هاووڵاتییەك: زۆرجار خێرا لێخوڕینی ئۆتۆمبێل هۆكارە بۆ دروستكردنی تاسەی كۆنكرێتی
ڕاپۆرت-زاری كرمانجی
سەرەڕایی قەدەغەكردن و تێكدانیان لەلایەن پۆلیسی شارەوانی و تیمەكانی هاتووچۆ و لایەنە پەیوەندیدارەكان، بەشێك لە هاووڵاتییان بەردەوامن لەسەر دروستكردنی تاسەی كۆنكرێتی نایاسایی لە شەقام و كۆڵانەكان و دروستكردنی بەربەست لەبەردەم هاتووچۆی شۆفێران.
بەشێك لە شۆفێران لە ڕێگەی زاری كرمانجی نیگەرانی خۆیان دەردەبڕن لەوەی كە هەندێ لە هاووڵاتییان بەبێ هەست كردن بە بەرپرسیارێتی، دەست دەكەن بە دروستكردنی تاسەی كۆنكرێت و نایاسایی لە شەقام و كۆڵانەكانی شار، جگەلە دروستكردنی بەربەست لە بەردەم هاتوو، زیانی زۆریش بە شەقامەكە دەگەیەنن، دەشڵێن: “بەشێك لە هاووڵاتییان هۆكاری دروستكردنی ئەو جۆرە تاسانە بۆ خێرای لێخوڕینی هەندێ لە شۆفێران دەگەڕێنەوە، بەڵام ئەوە بیانوو نییە چونكە ناكرێت لەبەر شۆفێرێك هەموو شۆفێرەكانی دیكە باجەكەی بدەن و شەقام و ڕێگاكان وێران بكرێن”.
دەشڵێن: “تەنانەت زۆرجار كاتێك هەندێ كەس مۆڵەتی خانووی پێدەدرێت، جگەلەوەی شەقامی بەردەم خانووەكەی پڕ قۆرت و تاسە دەكات و بۆ ماوەیەكی زۆر كەرستەی خانووبەرە دەهێڵنەوەو ڕێڕەووی ڕێگاكە تەسك دەكەنەوە یان هی واهەن یۆ ماوەیەك شەقامەكە بەو هۆیە بەڕووی هاتووچۆ دادەخەن، كاتێك كارەكەشیان تەواو بوو، تاسەیەكی كۆنكرێت لەبەردەم ماڵەكەیان دروست دەكەن و بە شانازی و دەسكەوت دەیزانن، لەگەڵ ئەوەشدا كەسانی واهەن هەوڵدەدەن شەقام و ڕێگاكان بپارێزن و زیانیان پێنەگەیەنن، بەڵام ئەو جۆرە كەسانە ڕێژەیەكی كەمن و شایستەی دەستخۆشی كردنن، هیوادارین ئەوانەی دیكەش چاو لەوانەوە بكەن بەربەست بۆ هاتووچۆی گشتی دروست نەكەن”.
ئەو شۆفێرانە داواكاریشن لە شارەوانی و لایەنە پەیوەندیدارەكان ماوە ماوە تیمەكانیان بەناو شەقام و كۆڵانەكانی شار بسوڕێنەوە، هەر سەرپێچی و زێدەڕۆییەكیان بینی كە كرابێتە سەر شەقامە گشتییەكان یان تاسەی كۆنكرێت دروست كرابێت، خاوەنەكانیان ڕووبەڕووی سزایی داراییەكی وابكەنەوە، كە ببێتە هۆكارێك كەسانی دیكەش چاو لەو جۆرە دیاردە ناشارستانیانە نەكەنەوە، هەروەها ئەو شوێنانەش كە پێویستن بۆ دروستكردنی تاسە هاووڵاتییان خۆیان داواكاری پێشكەش بە شارەوانی و تیمی ئەندازەی هاتووچۆی سۆران بكەن، تا بەشێوەیەكی یاسایی تاسەیان بۆ دروست بكرێت نەوەك بە شێوەی هەڕەمەكی كە زیانی زیاتر بێت لە سوود”.
شوان ئەسعەد هاووڵاتییەكی سنووری ئیدارەی سۆران، بە زاری كرمانجی گووت: “زۆرجار هەرزەكارو گەنجی واهەن ئۆتۆمبێل لێدەخوڕن و بەشەقام و كۆڵانەكان بەشێوەیەكی خێرایی دەسوڕێنەوە، ئەوەش وادەكات خەڵكانێك لە بێزاری خۆیان پەنا بۆ دروستكردنی تاسەی كۆنكرێت و نایاسایی ببەن، ئەمەش لە هەردوو لاوە هەڵەیە چونكە ناكرێت لەبەر كەسانێكی وا بەربەست بۆ سەدان شوفێر دروست بكرێت”.
ئەو هاووڵاتییە خوازیارە هەم بۆ ئەو شۆفێرانەی خێرا دەسوڕێنەوەو بۆ ئەوانەش كە تاسەی نایاسایی بێ پرسی شارەوانی و هاتووچۆ دروست دەكەن، سزاو لێپێچینەوەی توند هەبێت، بەهیواین هەوڵی جددی بدرێت بۆ نەهێشتن و بنبڕكردنی ئەو جۆرە دیاردانە، دایك و باوك و خێزانەكانیش وا منداڵەكانیان پەروەردە بكەن، كە لەكاتی لێخوڕینی ئۆتۆمبێل هاووڵاتییان بێزار نەكەن، ئۆتۆمبێلەكانیشیان نەدەنە ئەوانەی مۆڵەتی شۆفێریان نییە یان لەتەمەنێكی گچكەو نا پێگەیشتوودان، چونكە زۆرجار كارسات بەدوای خۆیانەوە دەهێنن.
لای خۆیەوە شەوقی عەزیز، جێگری بەڕێوەبەری شارەوانی سۆران، بە زاری كرمانجی راگەیاند: ” دروستكردنی تاسە زیاتر پەیوەستە بە بەڕێوەبەرایەتی هاتووچۆی سۆران، دەبێ ئەوان بڕیاری دروستكردنی تاسە بدەن، واتە بەشی ئەندازەی هاتووچۆوە هەڵسەنگاندنی بۆ دەكات ئایا كام شوێن پێویستە بۆ دروستكردنی تاسە، ئەوكات بە هەماهەنگی شارەوانی و لایەنە پەیوەندیدارەكان ڕێكاری پێویست دەگیرێتەبەر”.
گووتیشی: ” پۆلیسی نەهێشتنی زێدەڕۆیی هەیە لە شارەوانی هەر زێدەڕۆیەك بكرێتە سەر شەقام و موڵكی گشتی ڕێگری لێدەكەن، داواكاریشین لە هاووڵاتییان لە بوونی هەر زێدەڕۆییەك یان تاسای نایاسایی لە كۆڵان و شەقامەكان پەیوەندیمان پێوەبكەن، بۆ ئەوەی بەدواداچوونی بۆ بكرێت و تاسەو زێدەڕۆییەكە تێكبدرێت، هەروەك تیمەكانمان بەردەوام بوونە لەسەر لابردنی ئەو جۆرە زێدەڕۆییانەو نەهێشتنی تاسەی نایاسایی.
