ئیسماعیل ئیبراهیم
ئەوەی ئێستا تیمەكانی پارتی لە كابینەی 9 دەیكەن هەلێنجێندراوی ئەو دونیا بینینەیە كە لە سیاسەتی حزبەكەیانەوە لە ئاست هەر جومگەیەكەوە سەرچاوەی گرتووە.
مرۆڤ سازی و دەستگرتن بە سەرچاوەی مرۆڤی بۆ بەهێز كردنی بنەماكانی دەوڵەتداری یەكێكە لە مەرجە سەرەكییەكانی سەركەوتن و بنیادنانی حكومەتێكی بەهێز .
لە پەنای ئەم كارەی حكومەت و دەوڵەتداری خاڵێكی گرنگترە كە پێویستە هەمیشە بە هەند وەربگیرێت، تا بوارەكانی سەركەوتن مسۆگەرتر و رێگاكان كورتر و كێشە و كۆسپەكان لاوازتر یا هەر نەیهێڵێت، ئەویش راگرتنی هاوسەنگی و باشكردنی پەیوەندی نێوان تیمەكانی لایەنە سیاسییەكانی بەشدار بووی حكومەتە، ئەوەی تا ئێستا لە كابینەی 9 بەدی دەكرێت رێزگرتنە لەو بابەتە، بەجۆرێك بەهیچ شێوەیەك كاری سیاسیی تێكەڵ بە كاری دەوڵەتمەداری ناكرێت، بە تایبەتی لە لایەن تیمی پارتی دیموكراتی كوردستانەوە، لەو كاتەی ئەم كابینەیە پێكهاتووە تا ئێستا دەیان كێشەی سیاسی لە نێوان پارتی و باقی لایەنەكانی دیكە سەریهەڵداوە، بەڵام هەرگیز تیمی پارتی نەچووتە ژێر باری بە سیاسی كردنی كاری حكومەت لەگەڵ كاری سیاسی.
ماوەیەك بەر لە ئێستا بەهۆی تەقینەوەكەی هەولێر كە ئەفسەرێكی دژە تیرۆری سلێمانی كرایە ئامانج و تۆمەتبارە دەستگیر كراوەكان دانیان بەوەنا كە لەلایەن چەند بەرپرسێكی باڵای یەكێتی بەو ئەركە راسپێردراون، گرژی كەوتە نێوان پارتی و یەكێتی، بەڵام كاینەی 9 نەكەوتە ژێر كاریگەری پەیوەندی سیاسی و حزبی و رێگەیان نەدا تێكەڵ بە كاری دەوڵەتداری بكرێت.
بەڵام یەكێتی وەك هەمیشە هەوڵی ئەوە دەدات بۆ هەر كارێك كە لە بەرژەوەندی خۆی بێت و لە بەرژەوەندی گشتی نەبێت گوشار لە پارتی دەكات بۆ ئەوەی خواستە حزبی و هەندێكاریش كەسییەكان و گرووپەكانی ناو یەكێتی بێنێتە دی، بەڵام سەرۆكی حكومەت نەچۆتە ژێر ئەو مەرج و گوشارانە، ئەمەش وایكردووە تیمی یەكێتی لە ناو حكومەت بەپێ رێنماییەكانی حزبەكەیان نیگەران بن، بۆیەش هەندێكیان ئامادەی كۆبوونەوەكانی سەرۆكایەتی ئەنجوومەنی وەزیران نەبوون و نیگەرانی خۆیان گەیاندۆتە پارتی.
بەڵام لە چی نیگەرانن، لەوەی پارتی دەڵێن داهاتی سلێمانی بە خاڵە سنوورییەكان و ناوخۆوە بخرێنە خزمەت دامەزراوەكان و پڕۆژەكانی حكومەت لە سلێمانی و مووچەی پێ بدەن.
لەوە نیگەرانن كە دەیان هەزار پارچە زەوی بە بێ پلانی و حەزی چەند بەرپرسێك دەفرۆشرێت و داهاتووی ئەو شارەی پێ وێران دەكەن.
لەوە نیگەرانن كە پارتی دەڵێت ئەو پارەیەی بۆ پڕۆژەكانە و لە بانك دانراوە دەستكاری نەكرێت.
دەیەوێت هەمان ئەو دۆخەی لە سلێمانی درووستی كردووە، بیگوازێتەوە بۆ هەولێر و شارەكانی دیكە.
یەكێتی لەوە لە پارتی نیگەرانە ناوی ئەو بەرپرسانەی ئاشكرا كردووە كە لە تیرۆر كردنی هاووڵاتییان دەستیان هەبووە.
یەكێتی لەوە نیگەرانە پارتی لە بەغدا داوای مافی خۆی دەكات كە لە ئەنجامی هەڵبژاردنەكانەوە بۆی ماوەتەوە.
ئەمانەی سەرەوە تەنها نیگەرانییە بێ ماناكانی یەكێتین لە پارتی لە ئاست دەوڵەتداری، لە ئاست سیاسییەوە یەكێتی كۆمەڵێك نیگەرانی دیكەی نالۆژیكی هەیە كە تەنها دەشێ وەك نوكتە باسیان لێوە بكرێت.
لە بەرامبەریشدا پارتی تاسەر موخ بڕوای بە پێكەوەیی هەیە لە خزمەتگوزاری و بەرێوەبەردن، پارتی پێیوایە هەمیشە دەشێ كێشەكان بە دیالۆگ چارەسەر بكرێن، پارتی تا سەر ئێسك لێبووردە بووە لە ئاست ئەو كێشانەی بۆی دروست دەكرێن، ئەمەش بەهۆی هەستكردن بە بەرپرسیارییەتێكی قوورس كە لەسەر شانیێەتی، چ وەك حزب یا وەك سەرۆكایەتی كردنی هەرێم و حكومەتێك كە بەخۆێنی هەزاران رۆڵەی ئەم وەڵاتە بنیاد نراوەو هیوای زیاتر لە 50 ملیۆن كوردی جیهانە.
بۆیەش سەرۆكی تیمی وەزاری حكومەت لە سەردانی كردنیان بۆ لای لایەنە سیاسییەكان بەو پەڕی تێگەیشتنەوە لە دۆخەكە گووتی ” كێشەكانی ئێمە و یەكێتی گەورە نین و دەشێ بە گفتوگۆ چارەسەری بكرێن” ئەمەیە تێگەیشتنی زانستی و هەستی بەرپرسیارییەت و پێكەوەیی بوون لە لای تیمەكانی پارتی لە حكومەت و لە دەرەوەی حكومەتیش.
