ئه‌مڕۆ پێنجشه‌ممه 10/11/2022، بە ئامادەبوونی مەسرور بارزانی، سەرۆکی حکوومەتی هەرێمی کوردستان، ڕێورەسمی پرۆگرامی سکۆلەرشیپی هاوبەشی کۆمپانیای گەنەڵ ئینەرجی و زانکۆی ئەمریکی کوردستان لە شاری هەولێر بەڕێوە چوو، له میانه‌ی رێوڕه‌سمه‌كه‌دا مه‌سرور بارزانی وتارێكی گرنگی پێشكه‌ش كرد و خۆشحاڵیی خۆی لەوە دەربڕی كە جارێكیتر لە بۆنەیەكی گرنگدا بەیەك گەیشتوونەتەوە كە ئەویش دابینكردنی خوێندنی بێ بەرامبەرە بۆ 20 قوتابیی لە لایەن كۆمپانیای گەنەل ئینێرجییەوە.
مەسرور بارزانی رای گەیاند: ”من لێرەوە سوپاسی گەنەل ئینێرجی دەكەم بۆ دابینكردنی ئەو دەرفەتە بۆ ئەو قوتابییە بەهرەدارانەی كە قۆناغێكی نوێ لە خوێندن دەست پێدەكەن و ئومێدم وایە لە دوارۆژدا ببن بە سەركردەی كاریگەر و كەسێكی گرنگ لە كۆمەڵگەكەمان. بەو هیوایەی دوای چەند ساڵێكیتر لە دەرچوونی ئێوە لە زانكۆش لەگەڵ یەك بین و دوای ئەوەش بتانبینین جێگەی دەستتان دیاربێت و لە كۆمەڵگەی خۆتان بتوانن كۆمەك و هاوكاریی زیاتری خەڵك و وڵاتەكەی خۆتان بكەن. هیوادارم كۆمپانیاكانی تریش چاو لە گەنەل ئینێرجی بكەن بۆ ئەوەی ئەم جۆرە دەرفەتە بۆ قوتابیانی ئێمە فەراهەم بكەن تاوەكوو خەڵكێكی زیاتر سوود لەم دەرفەتە وەربگرێت.“
خۆشحاڵیی خۆیشی لەوە دەربڕی كە زانكۆی ئەمریكی كوردستان لە دهۆك بۆتە شوێنێك، زۆر لەو قوتابیانەی چاویان لە خوێندنێكی كوالێتیی بەرزە، ڕوو لە زانكۆی ئەمریكی كوردستان لە دهۆك دەكەن و گوتی: ”دەتوانم بڵێم 65%ی ئەو قوتابیانەی لەم زانكۆیە دەخوێنن، لەوانەن كە لە لایەن كۆمپانیاكانی وەك گەنەل ئینێرجی و وەزارەتی دەرەوەی ئەمریكا و وەزارەتی خوێندنی باڵاوە یارمەتی دەدرێن و بەبێ بەرامبەر دەخوێنن.“
هەر لە وتارەكەیدا، مەسرور بارزانی هیوای خواست، كۆمپانیاكانی دیكەش ”چاو لە گەنەل ئینێرجی بكەن بۆ ئەوەی ئەم جۆرە دەرفەتە بۆ قوتابیانی ئێمە فەراهەم بكەن تاوەكوو خەڵكێكی زیاتر سوود لەم دەرفەتە وەربگرێت.“
ئەوەشی وەبیر هەموان هێنایەوە كە ” مامۆستاكانمان پاڵەوانەكانی ئێمەن، پێویستە تا دەكرێت هاوكارییان بكرێت، بە تێڕوانینی من ئاییندەی وڵاتەكەمان پشت دەبەستێ بە چۆنیەتیی بایەخدانمان بە كەرتی پەروەردە و بەوەی چەندەش پاڵپشتیی مامۆستاكانمان دەكەین. هەوڵی ئەوەمان داوە كە هاوكاری مامۆستاكانمان بین، بۆ نموونە بە دابینكردنی مامۆستای گرێبەست، دڵنیاشیان بكەینەوە لەوەی كە مووچەكانیان بدەین، دڵنیاشین كە زۆربەی مامۆستاكانمان بەداخەوە ڕووبەڕووی كۆمەڵێك ئاڵنگاری و ناخۆشی بوونەتەوە، بەداخەوە ئێمەش ڕووبەڕووی كێشەی نەبوونی ستافی پێویست لە كەرتی پەروەردە بووینەتەوە، بەڵام هەوڵمانداوە كە تواناكانی خۆمان زیاد بكەین و بتوانین كە زیاتر سەرمایەی مرۆیی بۆ ئەم كەرتە دابین بكەین. من سەرنجی سەرەكیم لەسەر ئەوەیە كە چۆن پاڵپشتیی مامۆستاكانمان بكەین و كەرتی پەروەردە باش بكەین و هاوكاریی دارایی زیاتر بۆ ئەم كەرتە بهێنن، تا هاوكاریی زیاتر بۆ ئەم كەرتە و قوتابییەكانمان دابین بكەین، ئەوا ئێمە بە دڵنیاییەوە مامۆستاكانمان و كەرتی پەروەردەش بەرەو باشتر دەچێت.“
مەسرور بارزانی لە وتارەكەیدا گوتی: ”تەنانەت ئەگەر هەموو ئەمانەشمان دابین كرد و حكوومەت توانی هەموو پێداویستییەكانیش دابین بكات، بەڵام هێشتا كۆمپانیایەكی وەكوو گەنەڵ ئینێرجی ئەم پاڵپشتییەی بۆ كۆمەڵگە گرنگە، پێویستیمان بەوەیە مامۆستایان و دایكوباوك و خێزانەكان و خزم و كەسی قوتابیان، بەڕاستی گرنگە پاڵپشتی كەرتی پەروەردە و قوتابییەكانیان بن. گرنگە لە نێو پۆلەكاندا قوتابیان گوێ بگرن و فێر ببن، چی پێویستە بۆ كۆمەڵگە و وڵات و نیشتمانەكەتان پێویستە.“
