زاری كرمانجی- سۆران:
بە پێی زانیارییەكانی زاری كرمانجی نزیكەی 1000 خێزانی پەنابەری باشووری كوردستان، لە وڵاتی ئێران ماون و زۆربەیان خواستی گەڕانەوەیان هەیە، كەچی لە ئێستادا (un) و رێكخراوەكانی تایبەت بە پەنابەران هاوكاریان ناكەن بۆ ئەوەی بگەڕێنەوە بۆ سەر زێدی باب و باپیرانیان، ئەوەش ئاستەنگی بۆ درووست كردوون، بەتایبەتیش لەو بارودۆخەی خراپی ئابووری كۆماری ئیسلامی و خۆپیشاندانەكان و ئەو ئاڵۆزی و گرژیانەی ئەو وڵاتەیان گرتووەتەوە.
عەباس ئەمیر، بەڕێوەبەری كۆچ و كۆچبەرانی سۆران، بە زاری كرمانجی راگەیاند: ” لەسەردەمی رێژێمەكانی عێڕاق، خەڵكێكی زۆری باشووری كوردستان لە بەر زوڵم و ستەم ئاوارەی وڵاتی ئێران بوون، دوای راپەڕینی ساڵی 1991 ژمارەیەكی زۆر لەو خێزانانەبە دەروازەی حاجی ئۆمەران گەڕانەوەو زۆربەشیان لە شارو شارۆچكەو ناوچەكانی ئیدارەی سۆران نیشتەجێبوون، دیاربوو ئەو كاتیش تا راددەیەك رێكخراوە نێودەوڵەتییەكانی تایبەت بە پرسی كۆچ و كۆچبەران ئاسانكاری و هاوكاری پەنابەرانیان دەكرد، هەروەها حكوومەتی هەرێمیش بە هەمانشێوە بە پێدانی پارچە زەووی و كەرستەی خانووبەرە، بەشێكیشیان بڕە پارەیەكیان پێدەدرا، بەڵام دواتر ئەو هاوكاریانە راگیران بۆ پەنابەران و (un) و رێكخراوە نێودەوڵەتییەكان لە ئێستادا پشتیان لە ئاوارەو كۆچبەران كردووە، ئەمەش بارگرانی زیاتر لەسەر حكوومەتی هەرێمی كوردستان درووستكردووەو بەبێ هاوكاری ئەوان لە توانای حكوومەتدا نییە ئەو هەموو پەنابەرانە بگەڕێنێتەوەو هاوكاری داراییان پێشكەش بكات”.
بەڕێوەبەری كۆچ و كۆچبەرانی سۆران، دەشڵێت: ” بەپێی زانیارییەكانمان نزیكەی 1000 خێزانی پەنابەر و ئاوارەی باشووری كوردستان لە وڵاتی ئێران ماون و تا ئێستا دەرفەتی گەڕانەوەیان نەبووە بۆ خاك و وڵاتی خۆیان، هۆكارەكەشی بۆ خراپی باری دارایی دەگەڕێنەوە، ئەگەرنا بەردەوام ئەو پەنابەرانەمان پەیوەندیمان پێوەدەكەن و خواستی زۆری گەڕانەوە دەكەن.
