شاخەوان عەبدوڵا، لە وەڵامی قسەكانی رێبوار تەها پارێزگاری كەركووك” كۆمەڵێك بەڵگە داتا دەخاتەڕوو، دەڵێت : لە بری خۆخەریككردن بە وەڵامدانەوەی من، وەڵامی ئەو كەسانە بدنەوە كە لەنێو كەركووك قسە بە حوكمی كوردی دەڵێن.
لەسەرەتای وەڵامدانەوەكەیدا شاخەوان عەبدوڵا دەڵێت: سەرەتا وەک ئەوەی ئێوە کەسانێک بن هیچ هەڵە و کەموکوڕیتان نییە و نابێت کەس رەخنەتان لێبگرێت، ئەوەتا هەفتەیەکە خۆت و کابرایەک کە لە ئەنجوومەنی پارێزگایە، وازتان لە هەموو ئەرکێکتان هێناوە وخەریکی وەڵامدانەوەی منن، خۆزگە لە جیاتی ئەو هەموو بێڕێزی و وەڵامکارییە، نووسراوێکت ئاڕاستەی وەزارەتی کارەبا دەکرد و دەتگوت فەرموو کاک شاخەوان ئیتر خۆت و خەڵکی ئەو ناوچانە نیگەران مەبن، ئەو بڕیارەم هەڵوەشاندەوە، کە تا ئێستا نەتکردووە.
زیاتر نووسیویەتی: لە وەڵامی دوایین لێدوانیشتان بۆ کەناڵی ٨، کە دەڵێیت یەک پڕۆژەی پەرلەمانتار شاخەوان عەبدوڵا بڵێن بۆ کەرکووکی کردبێت. پێش ئەوەی وەڵامت بدەمەوە، ئەوەی من بناسێت، دەزانێت حەزم بە ململانێ و شەڕەدەنووک لە نێوان خۆمان وەکوو کورد نییە و شەڕی من لەگەڵ خەڵکی شۆڤێنیی داگیرکەرە، بۆ ئەو بابەتەش بەم چەند خاڵە وەڵامت دەدەمەوە:
یەکەم: جەنابت دەڵێیت کاک شاخەوان چی کردووە بۆ کەرکوک؟ گەورەترین پڕۆژەی من لە کەرکووک، هەمواری یاسای هەڵبژاردنی ئەنجوومەنی پارێزگاکان بوو بە شێوەیەک کە لە کەرکووکیش هەڵبژاردن ئەنجام بدرێت و راکان جبووری نەمێنێت و جەنابت ببیتە فەرمانبەری پارێزگای کەرکووک، کە ٢٠ ساڵە هەڵبژاردن نەکراوە.
دووەم: لە هەمووی گرنگتر، جەنابت و ٥ پەرلەمانتاری تری کورد لە دوای ١٦ی ئۆکتۆبەر تا ساڵی ٢٠٢١ لە بەغدا بوون، بەڵام رۆژانە سووکایەتی بە ئاڵای کوردستان دەکرا و ئەگەر میدالیای قەد ئاوێنەی ئۆتۆمبێلیش بوایە لێیان دەکردەوە، بەڵام من وێڕای هەموو هەڕەشەکان، لە مانگی ٩ی ساڵی ٢٠٢١ ئاڵای كوردستانم هێنایەوە کەرکووک و سەرەتا لەسەر نووسینگەی خۆم هەڵم دا و دواتریش بۆسەر بارەگاکانی پارتی دوای گەڕانەوەیان بۆ کەرکووک.
سێیەم: یەکێکی تر لە پڕۆژە گەورەکانی کەرکووک و دەوروبەری تا مەندەلی و خانەقین، هەڵوەشاندنەوەی بڕیارەکانی بەعس و گەڕانەوەی زەوییەکانە بۆ خاوەنە رەسەنەکانیان.
چوارەم: پرۆژەی گەیاندنی خزمەتگوزاری بۆ گەڕەکە کوردییەکان کە خەڵکی کەرکووک باش دەزانن رێگە نەدەدرا پڕۆژەیان بۆ بکرێت بە بیانووی ئەوەی ئەو گەڕەکانە زێدەڕۆن، بەڵام لە مانگی ٤ ی ساڵی ٢٠٢٢ نووسراوێکمان ئاڕاستەی سەرۆک وەزیرانی پێشوو مستەفا کازمی کرد، کە ئەو گەڕەکانە واقیعی حاڵن و لەسەر بنەمای ئەوە، بڕیار درا پڕۆژەکانیان بکرێت و دەست کرا بە دروستکردنی شەقام و کۆنکریتکردنی گەڕەکە کوردییەکان.
پێنجەم: پڕۆژەی ئاوی پەنجا عەلی، کە ٢٠ ساڵە ئاوی سوێر دەخۆن و بێئاو بوون، ئێمە سەرەڕای رێگرییەکانی راکان جبووری، ئەو پرۆژەیەمان ئەنجام دا و ڕەزامەندیی وەزیری شارەوانیمان هێنا و تێچووەکەیشی دابین کرا، سوپاس بۆ خودا کێشەی کەمئاوی لەو گەڕەکە چارەسەر کرا، جگە لەوە پڕۆژەی لێدانی چەندان بیر لە گەرەکی رزگاری (فەیلەق)، هەروەها کۆنکریتکردنی سەدان کۆڵان و دابینكردنی دەیان محاویلەی کارەبا بۆ گەڕەکە کوردییەکان و ئەنجامدانی شەقامی جووتسایدی پەنجا علی کە لە گەڕەکێکی ترەوە گواستمانەوە بۆ پەنجا علی و دەیان پرۆژەی تر.
شەشەم: لەسەر ئاستی نەتەوەیی سەرلەنوێ زیندووکردنەوەی مادەی ١٤٠ دوای ١٢ ساڵ لە راگرتنی و دەستپێکردنەوە بە قەرەبووکردنەوەی هاووڵاتیان و هێنانی بڕیاری پارچە زەوییەک بۆ ئاوارەکان.
حەوتەم: تێپەڕاندنی یاسایی بەپارێزگابوونی هەڵەبجە
هەشتەم: هەمواری هەردوو پرۆژەیاسای شەهیدان و زیندانیانی سیاسی لە بەرژەوەندیی خەڵکی کوردستان.
نۆیەم: وەرگرتنەوەی ٣٧٥ ملیار دیناری جووتیارانی کوردستان هی ساڵەکانی ١٤ و ١٥ و ١٦ و جێکردنەوەی لە یاسای ئاسایشی خۆراک.
دەیەم : نەهێشتنی سەربازگەی شۆراو و هەڵكوتانە سەر گەڕەکە کوردییەکان لە نیوەی شەودا، لەگەڵ سەدان پرۆژەی تری گەورە، کە بە هەموو ئەو بەرپرس و ناوە گەورانەی کورد نەکرا كە لە بەغدا بوون و ئێمە کردمان.
یازدە: تەرخانکردنی بودجە بۆ لیوای ٢٠ی هاوبەش و تەواوکردنی مامەڵەکانیان کە بە هۆیەوە ٣٧٠٠ گەنجی ئیمە دامەزران.
دواخستنەڕووی ئەم بەڵگە و داتانە شاخەوان عەبدوڵا دەڵێت: ئەوە بەشێکی کەمە لە پرۆژەکانی من، بەڵام جەنابت پێم بڵێ جگە لە هەڵگرتنەوەی کلێنس و مەقەبا و تەسلیمکردنی قەزاكانی دوبز، داقووق و پۆلیس و بەڕێوەبەرایەتیی کشتوکاڵی کەرکووک بە برایانی حەویجە، ماوەی ساڵێکە چی پڕۆژەیەکی دیكەت بۆ كەركووك کردووە؟ من رێبوارێکم دەویست قائد بێت نەک مۆزەف.
شاخەوان عەبدوڵا لە كۆتایی وەڵامدانەوەی بە چەند رستەیەك دەڵێت : خۆزگە لە پاڵ وەڵامدانەوەی من، وەڵامێکی دوایین بابەتی محەمەد تەمیمتان دەدایەوە، یاخود وەڵامی حەلبووسیتان دەدایەوە، کە لەناو کەرکووک و لە شارێکی زۆرینە کوردیدا، سووکایەتی بە حوکمی کوردی و سەرکردەکانی کورد کرد.
