لە ئیدارەی سۆران سەدان خاوەن پێداویستی تایبەت داوای دامەزراندن دەكەن

بەڕێوەبەری چاودێری و گەشەپێدانی كۆمەڵایەتی سۆران: هەزار ناومان بەرز كردۆتەوە
” بۆ دابینكردنی مووچە و هاوكاری مانگانە چاوەڕوانی بەغدا دەكەین “

زاری كرمانجی – سۆران:

لەسنووری ئیدارەی سەربەخۆی سۆران هەزاران خاوەن پێداویستی تایبەتی لێیە و ڕێژەیەكی زۆریان تا ئێستا بێ بەشن لە هاوكاری مانگانە و مووچە، ئەمەش وای كردووە كەوا لە دۆخێكی خراپدا بژین، لە ڕێگەی زاری كرمانجی داوای دامەزراندن لە حكوومەت دەكەن.
خاوەن پێداویستیە تایبەتەكان بەسەر چەند جۆرێكی دیاری كراو دابەش بوونە، دیارترینیان شەلەل دەماغ، بیركۆل، كورتەباڵا، نابینا، نابیست، تالاسیما، ئۆتیزم و بیركۆل .
ئەحمەد حوسێن هاووڵاتیەكی نابینایە لە ئیدارەی سۆران، بە زاری كرمانجی گووت:” چەند ساڵێك بەر لە ئێستا ناوی خۆم لە بەڕێوەبەرایەتی چاودێری و گەشەپێدانی كۆمەڵایەتی سۆران تۆمار كرد و لە ڕێگەی لیژنەیەكی پزیشكی هەڵسەنگاندن بۆ چاوەكانم كرا، 100% مافی ئەوەم پێدرا وەك خاوەن پێداویستیەكی جۆری نابینا مانگانە هاوكاریەكم پێبدرێت، ناوەكانیش ئەوكات بەرز كرایەوە وەزارەت یەكێك لەوان ناوی من بوو، كەچی چەند ساڵ تێدەپەڕێت هیچمان بۆ نەكرا .
زیاتر گووتی:” پێویستە حكوومەت هەوڵێكمان بۆ بدات بۆ ئەوەی ئێمە مانگانە مووچەیەكمان پێبدرێت تا بەشی نەخۆشی و حەب و پێداویستی دیكەمان بكات.
لەلایەكی دیكەوە، هاووڵاتییەكی خاوەنی سێ مناڵی خاوەن پێداویستیی، تەنها مووچە بۆ یەكێك لە مناڵەكانی بڕاوەتەوە، كە نەی ویست ناوی بڵاو بكرێتەوە، دەڵێت:” چەندین جار ناوی مناڵەكانم لە چاودێری سۆران تۆمار كردووە، تا ئێستا هیچمان بۆ نەكراوە كە شایستەی ئەوەن حكوومەت مووچەیان پێ بدات و ناتوانن سەرپێی خۆیان بووەستن، نەبوونی هاواكری و مووچە گرفتی زۆری دروست كردووە، چونكە پێویستیان بە خەرجی مانگانە و داودەرمان و پێداویستی دیكە هەیە، بۆیە لە ڕێگەی زاری كرمانجی داوا لە حكوومەت دەكەین لیژنەیەك بۆ تۆمار كردنی خاوەن پێداویستی نوێ پێكبهێنێت و مووچەیان بۆ دابین بكرێت”.
لای خۆیەوە، توران خدر، بەڕێوەبەری چاودێری و گەشەپێدانی كۆمەڵایەتی ئیدارەی سۆران، بە زاری كرمانجی ڕاگەیاند:” لە سنووری شەش قەزای سەر بە بەڕێوەبەرایەتییمان زیاتر لە چوار هەزار خاوەن پێداویستی مووچەی مانگانەیان بۆ دابین كراوە، لەو ڕێژەیەدا بەشێكیان فەرمانبەری حكوومین مانگانە لەگەڵ مووچەكانیان 100 هەزار دیناریان پێدەدرێت، ئەووانەی فەرمانبەریش نین مووچەیان 150 هەزار دینارە .
بەڕێوەبەری چاودێری و گەشەپێدانی كۆمەڵایەتی ئیدارەی سۆران، دەڵێت:” لە ماوەی ڕابردوو، لە شار و شارۆچكەكانی كوردستان ناوی 13 هەزار كەس تۆمار كراوە، لە ئیدارەی سۆرانیش نزیكەی هەزار ناو تۆماركراون و لیژنەی پزیشكیشیان پێكراوە كە پێكهاتوون لە خاوەن پێداویستی تایبەتەكانی جۆری ” بیركۆل، ئۆتیزم، داون، شەكرەی منداڵانە و ئەمانە و چەند جۆرێكی دیكە بەرز كراوەتەوە .
گووتیشی:” ڕەزامەندی ئەنجوومەنی وەزیران و وەزارەتی كار و كاروباری كۆمەڵایەتیشیان بۆ وەرگیراوە بۆ بەغدا بەرزكراوەتەوە تا ئێستا حكوومەتی عێراق ڕەزامەندی لەسەر ئەو ناوان نەداوە تا مووچە و هاواكاری مانگانەیان بۆ دابین بكات.
ئەو بەرپرسەی حكوومەت، نایشارێتەوە، خاوەن پێداویستی تایبەتییەكان لە دۆخێكی خراپدان و پێویستیان بەو هاوكاری مانگانەیە، بۆیە لەسەر نوێنەرانی كورد لە بەغدا پێویستە هەموو هەوڵی خۆیان بخەنەگەڕ و دوور لە سیاسیەت هەوڵی ئەوە بدەن مافەكانی خاوەن پێداویستییەكان دەستەبەر بكەن.
گووتیشی:” ئەوانەی خاوەن پێداویستی تایبەتی نابیست، نابینا، جەستەین ناویان بەرز نەكراوەتەوە، هەرچەندە ئەوانەش مافی خۆیانە و پێویستیان بە هاوكاری دارایی مانگانەیە، بەڵام حكوومەت ڕەزامەندی لەسەر تۆماركردنی ئەو جۆرانە نەدراوە تا كاری لەسەر بكەین.