لە نائامادەیی سەنتەرە ڕۆشنبیرییەكان؛ كافتریا و گازینۆكان پڕ بوونه‌ لە گەنج

محەممەد سەمەد : هەڵەیە ئەگەر گەنجان پێیان وابێت كافتریا و گازینۆكان بۆ ئەوان لە سەنتەرە ڕۆشنبیرییەكان باشترن

سەردار مووسا : ئەگەر گەنجێكی ڕۆشنبیر و هۆشیار و دڵسۆزمان بوویت، دەبێت دەرگای زۆر لە كافتریاكان دابخرێت و لەبەرامبەردا دەرگا داخراوەكانی سەنتەرە ڕۆشنبیری و هونەرییەكان بكرێنەوە

سەرۆكی سەنتەرێكی ڕۆشنبیری : سەنتەر هەیە، بەڵام سەنتەرێكی بێ گیان و ڕۆح

مەهدی محەممەد – زاری كرمانجی :

بەشێك لە گەنجان پێیان وایە لە غیابی سەنتەرە ڕۆشنبیرییەكان، كافتریا و گازینۆكان پڕ لە گەنج بوونە و داواكارن لە لایەنی پەیوەندیدار ڕێگە چارەیەك بدۆزێتەوە بۆ دەربازكردنی گەنجان لەو بارودۆخەی تێی كەوتوون.
گەنجێك دەڵێ “دڵنیام ئەگەر سەنتەر و كۆمەڵە ڕۆشنبیریی و هونەرییەكان چالاك بن، گەنجان ئامادە نین زۆربەی كاتەكانیان لە گازینۆ و كافتریاكان بەسەر ببن.”
سەردار مووسا ی تەمەن 26 ساڵان، دەڵێ ئەگەر ڕۆشنبیربوون و هۆشیاری لای گەنجان هیچ بەهایەكی نەما، ئیدی گازینۆ و كافتریاكان دەبنە ماڵی دووەمی ئەوان و دەڵێ “بەشی زۆری ئەو گەنجانەی ڕوو لە كافتریا و گازینۆكان دەكەن باوەڕییان بە ڕۆشنبیربوون و هۆشیاری نییە و بەشێكی دیكەشیان بێ كاری ناچاری كردووە ڕوو لەو شوێنانە بكات،”
سەردار پێی وایە خەم ساردی لایەنی پەیوەندیدار و سەنتەرە ڕۆشنبیریی و هونەرییەكان و ڕێكخراوەكانی تایبەت بە گەنجان، وایان كردووە كافتریاكان جمەیان بێت لە گەنجان “بە دڵنیایەوە ئەگەر سەنتەر و ڕێكخراوەكان چالاكی بەردەوامیان هەبێت، بەشی زۆری گەنجان ڕوو لەوان دەكەن و ناچنە شوێنێك كە هیچیان پێ نابەخشێت.”
سەردار داواكاریشە كەوا لایەنی پەیوەندیدار لە ناوچەكە سنوورێك لەبەردەم زۆری كافتریا و گازینۆكان دابنێت و لە بەرامبەردا چاوی زیاتری لەسەر سەنتەرە ڕۆشنبیریی و هونەرییەكان بێت و دەڵێ “ئەگەر گەنجێكی ڕۆشنبیر و هۆشیار و دڵسۆزمان بوویت، دەبێت دەرگای زۆر لە كافتریا و گازینۆكان دابخرێت و لەبەرامبەردا دەرگا داخراوەكانی سەنتەرە ڕۆشنبیری و هونەرییەكان بكرێتەوە، ئەمەش تەنیا بە حكومەت دەكرێت، بۆیە چاوەڕوانی ئەو هیممەتە دەكەین، تا لەوە زیاتر گەنجان ئالوودەی شتە نا تەندروست و بێ كەڵكەكان نەبن.”
محەممەد سەمەد 28 ساڵ دەڵێ هەڵەیە ئەگەر گەنجان پێیان وا بێت كافتریا و گازینۆكان بۆ ئەوان لە سەنتەرە ڕۆشنبیرییەكان باشترن “لە هەموو دونیا كافتریا و گازینۆ و كافی هەیە، بەڵام باوەڕ ناكەم هیچیان وەكوو ئەوەی ئێرە بێت، لەوێ بۆ پشوو و خوێندنەوە و دانیشتن و گفتوگۆی هاوڕێیانەیە، بەڵام لێرە بۆ خۆ خنكاندن و یەكترشكاندن و ئەو جۆرە شتانەیە، بۆیە جگە لە زیان گەیاندن بە تەندروستی و ناوبانگی گەنجان، باوەڕ ناكەم ئەو شوێنانە هیچ سوودێكیان هەبێت.”
دەشڵێت “پێویستە بۆ دەربازكردنی گەنجان لەو قەیرانە، بایەخی زیاتر بە چالاكییە ڕۆشنبیریی و هونەریی و فەرهەنگییەكان بدرێت و ساڵانە فێستیڤاڵی هەمەڕەنگ ئەنجام بدرێت و لە پاڵ هەموو ئەمانەش پێویستە گەنجان لە نێو گرووپی جۆراوجۆر ڕێكبخرێن.”
بەشێك لە گەنجان گلەیی لە خەم ساردی و نەبوونی چالاكی سەنتەرە ڕۆشنبیرییەكان دەكەن، خەسرەو ئیسماعیل سەرۆكی سەنتەری ڕۆشنبیری ڕواندز لەمبارەوە دەڵێت “سەنتەرە ڕۆشنبیرییەكان تەنیا ناویان هەیە و بێ گیانن و وەكوو پێویست هاوكاری ناكرێن و مینحەی مانگانەیان نییە كە بتوانن چالاكی جۆراوجۆر ئەنجام بدەن و گەنجان لە دەوروبەری خۆیان كۆ بكەنەوە،”
دەشڵێت “لایەنی پەیوەندیدار بە ئێمە دەڵێن سپۆنسەر بۆ چالاكییەكانت پەیدا بكەن، باشە لە شارێكی وەكوو ڕواندز سپۆنسەر لە كوێ پەیدا دەبێت ؟ ئەو قسەیە دەكرێت بۆ هەولێر دروست بێت، بەڵام لە شارێكی بێ كار و بێ ئیشی وەك ڕواندز، زەحمەتە بتوانیت سپۆنسەر بۆ چالاكییەكان پەیدا ببێت و سەرەڕای ئەوەش هەوڵی زۆرمان داوە بەڵام نەكراوە،”
سەرۆكی سەنتەری ڕۆشنبیریی ڕواندز باس لە كێشەكانی دیكەی بەردەم سەنتەرەكەیان دەكات و دەڵێ “ئەگەر بایەخ بە ڕۆشنبیریی و هونەری درابووایە، ئێستا ئێمە خاوەن باڵەخانەی خۆمان دەبووین، نەك میوانی ژوورێكی فەرمانگەیەكی حكومی، ئێمەش حەزمان دەكرد زۆرترین چالاكی ئەنجام بدەین، بۆ ئەوەی زۆرترین خەڵكی شاری خۆمان بە تایبەت گەنجان سوودمەند بن لە سەنتەرەكەی خۆیان.”