” لەماوەی دوو ساڵی بە قەزابوونی خەلیفان زیاتر لە 100 ملیار دینار بۆ پڕۆژە خزمەتگوزارییەكان تەرخانكراوە “
دیدار-زاری كرمانجی
قائیمقامی قەزای خەلیفان، لە دیدارێكی زاری كرمانجی تیشكدەخاتەسەر كارو پڕۆژەخزمەتگوزارییەكانی سنوورەكەو گرینگی ماستەرپلانی گەشتیاری و دەشڵێت: گوژمەی زیاتر لە 100 ملیار دینار لە سێكتەرە جیاوازەكان، پڕۆژەخزمەتگوزاری لە سەنتەری قەزا و ناحیەی سرێشمەو گوندەكانی كەوتنە بواری جێبەجێكردنەوە.
مەغدید عەریف ئەحمەد، قائیمقامی قەزای خەلیفان، بە زاری كرمانجی ڕاگەیاند: یەكێك لە دەسكەوتەكانی كابینەی نۆیەمی حكوومەتی هەرێمی كوردستان بە سەرۆكایەتی مەسرور بارزانی، هاتنەكایەی قائیمقامیەتی قەزای خەلیفان و كردنەوەی ناحیەی سرێشمە بوو، ئەمەش بە دەسكەوتێكی گەورە دادەنرێت، بۆ زیاتر پێشكەشكردنی خزمەتگوزاری بۆ هاووڵاتییان فرەوان بوونی یەكە ئیدارییەكان لە دەڤەرەكەدا، هەروەك كۆمەڵێك پڕۆژەی خزمەتگوزاری گرینگ كەوتنە بواری جێبەجێ كردنەوەو بۆ خزمەتی هاووڵاتییانی سنوورەكەمان.
قائیمقامی قەزای خەلیفان، ئاشكراشی دەكات: لەماوەی دووساڵی بە قەزا بوونی خەلیفان تا ئێستا گوژمەی زیاتر لە 100 ملیار دینار لە سێكتەرە جیاوازەكان، پڕۆژەخزمەتگوزارییەكان لە سەنتەری قەزا و ناحیەی سرێشمەو گوندەكانی كەوتنە بواری جێبەجێكردنەوە، پڕۆژەكانیشمان بریتی بوونە لە بواری ڕێگاوبان و ئاو و ئاوەڕۆ و نۆژەنكردنەوەو دروستكردنی قوتابخانەو قیڕتاوكردن و كۆنكرێتكردنی شەقامە ناوخۆییەكان و چاككردنی ڕێگای سەرەكی چەند گوندێك و ئەمانەو چەندین پڕۆژەی دیكەی جۆراو جۆر.
مەغدید عەریف ئەحمەد، قائیمقامی قەزای خەلیفان، ئاماژەی بەوەشدا: بەشێك لە پڕۆژەخزمەتگوزارییەكان تەواوكراون و كەوتوونەتە خزمەت هاووڵاتییان، هەندێ لە پڕۆژەكانیش لە جێبەجێكردنن، هەروەها بۆ داهاتووش چەندین پڕۆژەی گرینگی خزمەتگوزاری لە پلان و بەرنامەی جێبەجێ كردنن، بە ئامانجی زیاتر خزمەتكردن بە خەڵكی سنوورەكەمان، هەروەك ئامانجی حكوومەت ئاوەدانكردنەوەو پێشكەشكردنی خزمەتگوزارییە بە هاووڵاتییان.
لەبارەی ماستەرپلانی گەشتیاری قائیمقامی قەزای خەلیفان، دەڵێت: یەكێك لە پڕۆژە گرینگەكان كە لە سنووری ئیدارەی سەربەخۆی سۆران جێبەجێ دەكرێت، داڕشتنەوەو پێداچوونەوەی ماستەرپلانی گەشتیاری سنووری ئیدارەی سەربەخۆی سۆران بوو، كە بەشێكی ئەو ماستەر پلانە، دەكەوێتە سنووری قەزای خەلیفان، ئێستا قۆناغی یەكەمی دەستكراوە بە جێبەجێ كردنی لە تاڤگەی گەلی عەلیبەگ، هەروەها قۆناغەكانی دیكەش جێبەجێ دەكرێت، ئەو پڕۆژەیە گرینگە لە بواری گەشتیاری، هەروەك سنووری قەزای خەلیفان ناوچەیەكی گرینگی هەیە بۆ ئەنجامدانی پڕۆژەی گەشتیاری، دەكرێت لە ڕێگەی وەبەرهێنەران كاری لەسەر بكرێت.
قائیمقامی قەزای خەلیفان، ئەوەش دەخاتەڕوو: بە جێبەجێكردنی ماستەرپلانی ئیدارەی سەربەخۆی سۆران، خەلیفان پێدەنێتە قۆناغێكی پێشكەوتووتر، چونكە قەزای خەلیفان دەكەوێتە دەروازەی ئیدارەی سۆران، پڕۆژەی ماستەرپلانەكەش بە هەمان شێوە لە دەروازەی قەزای خەلیفانە كە خۆی دەبینێتەوە لە تاڤگەی گەلی عەلیبەگ و دروستكردنی تێلیفریك، ئەمەش جگەلەوەی سیمایەكی پێشكەوتوو بە دەڤەرەكە دەبەخشێت، لە هەمانكاتیشدا هەلی كار بۆ هاووڵاتییان و گەنج و لاوانی سنوورەكە دەڕەخسێنێت، هەروەها گەشتیارێكی زیاتر ڕوو لە سنوورەكە دەكات.
