بەڕێوەبەری هاتووچۆی ئیدارەی سۆران:

چارەسەركردنی ئەو ئۆتۆمبێلانە بەشێوەیەك دەبێت خەڵك زەرەرمەند نەبێت

محەمەد ئامۆكەیی- سۆران:

بوونی ژمارەیەكی زۆر لە ئۆتۆمبێلی بێ تابلۆ و سەرەتا لە تەواوی كوردستان، بەتایبەت لە ئیدارەی سەربەخۆی سۆران، بۆتە گرفتێكی گەورە لەبەردەم پۆلیسی هاتووچۆ، تەنانەت خاوەن ئۆتۆمبێلەكانیش، ساڵی رابردوو بە بڕیارێكی وەزارەتی ناوخۆ، ئۆتۆبێلەكانیان تۆمار كرد، بەڵام لە نوێترین بڕیاری وەزارەتی ناوخۆ، خاوەنی ئەو ئۆتۆمبێلانە بێ هیوا دەكات و داوا دەكەن پێداچوونەوە بە بڕیارەكەدا بكرێت.
لە سنووری سۆران، زیاتر لە هەشت هەزار ئۆتۆمبێلی بێ تابلۆ، مەنەفێسست، تابلۆی بیانی، ژمارە كاتی بوونیان هەیە، ئەمەش سەرجەمیان لەنێو مەفرەزەكانی هاتووچۆ رووبەڕووی كێشە دەبنەوە، هەروەها راگرتنیشیان لە نێو بازاڕ قەدەخەیە و رێگەپێدراو نین.
تەها عومەر، خاوەنی یەكێك لەو ئۆتۆمبیلانەیە، دەڵێت: كاتێك وەزارەتی ناوخۆ بڕیاری تۆماركردنی ئەو ئۆتۆمبیلانەی دا بووە جێگای دڵخۆشیمان لەبەر ئەوەی زۆربەی ئەو كەسانەی ئۆتۆمبێلی بێ سەرەتایان پێیە، خەڵكی كەمدەرامەتن و توانای ئەوەیان نییە ئۆتۆمبێلی بە تابلۆ و بێ كێشە بكڕن، زیاتر لە ساڵێك دەبێت ئێمە چاوەڕوانی ئەوەین چارەنووسی ئۆتۆمبێلاكانمان یەكلاببێتەوە، بەڵام جێگەی نیگەرانیە ئێستا بڕیاری ناو تۆماركردنەكە هەڵوەشایەوە داوادەكەین پێداچوونەوە بەم بڕیارە بكرێت، چونكە حكوومەت دەتوانێت بڕێك پارەمان لێوەرگرێَت و لەبەرامبەریشدا ئۆتۆمبێلەكانمان تابلۆ یان باج بكات، بەمەش كۆتای دێت بەم گرفتە كە چەندین ساڵە نەتوانراوە چارەسەرێكی گونجاویان بۆ بدۆزرێتەوە”.
وەهاب ئیسماعیل، یەكێكی دیكەیە لەو كەسانەی ئۆتۆمبێلێكی بێ سەرەتای بە نزیكەی 10 هەزار دۆلار كڕیووە باس لەوەدەكات:” ئێمە ناتوانین بە ئارەزووی خۆمان سەفەر و هاتووچۆ بكەین لەبەر ئەوەی ئۆتۆمبێلی بێ سەرەتا ناخۆشە و دەستمان لەسەر دڵە لەوەی تووشی مەفرەزەكانی هاتووچۆ ببین”.
بەپێی ئەو ئامارانەی بڵاوكراونەتەوە لەسەر ئاستی پارێزگا و ئیدارە سەربەخۆكان زۆرترین رێژەی ئۆتۆمبێلی بێ سەرەتای لە ئیدارەی سۆرانن، ئەمەش وایكردووە رۆژانە مەفرەزەكانی هاتووچۆ لەگەڵ خاوەنی ئەو ئۆتۆمبێلانە لێپێچنەوە بكەن و زۆرجاریش بەهۆی جێبەجێكردنی یاسا دەمەقاڵی و كێشە دروستبووە، ساڵی رابردووش لە پێناو كەمكردنەوەی زۆری ئەو ئۆتۆمبێلە بێ سەرەتا سەرپەرشتیاری ئیدارەی سۆران بە بڕیارێك ئەو پێشانگایانەی داخست كە مامەڵەی كڕین و فرۆشتنیان بە ئۆتۆمبیلی بێ سەرەتا دەكرد.
لای خۆیەوە، عەقید زرار حوسێن، بەڕێوەبەری پۆلیسی هاتووچۆی ئیدارەی سۆران، سەبارەت بە هەبووی رێژەی زۆری ژمارەی ئۆتۆمبێلی بێ سەرەتا، بە زاری كرمانجی راگەیاند:” بەپێی ئاماری سەر ژمێریەكە 8700 ئۆتۆمبێلی بێ سەرەتا لە سنوری سۆران تۆمار كراون، بۆ ئەو مەبەستە لەگەڵ وەزارەتی ناوخۆ لەسەر هێلین بۆ ئەوەی بتوانین بە میكانیزمێك چارەسەرێكی گونجاویان بۆ بدۆزینەوە.
بەڕێوەبەری پۆلیسی هاتووچۆی ئیدارەی سۆران، دەڵێت:” چەندین كۆبونەوەمان لەسەر ئەو پرسە ئەنجامداوە، چاوەڕوانی بڕیاری وەزارەتی ناوخۆین تا بڕیارێكی گونجاو لە وەزارەتی ناوەخۆ دەربچێت، ئەمە بەپێی بڕیاری ژمارە یەكی ساڵی 2016 و بڕیاری ژمارە حەوت مامەڵە لەگەڵ ئەو ئۆتۆمبێلانە دەكەین .
گووتیشی:” ئێمە لەبار و گوزەرانی خەڵكی خۆشمان تێدەگەین ئەم جۆرە ئۆتۆمبێلانە لە دەستی كەسانێكی كەم دەرامەتدان، هەموو هەوڵی خۆشمان دەدەین لەگەڵ وەزارەت چارەسەرێكی گونجام كە هەم خەڵك زەرەمەند نەبیت، هەمیش حكوومەت بتوانێت چارەسەرێكی گونجاو بۆ ئەم جۆرە ئۆتۆمبێلانە بدۆزێتەوە، بەڵام تا دۆزینەوەی چارەسەرێك ئێمە بەپێی بڕیار و یاساكانی بەردەست ئیجرائاتی یاسایی لەگەڵ ئەو جۆرە ئۆتۆمبێلانە دەكەین”.
بەڕێوەبەری پۆلیسی هاتووچۆی ئیدارەی سۆران، سەبارەت بە كرین و فرۆشتنی ئۆتۆمبێلی بێ سەرەتا لە پێشانگاكان، روونیكردەوە:” رێنماییەكان بۆ كاركردنی پێشانگاكانی ئۆتۆمبێل دەرچووە ئێمە وەك بەڕێوەبەرایەتی پۆلیسی هاتووچۆ لە ئیدارەی سۆران وێنەیەك لە رێنماییەكانمان داوەتە ئیدارەی سۆران، وێنەیەكیش بۆ قایمقامی قەزای ناوەندی سۆران نێردراوە، كە دەبێت سەرجەم پێشانگاكانی ئۆتۆمبێل بەپێی ئەو رێنمایانە كاربكەن، رێگە پێدان بەكاری پێشانگاكان لەلایەن كاروچالاكییەكانی بەڕێوەبەرایەتی هاتووچۆی سۆران نییە، ئەو بابەتە دەبێت قایمقامی قەزاكان چارەسەر بكەن.