بڕینی بودجەی هەرێم لەسەر داوای چەند كەسایەتی كورد بوو
زاری كرمانجی-سۆران
ئەو لایەنانەی لەسەر حیسابی مووچەخۆرانی كوردستان موزائیدەیان دەكرد، چیتر ناتوانن هاووڵاتییان بە هەڵە داببەن و وەك ئامرازی گووشاری سیاسی دژی كوردستان بیانجوولێنن.
كێشەی مووچە چارەسەر دەبێت، چەند شاندێكی تەكنیكیی وەزارەتەكانی دارایی و نەوتی عێراق و چەند كەسێكی سەر بە نووسینگەی سەرۆك وەزیرانی عێراق كە دەسەڵاتی ڕێككەوتن و بڕیاردانیان پێ دراوە، لە ئەنجامی هەوڵەكانی جەنابی كاك مەسرور بارزانی، سەرۆك وەزیرانی هەرێمی كوردستان و قسەكردنی لەگەڵ هەریەك لە (محەمەد شیاع سوودانی)، سەرۆك وەزیرانی عێراق و فایەق زێدان، سەرۆكی ئەنجوومەنی دادوەریی عێراق، هاتوون و گفتوگۆ لەسەر چارەسەركردنی كێشەی مووچە و بابەتی هەناردەكردنەوەی نەوتی هەرێمی كوردستان دەكەن.
هاوكات شاندێكی باڵا لە هەرێمی كوردستانەوە چوونەتە بەغدا و بڕیارە لە رۆژانی داهاتوو لەگەڵ نووسینگەی سەرۆك وەزیرانی عێراق و لایەنە پەیوەندیدارەكان لە بەغدا گفتوگۆ بكەن.
زیاتر لە ١٠ ساڵە كێشەی مووچەی مووچەوەرگرانی هەرێمی كوردستان هەیە، سەرەتای كێشەكە بۆ ئەوە دەگەڕێتەوە كەس لە لایەنێكی سیاسی كوردستان و هەندێك كەسی دیكە لە ئەنجامی رقی سیاسی و بۆ تۆڵە كردنەوە لە رێگرییەكانی حكومەتی هەرێمی كوردستان بە تایبەتی كابینەی نۆیەم لە نەهێشتنی گەندەڵیی و بە دامەزراوەیی كردنی جومگەكانی كوردستان، پێشنیازیان بۆ سەرۆك وەزیرانی عێراق (لە ساڵی ٢٠١٤) كرد مووچە و بودجەی هەرێم ببڕێت بۆ ئەوەی فشار لەسەر پارتی بكات، دواتریش هەموو ئەو كەسانەی بوونە سەرۆك وەزیران لە عێراق، (پاش مالیكی، حەیدەر عەبادی، عادل عەبدولمەهدی، مستەفا كازمی و محەمەد شیاع سوودانی)، هەموویان بە جۆر و شێوازی جیاواز بەردەوامییان بەو پرۆسەیە دا و لەسەر سزادان و جێبەجێكردنی سیاسەتی برسیكردنی خەڵكی كوردستان بەردەوام بوون.
لە ماوەی ئەو ١١ ساڵەی كە كێشەكە هەیە، چەندان كەس بوونە دەمڕاستی دووژمنانی كوردستان و كیانی سیاسی هەرێم لەژێر ناوی داكۆكیكردن لە مووچەخۆرانی كوردستان، جگە لە بابەتی مووچە، هیچ كەرستەیەكی دیكەیان نەبوو شەقامی كوردی لە دژی تیمی پارتی لە حكومەت هان بەڵام هەمووجار دەستیان بە بەتاڵی لە بنی هەنبانەی دراو دەهاتە دەرەوە.
ئێستا ئومێدێكی گەورە هەیە هەولێر و بەغدا لەم چەند ڕۆژەدا ڕێكبكەون و كێشەی مووچەی مووچەخۆرانی كوردستان چارەسەر ببێت و دەست بە هەناردەكردنەوەی نەوتی كوردستانیش بكرێت، ئەمەش گەورەترین و دوورودرێژترین كێشەی خەڵكی كوردستانی پێ چارەسەر دەبێت.
بە چارەسەربوونی ئەم كێشەیە، هەموو ئەو لایەن و كەسایەتیانەی لەسەر حیسابی مووچەخۆرانی كوردستان موزائیدەیان دەكرد، چیتر ناتوانن هاووڵاتییان بە هەڵە داببەن و وەك ئامرازی سیاسی بۆ گووشار خستنە سەر هەرێمی كوردستان بە قسەی هزری شۆفێنیزمی عەرەبی دژی كیانی سیاسی كوردستان بیانجوولێنن.
ئەمەش دوای پێداگیرییەكانی سەرۆكی حكومەتی هەرێمی كوردستان لە دەستبەردار نەبوونی مافی دەستووری و یاسایی هاووڵاتییان و هەرێمی كوردستان.
بۆیەش مەسرور بارزانی لە هەموو بۆنەكانەوە راستەوخۆ سوپاسی خۆراگری خەڵكی كوردستانی كردووە، كە ئامادە بوونە هەموو نەهامەتییەك قبوڵ بكەن بەڵام ملكەچی و خۆچەماندنیان رەتكردۆتەوە، ئەمەش وەك پاڵپشتی جەماوەری و سیاسی بۆ ئاراستەی سیاسەتی حكومەت لێكدانەوەی بۆ كراوە و قوورسایی بەخشیوەتە داواكارییەكانی هەرێمی كوردستان.
