هەر چوار لای كوردستان ئاگر باران و جەنگە، وێرانی، داڕمانی ژێر خانی ئابووری، هەژار و لێكترازانی كۆمەڵایەتی، بەرۆكی زۆرینەی وڵاتانی گرتووە، دانیشتووانی ئەو وڵاتانە خەمی گەورەیان تێر كردنی سكی ماڵ و منداڵەكانیان و پاراستنیانە لە تەقینەوە، بۆردوومان و تۆپبارانی مووشەكی، ئەم جەنگانەی بەرۆكی رۆژهەڵاتی ناوەڕاستی گرتووە هۆكاری سەرەكین بۆ كۆچی ناچاری و ئاوارە بوون.
سیاسەتی نوێی جیهانی كە بنچینەكەی بۆ سیستمی بورژوازی دەگەرێتەوە، وڵاتانی زلهێزی جیهانی بەو ئاراستەیە بردووە لە پێناو بەدەستهێنانی زۆرترین سەرمایە و بەرژەوەندی درێژمەودا دەست لە كوشتن و برین نەپارێزن، ئەوەی لایان گرینگ نییە گیان لەدەستدانی مرۆڤەكان و لە نێوچوونی ژینگەی ئەو شوێنانەیە كە جەنگەكای تێدا روودەدەن.
وڵاتە زاڵەمەكانی ناوچەكە لە ئاست وڵاتانی زەواڵی جیهانی ترس برۆكی گرتوون، دەشزانن بەخۆشی یا شەڕ دەبێ تەسلیمی خواستی ئەوان بن.
رێكخراوی مافی مرۆڤ و كۆمەڵگەی مەدەنی لای ئەوان قسەی بێ مانان و تا ئەو شوێنە بڕ دەكەن كە بەرژەوەندی ئەوان دەخوازێت، یا بەكاریان دەهێنن بۆ مەرامی سیاسی و دۆزینەوەی بیانوو بۆ دەستوەردان لە هەموو كونج و كەلەبەرێكی جیهان.
ئەم جەنگە تەنها لە بوارێك نییە و بەس نوێترین چەك و تەقەمەنی لە شەڕەكان تاقی ناكەنەوە، بەڵكو ململانێكان تەواوی جومگەكانی ژیانی گرتۆتەوە، هەمووشیان رەهەندی ئابوورییان لە پشتە.
لە نێو ئاڵۆزییەكانی جیهان بە تایبەتی ناوچەكە، تەنها شوێنێك تا ئێستا ئارامە و ئاوەدانی شوێنی وێرانبوونی گرتۆتەوە باشووری كوردستانە، ژیان تێیدا ئارام و ئاساییە، رۆژانە بەرەو پێشوەچوون بەخۆیەوە دەبینێت، ئەگەر پیلانی داگیركەران نەبایە گەشانەوەی كوردستان زۆر لەوەی ئێستا هەیە زیاتر دەبوو.
بەڵام پیلانگێران بۆ پەلكێش كردنی هەرێمی كوردستان و تێوەگڵانی لەم ئاڵۆزیانە، هۆكار بوونە تا نەتواندرێت زیاتر لەوەی هەیە خزمەت بكرێت، جەنگی خاپوور كردن و كوشتن لە ئاست كوردستان گۆڕاوە بۆ برسی كردن و تیرۆری فكری.
بەڵام لە ئەنجامی سیاسەتی قوڵ و ژیرانەی سەركردایەتی سیاسی كوردستان و سەرۆك بارزانی و سەرۆكی حكومەت، تاكە كیانی سیاسی كوردی لە جیهان بە پارێزراوی ماوەتەوە.
ئەمەش كارێكی ئاسان و بێ سەركیشی نییە و هزری ژیر و دونیابینینی دوور مەودای دەوێت.
