بۆ پارێزگاری لە كوردستان بە تانك خۆی بە ئۆتۆمبێلی بۆمبڕێژكراوی داعش كێشا

ئامادەكردنی – گولستان بەهجەت
لەگەڵ بیستنی ئەو رووداوە، راستەوخۆ دیمەنی نێو فلیمێكی رامبۆم بیرهاتەوە، كە لە دووا ساتەكانیدا دەبێتە شۆفێری تانك و خۆی بە كۆپتەرێك دادەكێشت، بەڵام لە راستیدا ئەمە دیمەنێكی هونەری نێو فلیمە و دوورە لە راستی، كە بە كۆمپیوتەر و كەرەستە تایبەتەكانەوە رێكخراوە، تەنها بۆ زیاتر بەدەست هێنانی خەڵات و زۆرترین بینەر، لەكاتێكدا لە كوردستان ئەم رووداوە بە شێوەی راستی و لەسەر دەستی پێشمەرگە روویدا.
لەكاتی شەڕی سەپێندراوی داعش بۆ كوردستان پێشمەرگە بەهەموو هێزێكەوە بەرگریان كرد و دەیان داستانیان تۆمار كرد، بەجۆرێك دەشێ هەزاران بەڵگەنامەی دیكۆمێنتاری و فلیمی لەسەر بەرهەم بهێندرێت، یەكێك لە داستانەكانی شەڕی داعش كە لە نێو هەموو كوردستان و هەتا بەشێك لە راگەیاندنەكانی جیهان دەنگی دایەوە و باسی لێوەكرا، رێگەگرتن بوو لە گەیشتنی تانكەرێكی تی ئین تی رێژكراو لە لایەن داعشەوە بۆ ناو هێزەكانی پێشمەرگە، كاتێ لەلایەن پێشمەرگەیەك كە شوفێری تانك بوو خۆی پێداكێشا و رێگەی لە شەهیدبوونی دەیان هاوسەنگەری دیكەی خۆی گرت.
جەمال محەمەد ساڵح، لە فەرماندەیی هێزەكانی پیشتوانی 1 ئەرك دەبینێت، ئەو دانیشتووی گوندی شێتنێی سنووری قەزای مێرگەسۆرە و خێزاندارە.
ئەو جگە لە ئەركی پێشمەرگایەتی خەریكی كاری رۆژانەیەتی، لە ماڵەكەی خۆی باسی ئەو رۆژ و رووداوەی بۆ كردین كە لە پێناو پاراستنی گیانی هاوسەنگەرەكانی دەستبەرداری گیانی خۆی بوو.
جەمال گووتی ” دوای ئەوەی نزیكی گوندێك بووینەوە رزگاری بكەین لە دەست تیرۆرستانی داعش، لە رێگەی بێتەلەوە ئاگادار كراینەوە تانكەرێكی گەورە بەرەو رووی هێزەكانی پێشمەرگە دێت، كاتێ چاودێریمان كرد بینیمان بەرەو رووی ئێمە دێت، زیاتر لە 350 پێشمەرگە لەو شوێنە بوون، ئەگەر بگەیشتبایە نێو ئەو هێزە بە دڵنیاییەوە زیانێكی زۆری گیانی لێدەكەوتەوە، بە تایبەتی ئەگەر ئەو تانكەرە بۆمب ڕێژكراو بێت، بۆیە زۆر تەقەمان لێ كرد، بەڵام لەبەر ئەوەی زۆر بە وردی دژە تانك بڕی لێدرا بوو، هیچ فیشەك و (ئار بی جی) كاری لە تانكەرەكە نەدەكرد و هەر دەهاتە پێش و زۆری نەمابوو بگاتە نێو هێزەكانی پێشمەرگە، كاتی ئەوەش نەمابوو بڵاوە بەو هێزە زۆرە بكەین، چونكە تانكەرەكە خۆی گەیاندە سەر رێگەی سەرەكی و بە خێراییەكی زۆر بەرەو رووی ئێمە و هێزەكانی پێشمەرگە دەهات، ئیتر لە وەستاندنی نائومێد بووین، هەر چی تەقەمان لێ دەكرد نەدەوەستا و لە كار نەدەكەوت”.
جەمالی فیداكار كە بەهۆی تەقینەوە بەهێزەكەی ئەو رۆژە پەردەی گوێی زیانی بەركەوتووە و وەك جاران نابیستێت، هەروەها روخساریشی ئاسەواری سووتانی ئەو رۆژەی پێَوە دیارە، بەدەم هەناسەیەكی قووڵەوە بۆ زاری كرمانجی دەدوا و گووتی ” كە ئاوەڕم دایەوە و ئەو هەموو هاوسەنگەرم بینی كە زۆریان نەماوە تووشی كارەساتێكی مەزن بن و شەهید یا برینداریان لێ بكەوێتەوە ، تەنها بیرم بۆ ئەوە چوو، هەر چۆنێك بێت رێگە لە گەیشتنی ئەو تانكەرە بگرم، لەبەر ئەوەی شوفێری تانكم، تانكەكەم بە ئاڕاستی تانكەرەكە خستە جوولە و لوولەی دەبابەشم ئامادە كرد، تۆپێكم تەقاند بەری نەكەوت، لەبەر كەمی مەودای نێوانمان زانیم فریای تۆپی دووەم ناكەوم، بۆیە سەیرێكی ئەو رێگایەم كرد كە تانكەرەكە پێدا دێت لە شوێنێكی نزیك، رێگاكە دەكەوتە نێوان دوو تەپۆڵكە، واتە ئەگەر خۆم بگەیاندبایە ئەو شوێنە مەجالی ئەوەی نەدەبوو تێبپەڕێت، یا خۆی بە تانكی من دەكێشا یا ناچار دەبوو بچێتە سەر گردەكان و وەردەگەڕا، بۆیە بە خێراییەكی زۆر تانكم لێخووڕی، ئەو كات دوو هاوسەنگەری دیكەم لەگەڵ بوون، داوام كرد خۆیان فڕێ دەنە خوارەوە و پاشەكشە بكەن تا رزگاریان بێت ئەوانیش وایان كرد، من بەرەو رووی تانكەرەكە چووم”.
لێرەوە لە قسەكردن وەستاندم و پرسیارم لێ كرد، ئەو ساتەی بەرەو رووی تانكەرەكەی داعش دەچووی بیرت لە چی دەكردەوە؟، جەمال ساتێك بیری كردەوە و گووتی ” ئەو دەم شەهید بوونم هەڵبژارد و بە خۆم دەگووت ئیتر گەڕانەوەم نییە بۆ لای ماڵ و منداڵ و كەس و كارم، وێنەی هاوسەر و منداڵەكانم هاتنە بەرچاو، وێنەی باوكی پیرم بە گۆچانەوە، بەڵام خۆم رادەستی چارەنووس كرد، مردن و ژیان بەدەست خودایە، شەهید بوونێكیش لە پێناو نیشتمان و رزگار كردنی گیانی دەیان پێشمەرگەی كوردستان بێت، هەزاران ژیانی بەقوربان بێت”.
شوفێری تانك گووتی ” تەنها چەند مەترێك مابوو لەگەڵ تانكەری تی ئێن تی رێژكراوی داعش بەر یەك بكەوین، بیرم لەوە كردەوە تەواوی ئەو شوێنانەی دەشێ ئاگری تەقینەوەكە لێ بێتە ناو تانك بگرم، خێرا وام كرد، خۆشم لە ناو تانك بە توندی بە سووكانەوە گرت، تا بەهۆی گوشاری بەر یەك كەوتنەوە پارێزراوتر بم، هەر چەند شەهید بوونم بۆ خۆم دانا بەڵام دواجار گیان شیرینە”.
ساتی تەقینەوە مەزنەكە:
جەمال محەمەد ساڵح، پێشمەرگەی ئازای نیشتمان كە نموونەی هەزاران پێشمەرگەی دیكەی گیان فیدای كوردستانە، باسی ساتی بەریەككەوتنی تانك و تانكەری تەژی لە تەقینەوە كرد و گووتی ” چاوەڕێی ئەوەم دەكرد شتێكی مەزن روودەدات و ئێستا ئاگر و ئاسنم بەسەر دەبارێت، ئێستا جەستەم رووبەڕووی پارچە پارچە بوون دەبێتەوە، لە ژێر لێو و هەندێكجاریش بە دەنگی بەرزەوە نزام دەكرد، لە ناكاو دەنگ و دووكەڵ و ئاگر و زەبری بەر یەككەوتنی تانك و تانكەر پێكەوە لە نێو تانك بڵاو بوویەوە، ئیتر نازانم چی روویدا، گوێم لە هیچ نەدەبوو، هیچم نەدەبینی، مێشكم بە هۆی دەنگە زۆرەكەوە كاس ببوو، ویزە ویزێكی لێدەهات دەمگووت ئێستا مێشكم دەتەقێت، چەند خوولەكی پێچوو بیرم كردەوە خێرا دەرگای تانك بكەمەوە و بچمە دەرەوە، كە چوومە دەرەوە، بینیم تانكەرەكەی داعش پارچە پارچە بووە، هاوسەنگەرەكانم بە راكردن بۆ لام دێن، ئێتر هیچم بیر ناهێتەوە، ئەوەندە نەبێت لە نەخۆشخانە چارسەریان بۆ كردم”.
ئەو پێشمەرگەیە هێشتا كاریگەرییەكانی ئەو تەقینەوەیەی بەسەرەوەیە، بەڵام زۆر دڵخۆشە بەوەی ئەو جارەش رزگاری بووە و ئێستا لە ناو ماڵ و منداڵ و كەس و كارییەوە ژیان بەسەر دەبات، لەوەش دڵخۆشتر ئەوەیە، خۆی و چەند لە هاوسەنگەری دیكەی، رۆڵێكی سەرەكییان هەبوو لەوەی گیانی دەیان پێشمەرگەی هاوسەنگەریان رزگار كرد، هەر ئەو پێشمەرگەیش بووە هۆی ئەوەی نموونەیەك لە ئازایەتی پێشمەرگە لە رووبەڕوو بوونەوەی تیرۆرستان لە جیهان بڵاو ببێتەوە و كەناڵەكانی راگەیاندنی جیهانی بە بایەخەوە باسیان لێوە كرد، ئەمە جگە لە كەناڵەكانی ناوخۆیی.
جەمال محەمەد ساڵح، یەكێك لە پێشمەرگەكانی كوردستان و لە فەرماندەیی هێزەكانی پیشتوانی 1 ئەرك دەبینێت، ئەو لە كۆتایی قسەكانیدا گووتی ” هەر كاتێك كوردستان پێویستی بە من بێت وەك باوك و باپیرانمان ئامادەیی فیداكارین، پێشمەرگایەتی و پاراستنی كوردستان لە خوێنمان دایە و پشتا و پشت بۆمان هاتووە”.