مەهدی محەممەد – زاری كرمانجی :
یەكێك لە گەورەترین بەرەنگاریی و تەحەددیاتی بەردەم گەنجان، چۆنیەتی مامەڵەكردنە لەگەڵ سۆشیاڵ میدیا، بەشێك لە گەنجان پێیان وایە سۆشیاڵ میدیا ژیانی ئەوانی سەراوژێر كردووە و بەرەو دونیای خەیاڵ و كەسایەتی ساختەی بردوون، بەشێكی دیكەشی، سۆشیاڵ میدیا بە هۆكاری خەمۆكیی و گۆشەگیركردنی گەنجان دەزانن و دەڵێن ئەگەر سۆشیاڵ میدیا دادگایی بكرێت گەورەترین تاوانباری لە ناوبردنی ئامانج و ئاواتی گەنجانە .
هاوكار نەسرەدین، سۆشیاڵ میدیا بە یەكێك لە تاوانبارانی قەیرانی تەندروستی دەروونی گەنجان- هەرزەكاران دەزانێت و دەڵێ “لە سەردەمی ئێستادا، سۆشیاڵ میدیا گەورەترین زیانی لە گەنجان داوە و تووشی سەرلێشێواوی و تا ڕادەیەكی زۆریش كۆنترۆڵی كردوون،” دەشڵێت “بەشی زۆری گەنجانی كورد هەمیشە هەوڵی لاساییكردنەوەی داوە، بۆیە پەنا دەباتە بەر سۆشیاڵ میدیا بۆ پڕكردنەوەی كاتەكانی و خراپ بەكارهێنانی سۆشیاڵ میدیا جا لەڕێگەی ئەكاونتی ساختەوە بێت یان ئەكاونتی كەسی، بۆیە ئینستاگرام و سناپچات و تیكتۆك، كاریگەریی ترسناكی لەسەر كۆمەڵگە بە گشتی و گەنجان بە تایبەتی دروست كردووە و شێوازی تەندروستی پەیوەندی خۆشەویستی و تێكەڵاوی كۆمەڵایەتی گەنجانی گۆڕیوە و ڕووبەڕووی فشاری دەروونی و خەمۆكیی و گۆشەگیری كردوون،”
هاوكار ئامۆژگاری گەنجانیش دەكات كە پێویستە فێر بن كە سۆشیاڵ میدیا بەڕێوە ببەن، نەك سۆشیاڵ میدیا ئەوان بەڕێوە ببات.
كامەران حەسەن، نیگەرانە لەوەی بەشێكی زۆری گەنجان كەسایەتی خۆیان لە نێو سۆشیاڵ میدیا ون كردووە و كەسایەتییەكی خەیاڵیان بۆ خۆیان دروست كردووە و دەڵێ “سۆشیاڵ میدیا لە سەر ئەساسی خەیاڵ كەسایەتییەكی ساختە بنیات دەنێت، بۆیە بە دەییان گەنجانمان هەیە كەسایەتی خۆیان لەدەستداوە و بە دوای كەسایەتی ساختە و خەیاڵی كەوتوون،”
دەشڵێت “بەشێكی زۆری گەنجان پێیان وایە ژیانی ناو سۆشیاڵ میدیا هەرگیز لە ژیانی ڕاستەقینەی ئەوان دروست نابێت، بۆیە باوەڕی تەواویان بەرامبەر ئایندە و ژیانی خۆیان لەدەستداوە و دواتریش تووشی خەمۆكیی و گۆشەگیری دەبن و بەرامبەر بە هەر شتێكی دەوروبەر هەستیار دەبن و كاردانەوەیان توند و دەمارگیرانە دەبێت،”
كامەران باس لە لایەنی ڕۆشنبیریی و هۆشیاری گەنجان دەكات و دەڵێ “بەكارهێنانی سۆشیاڵ میدیا دەكەوێتەوە سەر ئاستی ڕۆشنبیری گەنجەكە، ئەگەر بێت و بە شێوەیەكی باش بەكار بهێنرێت بێگومان پێشكەوتن و پەرەسەندن بە خۆیەوە دەبینێت، بەڵام ئەگەر ئاراستەی بەكارهێنان بۆ مەبەست و لایەنی خراپ بێت، ئەوا گەنجەكە تووشی داڕمان و ڕووخان دەكات و بۆیە گەنجێكی بێ ئامانج و بێ بەرهەم دروست دەبێت، كە ئەو كات كۆمەڵگە بە تەواوی بە دەست ئەو گەنجانەوە گرفتار دەبێت.”
ئاشتی حەمەدەمین، قسە لە سەر دیاردەیەكی گەنجانەی ناو سۆشیاڵ میدیا دەكات و دەڵێ “دیاردەیەكی بێزاركەر، چەند ساڵێكە بە شێوەیەكی فراوان لە ناو گەنجان تەشەنەی كردووە و بووە بە ستایلێكی نوێی ژیان ئەویش خۆ نمایشكردنە لە سۆشیاڵ میدیا،”
ئاشتی ئەم حاڵەتە بە نەخۆشی ناو دەبات و دەڵێ “خۆ نمایشكردنی بەشێك لە گەنجان بە لاسایی كردنەوەی ئەستێرەكان و هونەرمەندانی جیهان، جگە لە نەخۆشی هیچی دیكە نییە، ئەوان تەنیا بۆ ڕاكێشانی هەوادار و جیاواز بەرچاو دەركەوتن بچووكترین شتی تایبەتی ژیانیان نمایش دەكەن و دواتریش بە شێوەیەكی خراپ بەسەریاندا دەشكێتەوە و تووشی دۆخێكی خراپیان دەكات،”
دەشڵێت “تا كۆمەڵگەكە دواكەوتووتر بێت، ئەو حاڵەتە تێیدا زیاترە و لەنێو هەمان كۆمەڵگەشدا تا كەسەكە بێ ئیش تر بێت زیاتر نەخۆشی خۆ نمایشكردن لەسەر ناوەندەكانی سۆشیاڵ میدیا تێیدا زیاتر دەبێت.”
