زاری كرمانجی- سۆران:
بانكی ناوەندی عێراق پێدانی قەرزێكی بۆ نەخۆشەكانی تووشبوو بە شێرپەنجە و نەخۆشییە سەختەكان راگەیاند كە بڕەكەی تا 15 ملیۆن دینار دەبێت و هەرێمی كوردستانیش دەگرێتەوە.
لە نووسراوێكی بانكی ناوەندیدا كە مانگی رابردوو بە واژووی جێگری پارێزگاری بانكەكە دەركراوە، بە ژمارە (37041516)، تێیدا ئاماژە بە پێدانی قەرزی تەندروستی كراوە و بۆ بانكەكان نێردراوە.
لە نووسراوەكەدا هاتووە” وەك پاڵپشتییەك بۆ توێژە كەمدەرامەتەكانی كۆمەڵگەی عێراقی و بۆ بەهاناچوونی دۆخە بەپەلە و سەختە مرۆییەكان، بڕیار دراوە بە یارمەتیدانی نەخۆشانی شێرپەنجە و دۆخە تەندروستییە سەختەكان بۆ رزگاركردنیان و بە دەستهێنانی چارەسەری پێویست بڕێك قەرزیان پێ بدرێت بەو شێوەیە”.
پێدانی قەرزی ئاسانكراو بە نەخۆشانی شێرپەنجە و نەخۆشییە سەختەكان، لە چوارچێوەی پڕۆژەكەی بانكی ناوەندی بە بڕی تا 15 ملیۆن دینار دەبێت، پێویستە ئەوانەی داوای وەرگرتنی دەكەن راپۆڕتی پزیشكی بێنن، كە دەری بخات ئەو نەخۆشیەیان هەیە، بانكەكانیش بڕی پێنج هەزار دینار وەك عموولە بۆ یەكجار وەردەگرن، جیا لە سوودی 2.9% و قەرزەكەش لە ماوەی پێنج ساڵدا دەدرێتەوە”.
لە نووسراوی بانكەكە دووپات كراوەتەوە” هەموو دەستپێشخەری و پڕۆژە و قەرزەكانی بانكی ناوەندی، لەوانەش قەرزە تەندروستییەكان، تەواوی توێژەكانی كۆمەڵگەی عێراق دەگرێتەوە، لەوانەش هەرێمی كوردستان، لەگەڵ پابەندبوون بە مەرج و رێنوێنییەكانی تایبەت پێیانەوە”.
