“داوامان كردووە شەقامی نێوان رواندز – رانیە فراوان بكرێت”

هەژار حوسێن-رواندز:
سەرۆكی شارەوانی رواندز، دەڵێت:” راگەیاندنی ئیدارەی سەربەخۆی سۆران، لەلایەن كابینەی نۆیەم كاریگەری زۆری هەبووە لەسەر پڕۆژە خزمەتگوزارییەكان و خزمەتكردن بە هاووڵاتییان.
نەجات مەجید، سەرۆكی شارەوانی رواندز، بە زاری كرمانجی راگەیاند، راگەیاندنی ئیدارەی سەربەخۆی سۆران، دەستكەوتێكی گەورە بوو بۆ ناوچەكە، كۆمەڵێك پڕۆژەی گرنگ لە قەزای رواندز رەزامەندیان لەسەر دراوە، لەوانە هەندێكیان جێبەجێ كراون، ئەوانی دیكەش كاركردنیان تیادا بەردەوامە و هەندێكیش لە تەندەر و پلاندان بۆ جێبەجێ كردنیان”.
سەرۆكی شارەوانی رواندز، ئاشكراشی دەكات:” پڕۆژەكان بریتین لە قیڕكردنی شەقامەكانی چەند گەڕەكێكی سەنتەری شاری رواندز، لەوانە گەڕەكی بانەزێوك كارەكانی بە كۆتا هاتووە، قیڕ كردنی گەڕەكی شەهیدان لە قۆناخی كۆتایدایە، پڕۆژەكانی تریش كۆنكرێت و ئاو و ئاوەڕۆ و دیواری پاڵپشت و دروستكردنی پەیژە لە هەندێك شوێن و پێشكەشكردنی چەند خزمەتگوزاریەكی دیكە بە هاووڵاتییان.
نەجات مەجید، سەرۆكی شارەوانی رواندز، گوتیشی:” داوای چەند پڕۆژەیەكی گرنگمان كردووە لەوانە بە دوو سایدكردنی دەروازەكانی بێخاڵ و جوندیان بۆ شاری رواندز، هەروەها داوای پڕۆژەیەكی دیكەی گرنگمان كردووە، ئەویش دروستكردن و فراوانكردنی شەقامی سەرەكی نێوان هەر دوو قەزای رواندز و رانیە، كە دەبێتە هۆی جوولەیەكی باشی بازرگانی و بووژانەوەی ناوچەكە و ئاسانكاری بۆ هاتووچۆی خەڵكی سنوورەكەمان و دەوروبەری”.