” بۆ بەرهەمهێنانی بەربوومەكەم پەینی ئاژەڵی و ناوخۆیی بەكاردهێنم و كەمتر پشت بە پەینی كیمیایی دەبەستم “
زاری كرمانجی-ڕواندز
لە (نەمامگەی ئاكۆیان) هاووڵاتییەكی قەزای ڕواندز ساڵانێكە دەستی كردووە بەرهەم هێنانی جۆرەها بەروبوومی كشتوكاڵی باخچەیی بەشێوەیەكی جیاواز و سەردەمیانە لە سێ وەرزی ساڵ بەربوومەكەی بەرهەمدەهێنێت، هەروەها زیاتر لە 100 جۆری ترێ لە نەمامگەی بەرهەمهێناوە، بە جوتیاری نموونەیی ناوچەكە ناو و ناوبانگی دەركردووە، بەمەش بەڕێوەبەرایەتی گشتی كشتوكاڵی سۆران ڕێزلێنانی پێشكەش دەكات.
لەمبارەیەوە تەحسین برایم، خاوەن نەمامگەی ئاكۆیان لە سنووری قەزای ڕواندز، ڕایگەیاند: هەر لەسەرەتاوە خواستی زۆرم لەسەر بەرهەمهێنانی كشتووكاڵی باخچەیی هەبووە، بۆیە ساڵانێك لەمەوبەر بیرم لەوە كردەوە كە پەرە بواری كشتوكاڵی بدەم، دواجار هەستام بە دروستكردنی نەمامگەیەك لە ئاكۆیانی سنووری قەزای ڕواندز، ساڵ لەدوای ساڵیش زیاتر پەرەم بە كشتوكاڵەكەمدا بە ئەزموون وەرگرتن لە وڵاتانی پێشكەوتوو، بەمەش توانیوومە جۆرەها بەربوومی باخچەیی لە نەمامگەكەم بەرهەمبهێنم، بەتایبەتیش لەم ساڵانەی دوایدا پێشكەوتنی بەرچاوم بەخۆیەوە بینیووە، كە خەڵكی بەجوتیاری نموونەیی دەڤەرەكە ناوم ببەن، هەروەها خواستی زۆر لەسەر بەربوومەكەم دروست بێت، چونكە بەشێوەیەكی سروشتی بەرهەمیان دەهێنم، بۆ گەشەكردنی پشت بە پەینی ئاژەڵی سنوورەكە دەبەستم.
لە بەشێكی قسەكانیدا ئاماژەی بەوەدا: جۆرەها بەربوومی باخچەیی بەپێی وەرزەكانی ساڵ بەرهەمدەهێنم، یەكێك لەوانەش زیاتر لە 100 جۆری ترێ لە نەمامگەكەم بەرهەم دەهێنم، لە وەرزەكانی ساڵ، بەڵام ئەو جۆە ترێیانەی بەرهەمیان دەهێنم لە ڕووی زۆری و كەمی بەربوومەكەیان جیاوازیان هەیە، بەتایبەت ئەو جۆرەی لەگەڵ كەش و هەوای ناوچەكەمان گونجاو نییە بەرهەمەكەی وەك پێویست نییە، واتە كەمترە بەراورد بە بەرهەمی ئەوانەی دیكە، شارەزاییم پەیداكردووە لە ئەنجامی بەرهەمهێنانی.
ئەو جوتیارە نموونەییەی ڕواندز هێما بۆ ئەوەش دەكات: بۆ گەشە كردنی بەربوومی باخچەییم، هەرگیز مەوادی كیمیایی بەكار ناهێنم مەگەر بەدەگمەن نەبێت، بەڵكوو لە بڕی ئەوە سوود لە پەینی ئاژەڵی ناوچەكە وەردەگرم، هەروەها پەین لە پاشماوەی گەڵاو پێكهاتەی نەمامگەكەمان دروست دەكەینەوە، ئەوەش وایكردووە كە موشتەری تایبەتیمان هەبێت، بۆ كڕین و ساغكردنەوەی بەربوومەكەمان، لە هەمانكاتیشدا زۆرجار بەربوومەكە بەشێوەی خۆڕایی بە خزم و ناسیاوەكانمان دەدەین، هی واش هەیە بۆ كڕینی ڕوومان تێدەكات، هەركەسێكیش بەربوومەكەی بردبێت جارێكی دیكە سەردانی كردوینەتەوەو داوای كردووەتەوە.
لەدوا قسەكانیدا تەحسین برایم، دەشڵێت: خێزانەكەمان جێگەی دەستخۆشین كە هاوكاریم دەكەن لە ئەنجامدانی كارەكشتوكاڵییەكانمدا، شانازیش بە پیشەی خۆم دەكەم، چونكە هەم داهاتێك لە ڕێگەی بەرهەمهێنانی كشتووكاڵی بۆ خۆمان دەستەبەر دەكەین، هەروەها خزمەتێكە بۆ دەڤەرەكەمان و وڵاتەكەمان، هیوادارم هەموو لایەك بتوانین زیاتر پەرە بە كشتووكاڵ و بەربوومی ناوخۆیی بدەین.
لای خۆیانەوە ڕاگەیاندنی بەڕێوەبەرایەتی گشتی كشتوكاڵی سۆران، بڵاویان كردەووەتەوە: لەهەمبەر ئەو كارەی ئەو جوتیارە نموونەییە لەسنوورەكەمان ئەنجامی دەدات، لەماوەی ڕابردوودا كامەران حسێن مامەند بەڕێوەبەری گشتیی كشتوكاڵی سۆران، بەیاوەری جێگری بەڕێوەبەری گشتیی كشتوكاڵی سۆران و بەڕێوەبەری كشتوكاڵی ڕواندز و بەڕێوەبەرانی زەوی و زار، پلان دانان، ژمێریاری ناو دیوانی بەڕێوەبەرایەتی گشتی كشتوكاڵی سۆران، لەنزیكەوە (نەمامگەی ئاكۆیان) بەسەر كردەوە لەسنووری قەزای ڕواندز.
باسیش لەوە كراوە: مەبەست لە سەردانەكەدا بەسەركردنەوە و لە نزیكەوە بینینی شاكار و نموونەی كارە جوانەكانی ئەم جووتیارە نموونەییە بوو لە نەمامگەكەی، لەلایەن بەڕێوەبەری گشتیی كشتوكاڵی سۆران و ستافی یاوەری سوپاس و پێزانینی خۆیان بەخشی بە (تەحسین برایم) لەهەمبەر ئەم كارە جوانانەی خۆی و خانەوادەكەیان و برەو دانیان بە بواری كشتوكاڵی و هیوای سەركەوتن و بەردەوامیان بۆ خواستن.
