سۆران لە دیمانەیەكی تایبەتی زاری كرمانجیدا، گووتی:” وەكو ساڵانی رابردوو ئەمساڵیش درەنگ ناوی قوتابییان گەڕانەوە و تا ئێستاش بەردەوام قوتابیمان بۆ دەنێرن، هەروەها ئەوانەی كە فۆرمی راستەوخۆیان پڕنەكردۆتەوە سێ گەڕی دیكەش گەیشتوون، پێویستە قوتابییان چیتر دوانەكەون بۆ خوێندن چونكە كاتێكی زۆریان لێ دەڕواتن و زۆر لە خوێندن دوادەكەون”.
سەرۆكی زانكۆی سۆران، دەڵێت:” ئەمساڵ زانكۆی سۆران ١٦٥٨ قوتابی وەرگرتووە، قوتابابیانیش زیاتر خواستیان لەسەر بەشێكە كە بازاڕی كاریان هەیە، بەش هەیە ئێمە داوامان كردووە ٤٠ قوتابی بنێرن كەچی ١٢٠ قوتابی نێردراون، لە پلانی ئێمەدا نییە، بەڵام ناچارین هەموو شێوازێك بگرینە بەر بۆ ئەوەی ئەو بەشانە كواڵیتیان دانەبەزێت بۆ ئەمەش لە وانەیە مامۆستا هەبێت لە هەفتەیەكدا ١٢ كاتژمێر وانەی هەبێت ناچارە لە هەفتەیەكدا ٢٤ كاتژمێر وانە بڵێتەوە، یان ناچارین مامۆستا بە گرێبەست بهێنین بۆ وانە وتنەوە ئەمەش بارگرانییە لەسەر حكومەت و زانكۆ .
رونیشی دەكاتەوە:” زانكۆی سۆران خۆی لە پێنچ فاكەلتی دەبینێتەوە و بە تەنیا ئەم پێنج فاكەڵتیە بەس نین پێویستمان بە چەند بەشێكی نوێ هەیە، لە وانە بەشی كشتوكاڵ و پزیشكی كە زۆر گرینگە ئەگەر بەشی پزیشكی هەبوایە زانكۆ سەرپەرشتی كردبا بێگوامان ئەو نەخۆشخانەیەی كە سەر بە زانكۆ دەبوو، كواڵیتی زۆر باشتر دەبوو لە نەخۆشخانەیەكی ئاسایی، ئەگەر بێت و وەزارەتی خوێندنی باڵا رەزامەندی بدات ئەوا ئێمە ئامادەین بۆ كردنەوەی ئەم دوو بەشە و هەوڵی كردنەوەیان دەدەین.
لە بەشێكی دیكەی قسەكانیدا، د. شێروان شەریف دەشڵێت:” زانكۆی سۆران تاكە زانكۆ بوو لە هەموو كوردستاندا خەڵاتی رێزلێنانی لەسەر ستەیج وەرگرت لەبەر ئەوەی توانیویەتی لە ماوەی یەك ساڵدا، ئاستی كواڵیتی خۆی سێ ئەوەندە بەرز بكاتەوە، بەر لە ساڵی نوێ سەرۆكایەتی زانكۆی سۆران دەگوازێتەوە دێلزیان واتە لە نزیك كەمپی زانكۆ دەبێتن و ئەو ئەندازیارانەی كە كار دەكەن بۆ دروست كردنی باڵەخانە بۆ سەرۆكایەتی زانكۆ سۆران هەموویان لە زانكۆ كار دەكەن و زیاتر لە ٤٠ نەخشە دروست كراون و بەكواڵتیەكی یەكجار بەرز و تێچوویەكی كەم دروست كراون.
سەرۆكی زانكۆی سۆران، گووتیشی:” زانكۆی سۆران خاوەنی یەك ژوریش نییە لە بەشە ناوخۆییەكان هەموویان بە كرێن و ناچارین بگەڕێین بۆ ئەوەی لە باشترین شوێن بینایە بدۆزینەوە بۆ ئەوەی بە كرێی بگرین و هەڵبژاردنمان داواتە دەست قوتابییەكان، كە خۆیان رێك بێخن لەگەڵ هاوپۆڵەكانیان لەگەڵ یەكتری رێك بكەون و لە زۆر دەرگامان داوە و هەندێك دەزگای خێرخوازی زۆر هاوكارمان بوونە لە دابەش كردنی سەبەتەی خۆراك یان ئێوارە خوانێك بۆ قوتابیان.
لە دوا قسەكانیدا پ .ی. د. شێروان شەریف سەرۆكی زا نكۆی سۆران هەوڵەكانی سەرۆكی حكومەت بۆ پاڵپشتی دارایی بەرز دەنرخێنێت و دەڵێت:” ساڵی رابردوو سەرۆكی حكومەتی هەرێمی كوردستان و كابینەی نۆیەم پاڵپشتیەكی گرینگی دارایی بۆ قوتابیانی زانكۆ و پەیمانگەكان كرد، بەپێی زانیارییەكان ئەمساڵیش ئەم پاڵپشتیە بەردەوام دەبێت .
گووتیشی:” هەر میلەتێك ئەگەر بە گەورەی سەیری زانكۆكانی خۆی نەكات، ئەوا ئایندەیەكی روونی نابێتن، بە پێچەوانەوە لە مێژوەوە سەرمێندراوە هەر میلەتێك یا حكومەتێك بە گەورەی و گرینگیەوە سەیری زانكۆكانی خۆی كردبێت، بێگومان لە هەموو رووێكەوە بەرەوپێشچوونە و ئێستا ئایندەیەكی گەشیان هەیە”.