حـەمـيد سـەعیـد
بەڕێوەبەری سەركەوتوو نابێ هەموو كارەكانی بیزنسەكەی ئەنجام بدات و ٩٥٪ كارەكان دەبێ لەڕێگەی كەسانی تر و تیم ئەنجام بدرێت و تەنها ٥٪ كە كارەكان ئەنجام بدات كە زۆر گرنگ و چارەنووسسازن.
سەرەتا با بزانین تیم چیە ؟
تیم: كۆمەڵە كەسی پسپۆر و خاوەن پاڵنەر كە بۆ ئامانجێكی هاوبەش لەگەڵ یەكتر كار دەكەن.
تۆ وەكو بەڕێوەبەر دەبێ بۆ گەشەسەندنی كار و بیزنسی خۆت هەندێك بیرۆكەی باشت هەبێت، بەڵام جێبەجێ كردنی ئەم بیرۆكانە لەسەر شانی كەسانی ترە.
سەرەتا كە بیزنسێكی بچووك دەست پێ دەكەی هەموو كارەكان لەلایەن یەك یان دوو كەس ئەنجام دەدرێت، بەڵام دوای ئەوەی كە بیزنسەكە گەورە بوو، پێویستە هەندێك كەسی تر هاوكارمان بن لە كارەكەدا، بۆ نمونە كەسێك كە شێفەكی زۆر بەتوانا و شارەزایە، ریستۆرانتێك دادەنێت، ناوبرا ناتوانێت بە تەنیا هەموو كارەكان ئەنجام بدات و پێویستی بە چەندین كەسی پسپۆر وخاوەن ئەزموونە لەم كارەدا هاوكاری بن.
پرۆسەی دروستكردنی تیم:
هەنگاوی یەكەم: سەرەتا دەبێ دیراسە بكرێت كە كام لە كارمەندانی ئێوە توانای گەشەكردنیان هەیە و حەزیان لە پێشكەوتنە، پلەی پێ بدرێت و بكرێتە بەڕێوەبەری بەش، بۆ نمونە بەرێوەبەری فرۆشتنی كۆمپانیا نەماوە و بەڕێوەبەری گشتی پێویستیی پێ هەیە و ئەو نابێ لە سەرەتا لە دەرەوە بەڕێوەبەرێك دابمەزرێنێت و دەبێت دیراسەی فرۆشیارەكان دەكات كە كامیان توانا و پاڵنەری بوون بە بەڕێوەبەری فرۆشتنیان هەیە و یەكێك لەوان پۆستی بەڕێوەبەری فروشتنی پێ دەدات.
هەنگاوی دووەم: گۆڕینی پۆستی كاری كارمەندان، بۆ نمونە كەسێك كە خاوەن كەسایەتی دەرونی و گۆشەگیرە نابێ لە بەشی فروشتن دابنرێت و دەبێ دیراسە بكرێت كە هەركەس بە پێی توانا و جۆری كەسایەتی لە شوێنی گونجاو كار بكات.
هەنگاوی سێیەم: سپاردنی كارەكان بە دەرەوە و فریلانسەرەكان، بۆ نمونە كارەكانی گرافیك دیزاین، بەڕێوەبردنی پەیج و ماڵپەڕ بە كەسانی شارەزا بسپێرە كە وەكو فریلانسەر كار دەكەن بەبێ ئەوەی باج و بیمە و هەندێك خەرجی تر بكەوێتە سەر كۆمپانیا و بۆ ئەم كارانە پێویست نیە كارمەند دابمەزرێنیت.
هەنگاوی چوارەم: دەركردنی كارمەند، بیزنس وەكو پاسە، هەندێك كەس سوار دەبن و هەندێكی تر دادەبەزێن، ئەو كارمەندە كە هیچ سودێكی بۆ ئۆرگانەكە نەبێت، پێویستە دەربكرێت.
هەنگاوی پێنجەم: دامەزراندن، بیزنس وەكو ئاوی دەریاچە و پۆند، دەبێ ئاوی نوێ بێتە ناوەوەی تاكو نەرزێت و بوگەنی نەبێت و كارمەندی نوێی زیرەك دەبێتە هۆكاری زیادبوونی بەرهەمی كۆمپانیا یان ئۆرگان، هەڵبەتە بەپێ رێنمایی و نابێ دامەزراندن بە سۆزدارییەوە بێت.
پارامێتەرەكانی دامەزراندن:
١- كەسایەتی ٢- پسپۆری و كارامەیی ٣- سۆز، پەرۆشی و رەغبەت
یان بەڕێوەبەر كەسایەتی ئەو كەسە پەسەند دەكات یان نە، بۆ نمونە نابێ كەسی درۆزن، خائین بەكار، بێ متمانە دابمەزرێنێ، بۆ نمونە كەسێك دێتە چاوپێكەوتن و دەڵێت من لە كۆمپانیای ڕكابەر كار دەكەم و دەتوانم هەموو نهێنییەكانی ئەم كۆمپانیا بۆ ئێوە بێنم، ئەم كەسە كە خیانەت لەو كۆمپانیای دەكات كە پێشتر كاری تێدا كردووە، سبەینێ خیانەت لە كۆمپانیای تۆش دەكات.
هەروەها هەر كۆمپانیا یان ئۆرگانێك هەندێك یاسا و پەیڕەوی تایبەت بەخۆیان هەیە كە دەبێ رێزی لێ بگیرێت.
پسپۆری: هەندێك كار هەن كە بۆ پلە و پۆستەكانی خوارترە و دەتوانی لەڕێگەی خول و راهێنان فێریان بكەی، بەڵام بۆ پلەكانی بەڕێوەبەرایەتی نابێ كەسێك بێت و لەسفرەوە فێری كار كردن بكەیت وەكو بەڕێوەبەری ماركێتینگ، چونكە تا پێ دەگات تێچوویەكی زۆری دەوێت.
سۆز و پەرۆشی: كارمەندەكان دەبێ زۆر حەزیان هەبێت لەگەڵ تۆ كار بكەن و مۆرالیان بەهێز بێت و حەزیان لە پێشكەوتن بێت و نەك تەنیا بۆ كات بوراندن دەوام بكەن .
لە كۆتاییدا، هیچ بیزنسێك ناتوانێت بەبێ تیمێكی باش ڕێگای ڕاست بگرێتەبەر، گرنگ نییە بیرۆكەكەمان چەندە مەزنە یان چەند سەخت كار دەكەین، ئەگەر تیمێكی پشتیوانیكەر، هاوسۆز و بەتوانامان لەگەڵ نەبێت، ڕێگای گەشەكردن زۆر سەختتر دەبێت، بۆیە ئەگەر بیر لە پێشكەوتنی ڕاستەقینە بكەینەوە، باشترە لە ئێستاوە دەست بكەین بە تەرخانكردنی كات بۆ دروستكردنی تیمێكی بەهێز، چونكە سەركەوتن هەوڵێكی تیمییە.
