زاری كرمانجی- سۆران:
ئەو هاووڵاتییان بەهۆی بۆدوومانەكانی سەر سنوورەكانەوە گیان لەدەستداوە بە شەهید ئەژمار دەكرێن، لە سنووری ئیدارەی سەربەخۆی سۆران زیاتر لە 20 هاووڵاتی بەهۆی بۆردوومان و تۆپبارانەكانی ئێران و توركیا گیانیان لەدەستداوە.
جێگری سەرۆكی لیژنەی ئاسایش و بەرگری لە پەرلەمانی عێراق رایگەیاند” سەرۆكوەزیرانی عێراق رەزامەندی داوە، كە ئەو كەسانەی لەسەر سنوورەكانی هەرێمی كوردستان بە هۆی بۆردوومانەكان گیانیان لەدەستداوە بە شەهید هەژمار بكرێن و مووچەی شەهیدانەشیان پێ بدرێت، كە ژمارەیان 120 كەسە”.
سەگڤان سندی بۆ ماڵپەری فەری پارتی روونیكردۆتەوە ” لەگەڵ سەرۆكوەزیرانی تازەی عێراق كۆبووینەوە و داوامان كرد كە ئەو كەسانەی لەسەر سنووری هەرێمی كوردستان بە هۆی بۆردوومانەكان شەهید بوون، وەكو شەهید هەژمار بكرێن لە دەزگای شەهید، ئەویش لای خۆی نووسی و زۆری پێ باش بوو و رەزامەندیی نیشان دا، بۆیە ئەو كەسانە وەكو شەهید هەژمار دەكرێن و مووچەی شەهیدانەیان پێ دەدرێت”.
سندی ڕوونیشی كردەوە: “داواشمان كرد كە ئەوانەی زیانیان بەركەوتووە و گوندەكانیان چۆڵ كردووە، بگەڕێنەوە بۆ گوندەكانیان و قەرەبووش بكرێنەوە، چونكە زیانی زۆریان بەركەوتووە”.
دەشڵێ، ئەوانەی بە هۆی بۆردوومانەكان لەسەر سنوورەكانی هەرێمی كوردستان شەهید بوونە، ژمارەیان 120 شەهیدە، كە بڕیارە بە شەهید هەژمار بكرێن و بخرێنە سەر دەزگای شەهید لە عێراق و مووچەش لەلایەن عێراقەوە پێیان بدرێت.
