” پێویستە هاووڵاتییان پابەند بكرێن بەوەی لەبەردەم ماڵەكانیان نەمام بڕوێنن”
ڕاپۆرت-زاری كرمانجی
بۆ زیاتر بایەختان بە سەوزایی و ژینگەو جوانكاری شار، لەلایەن تیمەكانی شارەوانییەكانی سۆران، دەستكراوە بە چاندنی جۆرەها گوڵی سروشتی و زیادكردنی سەوزایی لە شۆستەو شەقامەكانی سەنتەری شاری سۆران، داواكاریشن لە هاووڵاتییان هەمووان هاوكاربن بۆ زیادكردنی سەوزایی شار.
ئەسعەد سەدیق، چالاكوانی ژینگەپارێزی لە سنووری ئیدارەی سۆران، بەزاری كرمانجی گووت: بایەخدان بە ژینگەو زیادكردنی سەوزایی، سەرچاوەی تەندروستی مرۆڤە، بۆیە ئەركە بە هەموو لایەك هەوڵبدەین پارێزگاری لە ژینگەی دەڤەرەكەمان بكەین، بە چاندنی نەمام و گوڵ و زیادكردنی سەوزایی، لە هەمووشیان گرنگتر پارێزگاری كردنە لەو گوڵ و درەخت و نەمامانەی دەچێندرێن، لەپێناو گەشەكردن و لەناو نەچوونیان.
ئەو چالاكوانەی ژینگەپارێزی ئاماژەی بەوەشدا: ئەوەی دەبینین ڕۆژانە لەلایەن تیمەكانی شارەوانییەكانی سنووری شارو شارۆچكەكانی ئیدارەی سۆران، بایەخی زۆر بە زیادكردنی سەوزایی و ڕێكخستنەوەی دارو درەختەكان دەدرێت لەسەر شۆستەو شەقامەكان، هەروەها بەپێی پێویست ئاویان بۆ دابین دەكرێت، بۆ ئەوەی دووچاری وشبوون نەبنەوە، بۆ ئەمەش پێویستی بە هاوكاری هەموو لایەكە لەپێناو زیادكردنی سەوزایی كە بەپێی ستانداری جیهانی بێت.
هەروەها كنێر ڕەسول ئافرتێكی دیكەی ژینگەپارێزی دانیشتووی شاری سۆران، بە زاری كرمانجی ڕاگەیاند: جگەلەوەی بایەخدان بە ژینگەو زیادكردنی سەوزایی سەرچاوەی تەندروستی مرۆڤە، لە هەمانكاتیشدا سیمایەكی جوانتر بەشار و شارو شارۆچكەكان دەبەخشێت، بۆیە پێویستە ئەو لایەنە بە گرینگەوە سەیر بكرێت، كەچی بەداخەوە چەندین ساڵە دەبینن هەڵمەتی نەمام چاندن ئەنجام دەدرێت كەچی گۆڕانكاریەكی وا نابینین لە بوژانەوەی ژینگە و زیادكردنی سەوزایی لە سنوورەكە، لەگەڵ ئەوەشدا ئومێدێك هەیە بەتایبەت لەم ساڵانەی دوایدا دا تیمەكانی شارەوانی و ژینگەپارێزان لە هەوڵی زیادكردنی سەوزایی دان.
ئەوەش دەخاتەڕوو: ئەگەر ڕۆشنبیری هاووڵاتییان نەبێت ئاستەمە پارێزگاری لە ژینگە بكرێت و سەزایی لە دەڤەرەكەمان بووژانەوە بەخۆیەوە ببینێت، چونكە تائێستا كەسانێك ئاژەڵەكانیان بەڕەلڵای سەر شۆستەو شەقام و گەڕەكەكان دەكەن، ئەمەش هۆكاری تێكدانی ژینگەیە، هەروەها گرینگە هاووڵاتییەك پابەند بكرێن بەوەی هەریەكەو لەبەردەمی ماڵەكەی چەند نەمامێك بڕوێنێت، ئەگەر كارێكی لەوشێوەیەش بەخۆیان ئەنجام بدەن، بەدڵنیاییەوە پارێزگاری زیاتریشی لێدەكەن، بۆ گەشەكردن و پێگەیشتنی نەمامەكە.
لای خۆیەوە شەوقی عەزیز، جێگری سەرۆكی شارەوانی سۆران، بە زاری كرمانجی گووت: بەیاخدان بە ژینگەو سەوزایی لە شارەكەمان بەردەوامی هەیە، بەشێوەیەكی بەردەوام لەلایەن تیمەكانمان دەست دەكرێت بە چاندنی جۆرەها گوڵ و درەختی سروشتی، لەگەڵ ئەوەشدا ڕۆژانە ئاو دەدرێن و پارێزگاریان لێ دەكرێت لەپێناو زوو گەشەكردن و جوانكاری و زیادكردنی سەوزایی لە سنوورەكەمان.
جێگری سەرۆكی شارەوانی سۆران گووتیشی: داواكارین لە هاووڵاتییان هاوكارمان بن بۆ پارێزگاری كردن لە گوڵ و درەخت و سەوزایی شارەكەمان، چونكە ژینگەی پاك سەرچاوەی تەندروستییە بۆ مرۆڤ، هەروەها هەركەسێكیش زیان بە دارو درەختەكان و سەوزایی سەر شەقام و شوێنە گشتییەكان بگەیەنێت، لێپێچینەوەی یاسایی لەگەڵ دەكرێت، ئەوەش لەپێناو بەرژەوەندی گشتیەوەیە.
