كابینەی نۆیەمی حكوومەتی هەرێم هەنگاوی باشی بڕیوە لەوەی كە هێزەكانی پێشمەرگە لەژێر چەتری وەزارەتی پێشمەرگە رێكبخرێنەوە
” گرنگە لەسەر ئاستی سیاسی و تەنانەت رێكخراوەیی و جەماوەریش رێز لە رۆڵ و خەباتی پێشمەرگە بگیرێت”
“پێشمەرگە بە خوێن ئەو راستییەی سەلماند كە هێزێكە بۆ داكۆكیكردن لە ئازادی و چەسپاندنی بنەماكانی دیموكراسی و پێكەوە ژیان تێدەكۆشێ “
سۆران سرێشمەیی – زاری كرمانجی
لە میانەی بەشداریكردنی لە پڕۆگرامی “هیوا”ــی زاری كرمانجی، عەقید جەمیل سرێشمەیی بەرپرسی راگەیاندن و رۆشنبیری لەیەكەی ٤٤٤ ی سەر بە فەرماندەی سپیلك، باس لە ئەرك و ڕۆڵ ڕێزی پێشمەرگە دەكات و گووتی:”هەر لە سەرەتای دروست بوونیەوە پێشمەرگە بۆتە رەمز و سمبوڵی نەتەوەیی و وەك فریاد رەسی میللەتی كورد و بگرە جیهانیش. بەتایبەت دوای پەلاماری تیرۆریستانی داعش بۆ سەر خاكی پیرۆزی كوردستان ئەو تەم و مژەی رەواندەوە كە جاروبار لێرەو لەوێ بە مەبەست باسی لێوە دەكرا. وە بەخوێن ئەو راستییەی سەلماند كە پێشمەرگە هێزێكە بۆ داكۆكیكردن لە ئازادی و چەسپاندنی پتری بنەماكانی دیموكراسی و پێكەوە ژیان تێدەكۆشێ.”
زیاتر گووتی:” پێشمەرگە ڕێزی خۆی لە شوناس و خەباتی چەندان ساڵە وەرگرتووە، راستە كەسانێكی دەروون نەخۆش مەبەستیان بووە لە ئەركی پیرۆزی پێشمەرگە كەم بكەنەوە، من دڵنیام و زۆریش رۆشنە بە فیتی نەیارانی كورد دەیانەوێت ناوی پێشمەرگەو خەباتە پیرۆزەكەی لەكەدار بكەن. بەڵام دیارە لە هەوڵەكانیان كورتیان هێناوە چونكە پێشمەرگە لە هەناوی میللەتێكی ستتەمدیدە لەدایك بووەو شورەیەكی پۆڵاینە بۆ پارێزگاری كردن لە شكۆو كەڕامەتی هاوڵاتی كورد.”
دەربارەی لە یادكردنی ڕۆڵ و قوربانیدانی پێشمەرگە، ئەو فەرماندەیە هێمای بۆ ئەوە كرد:” لە كاتی جەنگ و تەنگانەدا كە پێویستیان بە پێشمەرگە دەبێت كاردانەوەكان ئەرێنین و دەڵێن:”هەموومان پێشمەرگەین”، بەڵام كە شەڕو مەترسیەكان رەوانەوە كەس باسیشی ناكات. بۆیە گرنگە لە سەر ئاستی سیاسی و تەنانەت رێكخراوەیی و جەماوەیش ڕێز لە ڕۆڵ و ئەرك و خەباتی پێشمەرگە بگیرێت و هاوكارو پاڵپشتی سەرەكی بن بۆ ئەوەی پێشمەرگەش ئەو هەستەی لا بەرجەستە بێت كە رێز لێگراوەو قوربانیەكانی نادیدە نەگیراوە، چونكە ئەرك و باری خەباتی پێشمەرگایەتی هێندە گرانە پێویستە هەوڵی دەستەگەری هەبێت و هەمووان شان وەبەر ئەو ئەركە قوڕسە بدەن.”
سەبارەت بەوەی كە ئایا پێشمەرگە كەرەستەیەكە بەدەست كەسانی ترەوەو تەنها بۆ موچە پێشمەرگایەتی هەڵبژاردووە، عەقید جەمیل سرێشمەیی دەڵێت:” پێشمەرگەش مرۆڤە و جگە لە پاراستنی سنوورەكان ئەركی دابینكردنی بژێوی خێزانی و پەروەردەكردنیشی لە ئەستۆدایە. دەیان نمونەی گیانفیدای پێشمەرگە هەن كە هیچ كەسێك ئامادە نییە بۆ هەزاران دۆلار بەو شێوەیە گیانی خۆی بخاتە مەترسی بە جۆرێك نێوانی مەرگ و ژیان چەند چركەیەك بووە، بەتایبەت لە جەنگی دژی تیرۆرستانی داعش بینیمان كەوا چۆن پێشمەرگە بە ئۆتۆمبێلەكەی بەر بە هامەڕو تانكەری تەژی لە “تی ئێن یی”، خۆكوژی داعشێك دەگرێت، تەنها بۆ ڕزگاركردنی گیانی هەڤاڵەكانی و ڕێگریكردن لە پێشڕەوی دوژمن ئامادەی وەها گیانفیدایەك بووە، كێ هەیە ئەمە بۆ پارە یانژی موچە بیكات. بە پێچەوانەوە ئەمە دەرئەنجامی ئەو پەیوەندییە رۆحیەیە كە لە نێوان خاك و خوێنی پێشمەرگەدا هەیە. لە وڵاتانی تر سەربازی زۆرە ملێ و كرێگرتەی هەیە، بەڵام ئەوەتا رۆڵەكانی ئەم نەتەوەیە بەبێ ئەوەی هیچ كەسێك ناچاری بكات یانیش زۆری لێبكرێت بە خواستی خۆی پێشمەرگایەتی هەڵبژاردووە و هاوكات لەگەڵ بەرگری كردن لە خاك و خەلكەكەی ناوی كورد و پرسە هەستیارەكەی كە بریتیە لە سەربەخۆی هێندەی تر بەرەو پێشەوە بردووە بەتایبەتیش لەسەردەمی جەنگی دژی تیرۆرستانی داعش، هەر بۆیەشە وەك ڕێزێك بۆ شكۆو پیرۆزی ناوی پێشمەرگە وەك (كەفیل)، ئەژمار ناكرێت كە دیسانەوە كەسانێك بە مەبەست ئەو بابەتەیان بە ئاڕاستەیەكی تردا بردووە كە گوایە ئەمە بێ ڕێزییە بەرامبەر بە پێشمەرگە دەكرێت.”
لە كۆتایدا بەرپرسی راگەیاندن و رۆشنبیری یەكەی ٤٤٤ ی سەر بە فەرماندەی سپیلك، تیشكی خستە سەر رۆڵی گەنجان لە نێو ڕیزی هێزەكانی پێشمەرگەو ئاماژەی بەوەدا:” گەنجان رۆڵی بەرچاویان هەبووە لە نێو ڕیزی هێزی پێشمەرگەی كوردستان. جا بەهۆی ئەوەی پێشمەرگایەتی بریتیە لە پڕۆسەیەكی بەردەوامی مەشق و ڕاهێنان و چاڵاكی سەربازی. گرنگە بەشێوەیەكی فراوانتر دەرفەت بۆ گەنجان بڕەخسێنرێت و سوپایەكی یەكگرتووی نیشتمانی درووست بكرێت، خۆشبەختانە كابینەی نۆیەمی حكومەتی هەرێمی كوردستان هەنگاوی باشی بڕیوە لەوەی كە هێزەكانی پێشمەرگە لە چوارچێوەی یاسا و لەژێر چەتری وەزارەتی پێشمەرگە ڕێكبخرێتەوە بەتایبەت كە دوای داواكاری هاوپەیمانان و بوونی ئیڕادەیەكی نێوەخۆی سەبارەت بەو پرسە ڕەنگە لەماوەیەكی نزیكدا ببین بە خاوەنی سوپایەكی یەكگرتووی نیشتمانی.”
دواشیكرد:” لە ڕێگەی خولی ڕۆشنبیری و پێگەیاندن هەوڵبدرێت ئاستی ڕۆشنبیری پێشمەرگەكان بەرەو پێشتر ببرێت. چونكە گرنگە هاوتەریب لەگەڵ ئەركی دلسۆزانەیان كە بریتیە لە پاراستنی سنورو دەستكەوتە نەتەوەی و سیاسیەكانی هەرێمی كوردستان هەروەها گرنگیشە پێشمەرگە هەڵگری پەیامی ڕۆشنبیری بێت و لایەنی لەوە تێبگات كە چەك بۆچی و لە پێناوچی كردۆتە شان و لە چ حاڵەتێك بەكاری دەهێنێت”.
