” ڕەزامەندی تەرخانكردنی گۆژمەیەك دراوە بۆ ئەنجامدانی پڕۆژە خزمەتگوزارییەكانمان بەڵام بەهۆی قەیرانی دارایی ڕاگیراوە ”
دیدار-مستەفا دۆڵەمەری
سەرۆكی شارەوانی بلێ لە سنووری قەزای مێرگەسۆر، لە دیدارێكی زاری كرمانجیدا، تیشك دەخاتە سەر كار و پڕۆژە خزمەتگوزارییەكانیان و بەرنامە و پلانی داهاتوویان دەشڵێت:” بۆ ئەمساڵ نزیكەی ٣ ملیار و ٥٠٠ ملیۆن دینار ڕەزامەندیمان وەرگرتووە بۆ ئەنجامدانی چەند پڕۆژەخزمەتگوزارییەكان، بەڵام بەهۆی قەیرانی دارایی بۆ ماوەیەكی كاتی راگیراو.
لە بەردەوامی قسەكانیدا نادر محەممەد، سەرۆكی شارەوانی بلێ بە زاری كرمانجی ڕاگەیاند :” بە هاوكاری و پاڵپشتی مەلا مستەفا مەسعود بارزانی، بێ بەش نەبووینە لە ئەنجامدانی پڕۆژە خزمەت گوزارییەكان و لە ئێستادا پڕۆژەیەكی راستەوخۆ هەیە لە نێو كۆڵانەكانی شارۆچكەی بلێ بە گوژمەی ٩٨ ملیۆن دینار، پڕۆژەیەكی تری قیڕتاو كردنمان هەیە بە گوژمەی ٣٧٦ ملیۆن دینار، لە ئێستادا كارەكانی بەرەو كۆتایی بوون دەڕوات %٨٠ كارەكانی تەواو كراوە و لەماوەیەكی نزیكدا جێبەجێ دەكرێت و دەخرێتە خزمەت هاووڵاتییان، تەنها ئەمساڵ نزیكەی ٣ ملیار و ٥٠٠ ملیۆن دینار رەزامەندیمان وەرگرتووە بۆ ئەنجامدانی چەند پڕۆژەیەكی خزمەتگوزاری، بەڵام بەهۆی قەیرانی دارایی بۆ ماوەیەكی كاتی راگیراون”.
سەرۆكی شارەوانی بلێ، دەشڵێت:” بەهۆی پڕۆژەی ئاوی ٥١ گوندی دەڤەری بارزان، پڕۆژەی گەورەمان ئەنجام نەداون واتە بووەتە رێگر لەبەردەم كارەكانمان تاوەكو ئەو پڕۆژەیە تەواو نەكرێت ناتوانین هیچ كارێك و پڕۆژەیەك ئەنجام بدەین وەك قیڕتاوكردنی شەقامەكان، چوونكە دواتر بە هەر هۆكارێكی لە كار كەوتن گرفت بۆ رێگەوبانەكانمان دروست دەبێت، بۆیە پێویستە سەرەتا كێشەی ئاو چارەسەر بكرێت، بەڵام هەوڵ و خەمخۆری لایەنە پەیوەندیدارەكان لە ماوەیەكی نزیكدا ئەو پڕۆژەیە كارەكانی بە كۆتا دێت و دەخرێتە خزمەت هاووڵاتییان، ئاساناكاریش بۆ پڕۆژەكانی ڕێگاو بان دروست دەبێت”.
ئاشكراشی دەكات :” بۆ ساڵی داهاتوو چەندین بەرنامە و پڕۆژە لە پلانمان دایە وەك دروستكردنی دووسایدی رێزان بۆ بلێ، لە ئێستادا كاری لەسەر ئەوە دەكەین و دەرخستەمان بۆ كردوون شتێكی وای نەماوە لە ماوەیەكی نزیكدا دەست بە كارەكانی دەكرێت و ئەم پڕۆژەیە لە پڕۆژە هەرە گرینگەكانە، بۆ فراوانكردنی رێگای رێزان و بلێ، چونكە زۆر لە مێژە درووست كراوە دەستكاری نەكراوە، بۆیە دەكرێتە جوود ساید تا بلێ، هەر كاتێك ئەم قەیرانە داراییە كۆتای پێ هات چەندین پڕۆژەی دیكەمان هەن جێبەجێیان بكەین بە ئامانجی زیاتر خزمەتكردن بە هاووڵاتییان”.
ئاشكراشی دەكات:” تا ئێستا زەوی تاپۆ لە سنووری شارەوانیمان نییە، بۆ ئەمەش پێویستی بە ماستەر پلان و نەخشەی بنەڕەتی هەیە، هەر كەسەو ئەو زەویەی هەیەتی لە باب و باپیرانییەوە بۆی ماوەتەوە، بەڵام لەكاتی دروست كردنی خانوو یان باڵەخانەیەك شارەوانی لێ ئاگادار دەكرێتەوە و ئێمەش لیژنەیەك بەسەرپەرشتی ئەندازیارێك بۆ شوێنەكە ڕەوانە دەكەین و بەپێی ڕێنمایەكان رێگە پێدانیان بۆ دەكەین، بەشێوەیەك زێدەڕۆی نەكرێتە سەر شەقام و زیان بە بەرژەوەندی گشتی نەگەیەنێت، خۆشبەختانە خەڵكەكە زۆر هاوكار و یارمەتیدەرمانن”.
نادر محەممەد، سەرۆكی شارەوانی بلێ، ئاماژەی بەوەشدا:” زیاتر لە 30 فەرمانگەی حكوومی لە شارۆچكەی بلێ هەن و هەمووشیان بەشێوەیەكی رێك دروست كراون بۆ خزمەت كردنی هاووڵاتییان. شارۆچكەی بلێ رووبەرێكی فراوانی هەیە، لە رووی ئیدارییەوە مێژوویەكی كۆنی هەیە و لە دەستپێكی سەدەی بیستەم مەركەزی قەزی زێبار بووە و ئێستاش ناوەندی ناحیەی بارزانە، ژمارەیەك باڵەخانەو ئیدارەی حكوومی تێدایە و زیاتر لە 1500 ماڵی تێدایە، بەشێوەیەكی گشتی زیاتر لە 16 جارە لە لایەن رژێمی بەعسەوە دەڤەری بارزان هاتۆتە سووتاندن و تۆپبارانكردن و خەڵكەكەی ئاوارە و دەربەدەربوونە و هەزاران كەس شەهید و بریندار بووە و كراوەتە قوربانی ، بۆیە هەرچەند خزمەتگوزاری پێشكەش بە خەڵكی دەڤەركە بكرێت هێشتا هەركەمە.
