لەبەر پەكەكە بە سەدان گوند و ئاوایی ئیدارەی سۆران بێ خزمەتگوزاری ماونەتەوە

زاری كرمانجی – سۆران:

بە دەیان ساڵە پارتی كرێكارانی كوردستان “پەكەكە” لەگەڵ توركیا شەڕ و پێكدادان و ناكۆكیی سیاسییان هەیە، لەم نێوەندەداش هاووڵاتییانی هەرێمی كوردستان بوونەتە قوربانی، ترس و دڵەڕاوكێی بۆ رەوەند و كۆچەرییەكان دروست كردووە و بە سەدان گوندی ئیدارەی سۆران چۆڵكراون، جگە لەوەی زیانێكی زۆری گیانی و ماددی بەر هاووڵاتییانی سڤیل كەوتووە.
ماوەی سی ساڵ زیاترە، “پەكەكە” لە ناوچە شاخاوی و گوندە سنووریەكانی هەر چوار قەزای رواندز، سۆران، مێرگەسۆر و چۆمان نیشتەجێ بووە و لە ماوەی ئەو ساڵانەدا بەردەوام شەڕ و ناكۆكیان لەگەڵ توركیا هەیە، بەهۆی ململانێ و شەڕ و رووبەڕووبوونەوەكانیان سەدان هاووڵاتی سڤیل لە سنووری ئەو چوار قەزایە بوونەتە قوربانی و ژمارەیەكی زۆری گوندیش چۆڵكراون و بووتە كێشە و گرفت بۆ هاووڵاتییان”.
بەپێی زانیاریەكانی دەست زاری كرمانجی كەوتووە، پێشتر چەكدارانی پەكەكە لە سنووری برادۆست و باڵەكایەتی، چەندین ناوچەی ستراتیژیان لە گوند و كوێستانەكان بەدەستەوە بوو، بارەگا و بازگەی خۆیان بە تەواوی پێداویستیەوە دانابوو، لە ئێستادا چەكدارانی پەكەكە هیچ ناوچەیەكی دیاری كراویان لە ژێر دەست نەماوە و تەنها شەڕی پارتی زانی دەكەن، ئەمەش وای كردووە توركیا بە هەڕەمەكی تۆپباران و بۆردومانی ئەو ناوچانە بكات”.
پارتی كرێكارانی كوردستان “پەكەكە”حزبێكی كوردی چەپە و بە هزری ماركسی و لینینییەوە لە ساڵی 1978 لە باكووری كوردستان دامەزراوە و دواتر لە چیای قەندیل نیشتەجێ بوون، ساڵی 1992 ڕوویان لە شارەدێی سیدەكان و گوندە سنوورییەكانی ئیدارەی سۆران كردووە و زیاتر لە 30 ساڵە لەگەڵ توركیا شەڕ و ناكۆكییان هەیە.
شێرزاد خورشید، چالاكوانێكی سنووری ئیدارەی سۆرانە، بۆ زاری كرمانجی گووتی:” چەكدارانی پەكەكە دەیانەوێت بە خەڵكی كوردستان بڵێن” من هەژموونم هەیە و هێزم هەیە و بەرگریكارم و دژی توركم و جەنگ لە پێناو كورد و كوردایەتی دەكەم، لە ناوچە سنووریەكان بەشێوەی پارتی زانی تەقە لە سەربازانی تورك دەكەن، بەمەش هێزەكەی سوپای توركیا زیاتر پەلكێشی دەڤەرەكە و كوردستان دەبێت و گوندە سنوورییەكانیان كردۆتە قوربانی خۆیان”.
زیاتر گووتی” ئەم جۆرە كارانەی پەكەكە زیان بە هەرێمی كوردستان و گوندە سنوورییەكان دەگەینێت، بەهانە دەداتە سوپای توركیا كە لە كوردستان نەكشێتەوە و ئارامی كوردستان تێكدەدەن، ئەمە لە كاتێكدایە چەندین گوندی ئیدارەی سۆران چۆڵ بوونە و خەڵكێكی زۆریش زیانی ماددی و گیانییان پێگەیشتووە”.
د. رێبین سەلام، مامۆستای زانكۆ و چاودێری سیاسی، بە زاری كرمانجی گووت:” چەكدارانی پەكەكە هاوشێوەی كۆمپانیای سیكیوریتییان لێ هاتووە، هەر كەسێك یا هەر دەوڵەتێك پارەی پێبدات بۆ ئەوان ئیش دەكەن، لە تەواوی كوردستان بوونەتە كێشە و گرفت، هۆكارێكن بۆ ئاوەدان نەكردنەوەی گوند و شارەكەمان بە نموونە شەنگاڵ كە بەهۆی پەكەكەوە نەتوانراوە ئاوەدان بكرێتەوە، پێویستە دەست بە راماڵینی پەكەكە لە هەموو ئەو ناوچانە بكرێت.
زیاتر گووتی:” پەكەكە كوڕ و كچی هەرزەكاری كوردستان دەبەن و دەیكەن بە پێخۆری ئایدۆلۆژیە سەقەت و پەقەتەی كە دنیا پێی رەوا نییە، تەنها خۆیان پێ راست و دروستە و لە خشتە بردراون، ئەوان هەرێمی كوردستان بە ناشەرعی دەزانن، ئەمە لە كاتێكدایە ئەوان ناشەرعین و هیچ كەس و لایەنێك ئەوانی پێ رەوا نییە، زۆر سەیرە حكوومەتی هەرێم و خەڵك لە پەكەكە بێزارن و بۆچی دوور ناكەونەوە و كوردستان بەجێناهێڵن.
سوارە ئەكرەم، قایمقامی قەزای چۆمان، بە زاری كرمانجی راگەیاند:” بە شێوەیەكی گشتی چەكدارانی پەكەكە، كێشە و سەرئێشەن بۆ خەڵك و تەنانەت بۆ حكوومەتیش، لە هەر كوێ نیشتەجێ ببن خۆیان دەسەپێنن و گوێ بە بەرژەوەندی گشتی نادەن و هەمیشە گرفت بۆ ئیدارە و كاروبارەكانی حكوومەت و هاووڵاتییان و رەوەند و كۆچەر و جووتیاران دروست دەكەن.
قایمقامی قەزای چۆمان، دەڵێت:” وەرگرتنی باج و سەرانە بە ناچاری كاری سەرەكی چەكدارانی پەكەكەیە، ئەمە جیا لە رفاندنی منداڵ و هاووڵاتییانی هەرێمی كوردستان، تێكدانی بیر و ڕای خەڵكە، لە سنووری قەزای چۆمان بەهۆی نائارامی و هەبوونی پەكەكە 10 گوند چۆڵكراون، هەروەها 13 گوندی دۆڵی باڵەیانیش دەكەونە ژێر دەسەڵات و كاریگەریەكانی پەكەكە، لەو شوێنانەی كە پەكەكە بڕیار بەدەستە، رێگر و ئاستنەگیان بۆ جێبەجێ كردنی پڕۆژە خزمەتگوزارییەكان دروست كردووە، بە تایبەت لە دۆڵی باڵەیان كە وەكو حكوومەت ناتوانین هیچ پڕۆژەیەكی خزمەتگوزاری لەو گوندانە جێبەجێ بكەین.
سوارە ئەكرەم، گووتیشی:” ئەو شەڕ و پێكدادانەی لە نێوان پەكەكە لەگەڵ توركیا بوونی هەیە هۆكارە بۆ ئەوەی رەوەند و كۆچەریەكان و جووتیارانیش كەمتر بە بەراورد لەگەڵ ساڵانی رابردوو سەردانی دەڤەرەكەمان بكەن، ئەمەش بێگومان زەرەر و زیانی زۆری بە كەرتی ئاژەڵداری و كشتوكاڵی داوە، دواجار زیان دەگەینێت بە ئابووری وڵات، هۆكاری سەرەكی دروستبوونی ئەو نائارامییەش، پارتی كرێكارانی كوردستان “پەكەكە “یە”.
غەفوور ئەحمەد، قایمقامی قەزای مێرگەسۆر بە زاری كرمانجی راگەیاند:” پەكەكە بە درێژای مێژوو كێشەو گرفت بووە بۆ خەڵكی ناوچەكە و تەنانەت بۆ حكوومەتیش، بەهۆی پەكەكە خەڵكێكی زۆری دەڤەرەكەمان زەرەری گیانی و ماددییان پێگەیشتووە.
قایمقامی مێرگەسۆر، دەڵێت:” بەهۆی پەكەكە و نائارامی 65 گوندی سنوورەكەمان چۆڵ كراون، هەر بەهۆی ئاڵۆزی پەكەكە و توركیا نزیكەی 20 كەس شەهید بوونە.
لای خۆیەوە، هەژار حەكیم بەڕێوەبەری راگەیاندن و پەیوەندییەكانی ئیدارەی سەربەخۆی سۆران، بە زاری كرمانجی راگەیاند:” پەكەكە حزبێكە لە باكووری كوردستان دامەزراوە و پەیوەندی بە هەرێمی كوردستانەوە نییە، ناكۆكی و ململانێی سیاسییان لەگەڵ توركیا هەیە، پێویستە ئەو شەڕە ببەنە نێو خاكی خۆیان كە توركیایە.
بەڕێوەبەری راگەیاندن و پەیوەندییەكانی ئیدارەی سۆران، گووتیشی:” هەر بزاڤێكی چەكداری هەڕەشەیە بۆ سەر ژیانی خەڵك، لە رابردووش چەندین كەس بەهۆی ئەو شەڕ و پێكدادانەی نێوان پەكەكە و توركیا لە سنووری ئیدارەی سۆران بوونەتە قوربانی و زیانی زۆری ماددیش بەر گوندنشینان و هاووڵاتییان كەوتووە” .