زاری كرمانجی – سۆران :
گەنجانی ئیدارەی سۆران پێیان وایە هەر كاتێك پێگەی كورد و كوردستان بەهێز بووبێت، لەلایەن دوژمنان و ناحەزانەوە كراوەتە ئامانج و بە جۆرەها شێوە دژایەتی كراوە، دەشڵێن هەرێمی كوردستان وەك تاقە قەوارەی ئومێد بەخشی كوردان لە هەر چوار بەشی نیشتمان، زۆرترین جار كراوەتە ئامانج و هەوڵ بۆ لە نێو بردن و سڕینەوەی دراوە، باس لەوەش دەكەن هەمیشە دوای هەر هەوڵدانێكی لەم شێوەیە، كورد و كوردستان و هەرێمە سەربەخۆیەكی پارێزگاری لە بوون و مافەكانی كردووە و بە ئیرادە و هێزێكی زۆرەوە بەسەر تەواوی تەگەرەكانی بەردەمی زاڵ و سەركەوتوو بووە.
سۆران شێرزاد مامۆستا و چالاكوانی مەدەنی لەم بارەیەوە دەڵێ: “ئەوەی ئێستا دەگوزەرێت لێدانە لە ئابووری و شوناس و نەتەوە و پیرۆزییەكانی كورد و كیانە تاقانەكەی كوردستان، بۆیە لە سۆنگەی باوەڕ بوون بە پرسە نەتەوەیی و نیشتمانییەكان، پێویستیمان بە گیانی خۆ نەچەماندن و یەكگرتوویی كوردان هەیە لە چوارچێوەی پەیمانێكی پیرۆز و بە یەك دەست و یەك ئامانج و یەك هێز ڕووبەڕووی ئەو هەوڵە نەزۆكانە ببینەوە.”
كرێكار حەمەدەمین، پێی وایە كورد باجی باشی و مرۆڤدۆستی خۆی دەدات و دەڵێ “هەمیشە كورد باجی مرۆڤدۆستی و سادەیی خۆی دەدات، ئەوەی ئێستا دەگوزەرێت من وای دەبینم هۆكارەكەی ئەوە بێت، بەڵام لەگەڵ ئەوەشدا كورد و حكومەتی هەرێمی كوردستان بەهێزتر دەبێت، بەڵام هەرگیز ناكەوێت، ئەم ئامانجەش وەكوو دەیان ئامانجی تریان دەخرێتە ژێر گڵ.”
حەمید موسا : ئەوانەی چاوەڕێی كەوتنی حكومەتی هەرێم و لەناوچوونی ئەو قەوارە سەربەخۆیە دەكەن، با سەری خۆیان لە كێوەكانی كوردستان بدەن
حەمید موسا، باس لەوە دەكات هەر حكومەتێك لەلایەن گەلەكەیەوە خاوەنداریەتی لێ بكرێت هەرگیز ناكەوێت و دەڵێ “ئەو جۆرە سیناریۆیانەی بەرامبەر بە هەرێمی كوردستان نمایش دەكرێن، بێ سوود دەبن،” دەشڵێت “چەندە كەموكوڕی هەبێت لە حكومەتی هەرێمی كوردستان، ناكاتە ئەوەی پشتی لێ بكەین و خاوەنداریەتی لێ نەكەین، بە پێچەوانەوە هەر وەكوو چۆن ئەو قەوارە سەربەخۆیە بە گیان و خوێنی زۆر هاتووەتە بەرهەم، بە هەمان شێوە پارێزگاری لێ دەكەین، بۆیە ئەوانەی چاوەڕێ كەوتنی حكومەتی هەرێم و لەناوچوونی ئەو قەوارە سەربەخۆیە دەكەن، با سەری خۆیان لە كێوەكانی كوردستان بدەن، لەوانەیە كەوتن و دۆڕانی خۆیان ببینن، بەڵام هەرگیز كەوتنی هەرێمی كوردستان نابینن.”
هاوكار حەمەدەمین : هەندێك حزبی كوردیی كە پاشگری كوردستانی بوونیان هەڵگرتووە، چوونەتە بەرەی نەیاران
هاوكار حەمەدەمین نیگەرانە بەرامبەر ئەو حیزبانەی كە پاشگری كوردستانیان هەڵگرتووە و چوونەتە بەرەی دژایەتیكردنی هەرێمی كوردستان و دڵخۆشن بەو بارودۆخەی بەرۆكی حكومەت و قەوارە سەربەخۆیییەكەی هەرێمی كوردستانی گرتووە، ئەو دەڵێ “هەندێك حزبی خۆ فرۆش كە پاشگری كوردستانی بوونیان هەڵگرتووە، چوونەتە بەرەی نەیاران و لە دڵەوە خۆزگە بە كەوتن و لەنێو چوونی هەرێمی كوردستان و حكومەتەكەی دەخوازن، سەیرم بەو جۆرە حزبانە دەهێت كە بە خۆیان دەڵێن حزبی كوردی، كەچی بەو شێوەیە هەڵسوكەوت دەكەن، من دڵنیام ڕۆژێك دەبێت ئەوان شەرمەزاری خەڵكی خۆیان دەبن و مێژوو بە خراپی باسیان دەكات.”
لەنجە مستەفا : هیچ پیلان و هەوڵدانێك بۆ سڕینەوە و گۆشەگیركردنی هەرێمی كوردستان سەركەوتوو نابێت
لەنجە مستەفا پێی وایە هیچ پیلان و هەوڵدانێك بۆ سڕینەوە و گۆشەگیركردنی هەرێمی كوردستان سەركەوتوو نابێت و دەڵێ “مێژوومان پڕ لە هەوڵی لە نێو بردن و گۆشەگیركردن و پیلانی دوژمنانە، بەڵام لەگەڵ ئەوەشدا نەتەوەی كورد گەشەی كردووە و لە نێو نەچووە و كوردستانیش لە جاران زیاتر ئاوەدانتر بووە، كەواتە ئیرادەی كورد و شكۆی كوردستان لە ئیرادە و شكۆی داگیركەران و دوژمنان بەرزترە، بۆیە هەموو هەوڵدانەكانی ئەوان بێ ئەنجام بووە و سەركەوتوو نەبووە،”
دەشڵێت “كورد پێویستە لە هەموو كاتێك یەكگرتوو تر بێت و نابێت دەرفەت بە دوژمنان بدات لەبەرامبەر یەكتر بەكاریان بهێنێت، چونكە ئەمە بێ هێزمان دەكات و ئاسانتر دەمانشكێنن، بۆیە ناپاكی یە ئەگەر لە ئێستادا یەكگرتوو و یەك هەڵوێست نەبین و لە ژێر چەتری برایەتی و تەبایی دا كۆ نەبینەوە و پارێزگاری لە دەستكەوتەكانی ڕاپەڕین و خاوەنداریەتی لە حكومەت و پەرلەمانی كوردستان نەكەین.”
