بەرپرسی نووسینگەی مافی مرۆڤی سۆران : لە ناوەندەكانی خوێندن كار لە سەر هۆشیاری تاك دەكەین
پشتیوان كەریم – خەلیفان :
لە میانەی بەڕێوەچوونی سیمینارێك لە ناحیەی خەلیفان ی سەر بە قەزای ناوەندی سۆران، بەرپرسی نووسینگەی مافی مرۆڤی ئیدارەی سۆران دەڵێت:” بە شێوەیەكی گشتی كە لە سیمینارەكە باسی لێوە دەكەین هۆكاری كۆمەڵایەتی و سیاسی و ئابووری گەشتیارین، بۆیە پێمان وایە ماددە هۆشبەرەكان مەترسییەكی جیهانین، ئێمە وەك نووسینگەی مافی مرۆڤی سۆران هەست بەو مەترسییە دەكەین بە پێویستی دەزانین هەوڵی جددی بدەین لە سەر هۆشیاركردنەوەی هاووڵاتییان، چونكە مەترسییەكانی ماددە هۆشبەرەكان بە شێوەیەكی گشتی هیچی كەمتر نییە لە تیرۆر، بۆیە دەمانەوێت لە ناوەندەكان هاووڵاتییان هۆشیار بكەینەوە”.
جەواد سوار، بەرپرسی نووسینگەی مافی مرۆڤی سۆران، لە بارەی نەبوونی ناوەندی داڵدەدان گوتی:” لە یاسای ژمارە 1ی ساڵی 2020 ماددەی 7 بڕگەی یەك ئاماژەی پێ دەكات، كە پێویستە وەزارەتی كار و كاروباری كۆمەڵایەتی لەگەڵ وەزارەتی تەندروستی سەنتەرێك بكرێتەوە بۆ ئەوەی بتوانێت ئەو نەخۆشانەی بە ماددەی هۆشبەر ئاڵوودەن لەوێ داڵدە بدرێن و چارەسەر بكرێن، بۆیە كردنەوەی ئەو سەنتەرە بە گرنگی دەزانین و پێویستە بە زووترین كات بكرێتەوە” .
پلانی داهاتوومان لە ناوەندەكانی خوێندن ناوەندەكانی دیكە بە هەماهەنگی لەگەڵ ڕێكخراوەكانی ngo لە ئیدارەی سۆران و دەوروبەری لە هۆشیاركردنەوەی هاووڵاتییان لەم مەترسییانە بەردەوام دەبین، هەروەها لەگەڵ ئەوقافی سۆرانیش هەماهەنگیمان هەیە و هەمیشە هاوكارن لە هۆشیاركردنەوەی هاووڵاتییان لە رێگەی مامۆستایانی ئایینی و بڵندگۆی مزگەوتەكان”.
