ئیسماعیل ئیبراهیم
رزگار كردنی نەتەوەیەك لە پیلانی جینۆسائیدكردنەوە بگرە تا دەگاتە سڕینەوەی ناسنامەی نەتەوەیی، شێواندنی مێژوو، كلتوور و داگیركردنی خاكی نیشتمانەكەیەوە كارێكی ئاسان نییە.
ئەگەر بەشێكی ئەم خەبات و تێكۆشانە بە بەرخۆدانی سەربازی و كۆڵنەدان و قوربانی دانەوە رێگری لێبكرێت و بەگژداچوونەوەی چەكداری پێویست بووبێت، بەڵام بەڕێوەبردن و ئیدارەدانی پاش جەنگ و نەهێشتنی پیلانەكان زۆر ئەستەمترە.
كابینەی نۆیەم لە كاتی دامەزراندنی تا ئێستا بە هەناسەی نوێی سەردەمیانەی تێكەڵكراو بە ئەزموون و گیانی پێشمەرگایەتی بێ پچڕان پلانی هەمەچەشنەی هەبووە، بۆ خزمەتكردن بە هاووڵاتییان و نیشتمان، بۆ رزگار كردنی تاكی كوردستان لە ژێر چەپۆكی داگیركەران و پووچەڵ كردنەوەی پیلانەكان.
كابینەی نۆیەم چۆن پاراستن و ئاسایشی بۆ هاووڵاتییان دابینكردووە، بەجۆرێك وڵاتانی دراوسێ و جیهانی ئیرەیی پێ دەبەن، هاوتەریب لەگەڵ ئەمەش بیری دابینكردنی ئاسایشی خۆراك و ئابووری سەربەخۆی هێناوەتە كایەوە و هەوڵی بۆ داوە، هەناردەكردنی بەرهەمە خۆماڵییەكانی كوردستان بۆ جیهان بۆ یەكەمجار لە مێژوو دەستكەوتێكە نەتەوەی كورد بۆ هەمیشە شانازی پێوە دەكات. هەژمار من، پڕۆژەی روناكی، گەشە پێدانی بواری پیشەسازی، بە دامەزراوەیی كردنی بەڕێوەبردنی كارەكانی حكومەت، پێشخستنی بواری خوێندن و ئاستی زانستی، گرینگیدان بە كەرتی تەندروستی، گەشە پێدانی رێگاوبانەكان كە لە مێژووی كوردستان پێشكەوتنی هاوشێوەی بەخۆیەوە نەبینیوە، كەرتی گەشتگوزاری كوردستان لەسەر ئاستی جیهانی خرایە سەر نەخشەی خۆشترین و ئارامترین شوێنەكانی جیهان، ئەمانە بەشێكن لەو خزمەتگوزارییانەی وەك ژێرخانێك بۆ كوردستانێكی بەهێز هەژمار دەكرێن.
ئەمە لە كاتێكدایە دەیان كۆسپی دوژمنكارانەی پیلان بۆ دارێژراوی ناوخۆ و دەرەكی بە مەبەستی رێگریكردن لە پەراكتیك كردنی كارنامەی كابینەی نۆیەم خرانە بەردەم سەرۆكی حكومەت، بەڵام هەموویان پۆچەڵ كرانەوە و كاروانی ئاوەدانی بەردەوام بووە.
بە دڵنیاییەوە ئەگەر لایەنەكانی كوردستان هاوكار بوونیانە پێشكەوتنەكان زیاتر و خێراتر دەبوون.
پایتەختی هەرێمی كوردستان كە دەیان ساڵە بەدەستی كەمی ئاوی خواردنەوەی پاك گیری خواردووە، لە پڕۆژەیەكی ناوازە و بێ وێنەدا كابینەی نۆیەم بە سەرۆكایەتی مەسرور بارزانی سەرۆكی حكومەت پڕۆژەی ئاوی ئیفرازی خستە بواری جێبەجێ كردن و قۆناغی یەكەمی كۆتایی هات و بۆ چەند مانگی داهاتووش كۆتایی بە قۆناغی دووەم دێت و هەولێر بۆ یەكەم جار لە مێژووی خۆی لە دەست بێ ئاوی رزگاری دەبێت و تا (30) ساڵی داهاتوو ئەم كێشەیە بەرۆكی بەردەدات.
نەمانی كێشەی ئاو، سەرگرتنی پڕۆژەی روناكی، هەژماری من، چەندین بواری دیكە كە ژێر خانی وڵات پتەو دەكەن، دەبێتە سەرەتایەك بۆ كوردستانێكی بەهێز.
