” ئەگەر كارگەی زیاتری هاوشێوەی زووم لە سنووری مێرگەسۆر درووست بكرێن ڕێژەی بێكاری لە نێو گەنجانمان زۆر كەم دەبێتەوە “
دیدار–مستەفا دۆلەمەری
كارگێری ناوەندی باڵای مێرگەسۆری یەكێتی لاوانی دیموكراتی كوردستان، لە دیدارێكی زاری كرمانجیدا باس لە كێشەو كەمووكوڕییەكانی لاوانی سنوورەكەیان دەكات و تیشكدەخاتە سەر كارو چالاكیەكانی ناوەندەكەیان.
عەزیز بابكر ئارەب سێلكی، كارگێری ناوەندی باڵای مێرگەسۆری یەكێتی لاوانی دیموكراتی كوردستان دەشڵێت: وەك ناوەندی باڵای مێرگەسۆر بەبۆنەی نزیكبوونەوەی ١٦ی ئاب یادی دامەزراندنی پارتی دیموكراتی كوردستان، شەش خولی تۆپی پێی بچووكراوەمان كردۆتەوە، بۆ هەر شەش ناوەندی چالاكیمان، لەگەڵ كردنەوەی چەند خولێكی جۆراوجۆر لە پێناو زیاتر پەرەپێدان و گەشەپێكردنی گەنجانی دەڤەرەكەمان، یەكێك لەو توێژەی كە پێویستە گرینگییەكی زۆری پێ بدرێت لاوانن، لە پێكهێنەرەكانی كۆمەڵگە و دوا ڕۆژی میللەتن.
دەشڵێت: ڕێژەیەكی زۆر لە گەنجانمان بەهرەی جیاوازیان هەیە، بەڵام بەهۆی نەبوونی توانای ماددی نەمان توانیوە وەك پێویست یارمەتیان بدەین و خزمەتیان بكەین، هەروەها داواكاری زۆرمان هەیە تا بتوانین پاڵپشتی گەنجەكانمان بكەین، بۆ نموونە ناوەندی باڵامان تا ئێستا هیچ هۆڵێكی كۆبوونەوەی نییە بۆ پیشاندانی توانای گەنجانمان، تاكە ناوەندی باڵاین تا ئێستا هیچ یاریگایەكی گەورەمان نییە، واتە بێ بەشین لە بوونی یاریگایەكی ١١ كەسی و كە یاریگەیەك نەبێت چۆن بتوانین یانەیەكی وەرزشی پێكبهێنین و بەشێكی زۆری ئەو گەنجانەی كە توانایان هەیە خۆیان لە وەرزشدا دەبیننەوە، بوونی ئەم یاریگەیە جگە لە یاری تۆپی پێ، بۆ فیستیڤاڵی وەرزشی و زۆر چالاكی تر دەتوانین سوودی لێ ببینین، ئەگەر ئەم یاریگایە دروست بكرێت یانەیەكی وەرزشی بە شایستەی لاوانی دەڤەرەكەمان دەزانین، چونكە چەندین تیپ و یاریزانی زۆر باشمان هەن لەو سنوورەدا و داواكاریمان پێشكەش كردوون، بۆ ئەوەی یاریگەیەكی ١١ كەسیمان بۆ دروست بكرێت، لەگەڵ هۆڵێكی كۆبوونەوە، بەڵام تا ئێستا هیچ وەڵامێك نەبووە.
عەزیز بابكر سێلكی،، گوتیشی: قەزای مێرگەسۆر پاركێكی نەبووە كە گەنجان و خەڵكی ناوچەكە كاتیان تێدا بەسەر ببەن و بۆیە بوونی پاركێك پێویستیەكی سەرەكی دەڤەرەكەیە و چەند شوێنێكی گەشتوگوزاری سەردەمیانە لەسەر ڕووباری رێزان و بلێ دروستبكرێت بۆ لاوانی دەڤەرەكەمان، سەرەڕای دامەزراوەی حكوومی پێویستە زیاتر گرینگی بە كەرتی تایبەت بدرێت بۆ رەخساندنی هەلی كار بۆ گەنجان و خەڵكی دەڤەرەكەمان بە گشتی، ئەگەر بێت و چەند كارگەیەكی هاوشێوەی كارگەی زووم درووست بكرێن لە سنووری قەزای مێرگەسۆر، ئەوا بە دڵنیایەوە ڕێژەی بێكاری لە نێو گەنجانمان زۆر كەم دەبێتەوە، خۆشبەختانە بەهۆی ئەو كارگەیە گەنجێكی زۆری دەڤەرەكەمان بوونەتە خاوەن كار، بێ ئەوەی چاوەڕێی دامەزراندن بكەن لە كەرتی حكوومی.
كارگێری ناوەندی باڵای مێرگەسۆر، لە كۆتای قسەكانیدا دەڵێت: ئەوەی پێی گەشبین و دڵخۆشین مەلا مستەفا مەسعود بارزانی، زۆر هاوكار و یارمەتیدەری گەنجانمان بووە، هەمیشە بۆ ئێمە بووە بە هۆكاری دڵخۆشی و چارەسەركردنی گرفتەكانمان. بەمەش بەرنامەو پلانی باش هەیە بۆ ئایندەی گەنج و لاوانی دەڤەرەكەمان.
