” خێرایی شۆفێران لە كوچەو كۆڵانەكانی شار مەترسییە بۆ ڕووداوی هاتووچۆ “
دیدار-زاری كرمانجی
سەرۆكی رێكخراوی رۆشنبیری هاتووچۆی كوردستان، دەڵێت: “ساڵانە دوای تەواو بوونی وەرزی خوێندن، بەشێكی زۆر لە منداڵ و هەرزەكاران لە كوچەو كۆڵان و شەقامەكانی شارو شارۆچكەكان دەسوڕێنەوەو دەست دەكەن بەیاری و تۆپی پێی و پایسكیل سواری، ئەوەش زۆرجار ئاستەنگە لەبەردەم هاتووچۆی ئۆتۆمبێل، هەروەها مەترسیش لەسەر دروست بوونی ڕووداو دروست دەكات.
لەبەردەوامی قسەكانیدا تەها مەهدی سەرۆكی رێكخراوی رۆشنبیری هاتووچۆی كوردستان، بەزاری كرمانجی ڕاگەیاند: “گرینگە لەسەر دایك و باوك و خێزانەكانیان چاودێری و ئامۆژگاری منداڵەكانیان بكەن پەیامێكی گرینگ بۆ دایك و باوكان بۆ ڕێگەگرتن لە ڕووداوەكان و قوربانی و شێلانی منداڵان لە دەوروبەری ماڵەكانیان و چاودێری بەردەوامیان بن، هەوڵ بدەن لە حەوشەی ماڵەكانیان سەرقاڵی یاری كردنیان بكەن، لەگەڵ ئەوەشدا هۆشیاربن لەكاتی هێنانە دەرەوەو چوونە ژوورەوەی ئۆتۆمبێلەكانیان بۆ حەوشەی ماڵەكانیان، نەوەك خوانەخواستە بكەونە ژێر ئۆتۆمبێلەكانیان”.
لەبەشێكی دیكەی قسەكانیدا سەرۆكی رێكخراوی رۆشنبیری هاتووچۆی كوردستان، دەڵێت: ” بەرپرسیارێتی بنەماڵە لە پاراستنی ئەندامەكانی لە مەترسی ڕێگاكە و وێنەی دروستی چۆنیەتی تێپەڕاندنی ڕێگا، بۆیە نابێت منداڵان ڕێگەیان پێبدرێت پاسكیل سواری بكەن تا ئەوەكاتەی هۆشیاری پەیدانەكەن و نەگەنە ئەو تەمەنەی كە گونجاوە، هەروەها لێخوڕینی بەشێوەیەكی تەندروست و دوور لە ڕێڕەوەی قەرەباڵغ و مەترسیدار، چونكە شەقامەكان و شۆستەكان هەرگیز شوێنی یاری كردن نین، بەڵكوو شوێنی لێخوڕینی ئۆتۆمبێلن نەك یاری منداڵان و پایسكێل سواری”.
تەها مەهدی، گووتیشی: “جگەلە شەقام و كۆڵانەكان بەداخەوە دیاردەی رووداوی شێلانی منداڵان بە ئۆتۆمبێڵ لە ماڵەوە یان لە گەشت و سەیران و سەردانی كردن، لەلایەن خودی ئەندامانی خێزان ڕوو دەدات، هۆكاری سەرەكی ئەوەیە كە هەڵەی باوكە یان دایك یان هەر ئەندامێكی خێزان، لەكاتی كار پێكردنی ئۆتۆمبێل چاودێری دەوروبەر ناكەن، بەمەش بەداخەوە هەندێ جار ڕووداوی نەخوازراوی لێدەكەوێتەوەو منداڵەكە دەكەوێتە ژێر ئۆتۆمبێلەكەو دوچاری قوربانی دان و گیان لە دەستدان دەبێتەوە، ئەمەش هەمووی بەهۆی هەڵەی ئەو كەسەیە كە بێباكانە ئۆتۆمبێل لێدەخوڕێت”.
ئەوەش دەخاتەڕوو: “لەگەڵ ئەوەشدا پێویستە شۆفێران چاوكراوەو هۆشیارتربن، بەتایبەت كاتێك بەناو شەقام و كۆڵانەكانی شار دەسوڕێنەوە لەسەرخۆبن و خێرایی ئۆتۆمبێلەكانیان كەم بكەنەوە، چونكە لەو وەرزەی ئێستادا منداڵی زۆر بەتایبەتی لەكاتی ئێواران و شەوان لەسەر شەقام و شۆستەكان دەبینرێن و سەرقاڵی یاری كردن و هامووشۆن، ئەگەر شۆفێران هۆشیارنەبن ڕووداوی دڵتەزێنی لێدەكەوێتەوە”.
لەدوا قسەكانیدا سەرۆكی رێكخراوی رۆشنبیری هاتووچۆی كوردستان، دەڵێت: ” بۆ پارستنی گیانی منداڵ و هەرزەكاران پێویستیان هەم بە ئامۆژگاری خێزانەكانیانە هەم هۆشیاری شۆفێران، دەبێت بە گرنگییەوە ئەو لایەنە لەبەرچاو بگیرێت لەپێناو ژیانێكی سەلامەت و كۆمەڵگەیەكی تەندروست.
