بەڕێوەبەری گشتی گەشت و گوزاری سۆران: ئامانجمانە گرنگی زۆر بە ناوچە گەشتیاریەكان بدەین

   165 پۆلیس تایبەت بۆ گەشت و گوزار دادەمەزرێندرێن

ماستەرپلانی گەشتیاری ئیدارەی سۆران لە واری جێبەجێ كردندایە

زاری كرمانجی – سۆران : 

لە دیدارێكی زاری كرمانجیدا، د. فەیسەڵ سادق بەڕێوەبەری گشتی گەشت و گوزاری سۆران، باسی گرنگیدان بە ناوچە گەشتیاریەكان دەكات و دەڵێت:” ئامانجمانە كەرتی گەشتیاری لە سنووری سۆران بەرەوپێش ببەین و ژمارەیەك پڕۆژەی گرنگیش لە واری جێبەجێ كردندان، ئاشكراشی دەكات، ژمارەیەك پۆلیسی گەشتیاری دادەمەزرێندرێن.

لە دەستپێكی قسەكانیدا، د. فەیسەڵ سادق بەڕێوەبەری گشتی گەشت و گوزاری سۆران، گووتی:” ئیدارەی سۆران بە گشتی خاوەنی ژمارەیەكی زۆری ناوچەی گەشتیارییە كە ژماریەكیان لەسەر ئاستی عێراق و هەرێمی كوردستان ناسراون، دیارترینیان ناوچەی ” گەلی عەلی بەگ، بێخاڵ، شنگلبانە، كۆڕەك، وەرتێ، زرارا، پڕژێ، ئاڵانە ئەمانە وچەند ناوچەیەكی دیكە كە بەردەوام گەشتیاری نێوخۆی و پارێزگاكانی دیكەی عێراق ڕووی تێدەكەن بە تایبەت لە ڕۆژە پشووەكان هەزاران گەشتیار ڕوو لە ناوچەكانی سنووركەمان دەكەن و كاتی خۆش بەسەر دەبەن.

دووپاتی لەوەكردەوە، بەشێوەیەكی گشتی دوای هێنانە كایەی ئیدارەی سەربەخۆی سۆران، كەرتی گەشت و گوزار لەم دەڤەرە قۆناغی باشی بڕیوە و گرنگی زۆری پێدراوە، لە پێشینەی كارەكانیش بیر لەوەكراوەتەوە چۆن گەشتیار بەشێوەیەكی ئاسان و سەلامەت بگاتە ناوچە گەشتیارییەكان، بۆیە هەوڵی ڕژد درایە بۆ نۆژەنكردنەوە و دروستكردنی ڕێگای نوێ بۆ ناوچە گەشتیارییەكان، لەلایەكی دیكەوە هەوڵماندایە كە ڕێكخستنەوەیەكی باش لە كەرتی گەشت و گوزار بكەین، بە تایبەت لە ڕووی كوالێتی و چاودێریی كردنی ناوچە و پڕۆژەكان، كارەكانمان بە باشی و بێ گرفت بەڕێوەدەچن.

بەڕێوەبەری گشتی گەشت و گوزاری سۆران، ئاماژەشی بەوەدا، وەكو بەڕێوەبەرایەتی گەشت و گوزار بەردەوام هانی وەبەرهێن و سەرمایەداران دەدەین تا پڕۆژەی گەشتیاری لە سنوورەكەمان جێبەجێ بكەن، خۆشبەختانە كۆمەڵێك پڕۆژەی گەشتیاری لە سنووری بەڕێوەبەرایەتیمان جێبەجێ دەكرێن و ساڵ بە ساڵیش پڕۆژەكان لە زیاد بووندان.

ڕوونی كردەوە، لە چیای كۆڕەك پڕۆژەیەكی ناوازتر لە واری جێبەجێ كردندایە كە خۆی لە هۆتێلێكی پێنج ئەستێرە دەبینێتەوە و بە ستانداردی جیهانی دروست كراوە، لەلایەكی دیكەوە هەر لە سنووری قەزای ڕواندز بە تایبەت لە شنگلبانە پەرەپێدانی زیاتر كراوە و یەكێكە لە ناوچە گرنگە گەشتیارییەكان، ساڵی ڕابردووش لەلایەن ڕێزدار مەسرور بارزانی سەرۆكی حكوومەتی هەرێمی كوردستان پڕۆژەیەكی ئاوی زۆر سەرنجڕاكێش لەوێ دەستی پێكرا كە توانرا گەشتیاری هاوینە پەلكێش بكات، لە هەمان كات چەند پڕۆژەیەكی نوێ لە سنووری سۆرانیش ئەنجامدراون لە ڕۆژانی ڕابردوو بە هاوكاری كەرتی تایبەت پڕۆژەی ڕووپەسەند كرایەوە كە لەلایەن كەرتی تایبەت و دەستەی وەبەرهێنان و گەشت و گوزارەوە چاودێری دەكرێت، بەگشتی پڕۆژەكانی گەشتیاری بەردەوامن و لە زیاد بووندان .

د. فەیسەل سادق، لە بارەی ماستەر پلانی گەشتیاری ئیدارەی سۆران، گووتی:” ماستەر پلانی گەشتیاری گرنگی و تایبەت مەندی خۆی هەیە، ماوەی چەند ساڵێكە كاری لەسەر كرا، خۆشبەختانە لە ئێستادا كەوتۆتە واری جێبەجێ كردن، پێشینەش بەو ناوچە گەشتیاریانەدرا كە مۆركێكی گشتییان هەیە و ناوچەی گرنگن و سۆرانی پێدەناسرێتەوە ئەوانیش ناوچەی بێخاڵ و تاڤگەی گەلی عەلی بەگن، كە بە دیزاینێكی جوان و سەرنجڕاكێش كەوتوونەتە واری جێبەجێ كردن و ئومێد دەكەین لە ماوەی ساڵێكدا كۆتایی بەكارەكان بهێندرێت تا بخرێتە خزمەتی دانیشتوانی سنوورەكە و گەشتیاران بە گشتی، هەروەها دوای تەواو كردنی ئەو پڕۆژانە، بەپێی ئەو ماستەرپلانەی دانراوە ناوچەی دیكەی بەدوا دادێت و گرنگی پێدەدرێت، ئەمەش وادەكات بوژانەوەیەكی زۆر لە سنوورەكە ڕوودەدات و وێڕای بەخشینی سیمایەكی جوانتر بە ئیدارەی سۆران هەلی كاریش بۆ سەدان هاووڵاتی دەڤەرەكەمان دەڕەخسێنێت.

بەڕێوەبەری گشتی گەشت و گوزاری سۆران، ئەوەشی خستەڕوو، پۆلیسی گەشتیاری یەكێكە لە پێویستییەكانمان وەكو بەڕێوەبەرایەتی گشتی گەشت و گوزار، پێشتر ئەو پلانەمان هەبوو بە هەماهەنگی لەگەڵ دەستەی گەشت و گوزار لە ڕێگەی پۆلیسی گەشتیارییەوە چەند ئەركێكی پێ بسپێردرێت لەوانە چاودێری شوێنەكانی پێ بكرێت، هەروەها ڕێكخستن و ئاسانكاری بۆ هاتووچۆی گەشتیارییان بكرێت و هەماهەنگی لەگەڵ كۆمپانیا گەشتیاریەكان بكرێت، لە هەمان كات هەندێ ماف و ئەرك هەن دەكەونە سەر گەشتیار و هەندێكیان دەكەونە سەر خاوەن پڕۆژە و ناوچەكان، ڕێكخستنەوەی هەموو ئەو كارانە لەجێبەجێكردن بڕیاری سزابێت یا خۆڕێخستنەوە بێت دەكەوێتە ئەستۆی پۆلیسی گەشتیاری . 

گووتیشی:” پێشتر ڕەزامەندییەك هەبوو لەسەر دامەزراندنی 165 پۆلیس بەشێوەی گرێبەست لەسەر ئاستی كوردستان و بەسەر بەڕێوەبەرایەتییە گشتییەكان دابەش دەكرێن كە بەڕێوەبەرایەتی گشتی گەشت و گوزاری سۆرانیش لەچوارچێوەی بەڕێوەبەرایەتییەكان ژمارەیەك پۆلیسی بەبەردەكەوێ، كە چەند مەرجێكی بوون بە پۆلیس دانربوون لەوانە دەبێت دەرچووی گەشت و گوزار بێت و زیاتر لە زمانێك بزانێت، هیوادارین لە داهاتووێكی نزیك دەستبەكار ببن تا خزمەتی زیاتری ناوچە گەشتیارییەكان بكەین”.